Zeidah na thiamcemmi le na hngalhcemmi asi?

Zeidah na thiamcemmi le na hngalhcemmi asi? Nungak pakhat nih Korean actors pawl an min, an kum, atlakmi movies titles, atlak pimi actresses pawl le movies chungi an sakmi hla pawl khi ahngalh dih! Ka kuaruahhartuk! Aka timi cu, “Korea Movie ka zoh dih i, an thawngpang news ah ka rel peng ati.” Tlangval pakhat nih bawlungchuih minthang pawl an ram le an chuihnak club, an hmuhmi lakkhah, an ithialkaamnak club kip le an cawkmi hna azat, cun couches(nipiah) pawl an min le an hmuhmi phaisa pawl le club nih cutik kum ah an hmuhmi titles pawl khi achim khawh dih! Free kick an kawlzat le an kawl lo zat zong achim khawh dih! Ka khuaruahhar tuk! Aka timi cu, “Bawlung chuih ka zoh peng i an thawngpang news ka rel lengmang”ati.

Nutungnu pakhat nih MMID season 4 top 11, akaimi hna an min, an voting numbers le an sakmi hlapawl kha ahngalh dih! Akai lai dingle atla hnga ding zong achim cia khawh! Cun judges pawl i an comment mi le an umtuhoihar zong acinken dih! Wow!wow!wow!an timi le an mirang holh dan zong athiam dih! Ka khuaruahhar tuk! Aka timi cu, “MMID season 4, cu laimi an itel caah ahramthok in ka zoh dih, cun an thawngpang ka rel lengmang ati.” Pathian he ipehtlaihnak, ipumh khawmh le thlacam kan chanbau kan ti. Kan fale cawnpiak kan thiam lo, kan Thlarau thazaang der kan ti. Pekchanhnak ah kan chanbau, Bible hi kan hngal lo tuk kan ti tawn. A taktak ahcun “Caan” kan rak pek lo tuk caah asi.

Thiam le hngalh na duh tak ahcun “caan” rak pe. Kan hngalhcemmi le kan thiamcemmi hi “caan kan rak pek cemmi” thil arak asi. Nangteh zeidah na “Caan na pek cemmi” le na thiamcemmi asi. Pathian hngalh na duh maw? Bible rel in caan pe! Pathian chawnh na duh maw? Thlacam in caan pe! Fimthiamnak na duh maw? Cauk rel in caan pe! Na ralrin awk cu, na pek cemmi le na thiamcemmi thil nih “sualnak, thatlonak, rawhnak le thihnak” chungah an luhpi ahcun “kaltak le chuaktak” naa harhtuk cang lai! Cucaah lunfimbu tein naa thihpi ko lai.

Leave a Reply

Your email address will not be published. Required fields are marked *