Vawlei Cung Ah Nangmah Hi Mi Van Tha Bik Na Si!

Nikhat cu langak ( Crow) pakhat ramlak ah a zuang i aa nuamh tak tak. Tibual ( lake) nak hmun a phan hlan le,va dang aa dawh tak mi a hmuh hlan khan cun, a si ning ah a lung a tling. Ruah lo pi ah a hmuh mi va cu Varang ( Swan) a si. Aw hi va cu aa dawh in a rang hrinhran dah a ti. Kei tu cu ka dum tuk, zoh awk ka tha lo. Hi va hi cu ka hmuh mi va vialte lak ah aa dawh cem a si lai. A nih hi cu vawlei cung ah aa nuam cem a si lai a ti.

Cun Langak cu tang ah tum in Varang cu a va chawnh. Ka hmuh mi va vial te lak ah aa dawh cem na si a ti. Varang nih cun ka lawm tiah a rak ti. Asinain kei zong nih Vangzuang ( Parrot ) ka hmuh hlan khan cun, aa nuamh cem ah ka rak i ruat ve ko. Vuangzuang cu teh na hmuh bel cang maw? A nih cu aa dawh tak tak zawng( colour) hnih a nei a ti. Van zoh ah khin mi lungthin a lak tuk tiah Varang nih cun Langak cu a chimh.

Cu ti cun Langak nih Vangzuang cu hmuh duh ah a kawl. A hmuh bak in hi ti hin a chimh. Nang cu na dawh tuk, aa nuam cem na si lai a ti. Vangzuang zong nih cun aa lawm nak le Awtaw ( Peacock) a hmuh hnu i,a lung aa rak i si lo nak kha a chimh ve. Awtaw ka hmuh hlan khan cun aa dawh bik ah ka rak i ruah tak tak. Kei nih cun zawng hnih lawng ka nei. Awtaw nih cun zawng phun tling a nei tiah a rak chimh.

Cu ti cun Langak nih Awtaw hmuh ding in a kawl than. Saram zuat nak hmun ah a kal. Awtaw a hmuh bak in ka nun chung ah hi ban tuk in aa dawh mi va ka hmu bel lo. Awtaw hi aa dawh tuk hi teh a ti. Mitampi nih cun Awtaw zoh duh le hmanthlak pi ding ah an ra hna. Mipi an kal in Langak zong Awtaw pawng ah a kal ve. Ka hawi Awtaw nang cu na dawh tak tak si. Nangmah hmuh duh ah pei Nitin in minung a thong leng lo an ra peng ko hi, khuakuahhar cu na si a ti. Nang cu vawlei cung ah aa nuam cem va na si lai tiah a ti.

Kei tu cu minung nih a ka hmuh tik ah an mah he i hlat nak ah a ka thawl hna tiah Langak nih cun Awtaw cu a ti. Awtaw nih cun kei zong aa dawh cem le mi van tha cem ah ka rak i ruah tak ve ko. Asinain ka nuam kho bel lo. Ka dawh nak nih hin harnak a ka pek. Ka dawh ruang ah hin pei saram zuat nak ah zuat ka si cu. Ka duh nak ah ka kal kho ti lo.

Nai teah saram zuat nak ka zoh lengmang i, ka ruat mi cu ka hawi Langak nang mah lawng lawng hi zuat lo mi na si. Cucaah cun pei a dih cia mi thla ah khan Langak rak si ning law zei tluk in dah ka nuamh hnga ka ti len cu. Nang mah hi rak si ning law ka duh nak paoh ah ka kal kho hnga. Vawlei cung ah aa nuamh bik ka rak si ko hnga tiah Awtaw nih cun Langak cu a rak ti ve.

Cu tik ah cun Langak nih zei tluk in dah mi van tha le mi sunglawi ka si ti kha aa fiang tuk cang..
Hi tuan bia hi Va tuan bia a si nain, kan nih zong nih an mah ban tuk in, nitin kan ruat tawn ve. Zei ruang ah tiah cun Social media kan hmang tik ah, midang an nun kan hmuh tik hna ah an nih cu an i nuam tuk. An nih cu an nunnak ah chambau nak an nei lo. An mah ban tuk si ka duh ve tiah kan ruat tawn. i tahchunh ding a si lo mi khi.

Cuticun kan mah nih kan neih mi kan nun kha a sunglawi zia kan i philh tawn. Hi ban tuk tam deuh in kan ruat paoh ah i nuamh nak he cun kan i hlat deuh deuh ko lai. Nang mah nak in aa nuamh deuh mi le a rum deuh mi cu an um ko lai. Asinain, vawlei cung ah hin thil tampi a nei tu paoh khi aa nuam cem a rak si lem lo. Thil neih lo zong ah mah le si tawk ah aa lung sak mi tu khi aa nuamh bik cu an si. Cu ban tuk minung lawng cu Vawlei cung ah aa nuamh bik mi cu an si. Pathian nih an ser ning ah khan i lawm. Tak tak ti cun na nun kha dawh hngerh cem mi cu na si cuh. Vawlei cung ah nangmah hi mi van tha bik na si!

Credit: Molly Zathang

Leave a Reply

Your email address will not be published. Required fields are marked *