USA ah a linsa taktakmi George Floyd a thihnak kong cu hitihin a si

Tulio USA ah a linsa taktakmi George Floyd a thihnak kong cu hitihin a si. Chicago Ave lam cung ah a ummi Cup Food dawr ah George Floyd cu fang 20 ca a deu iput in kuak cawk aa timh. Dawr hngaktu nih phaisa deu a si an theih cangka tein palek an chawnh hna. Minneapolis police officer pali cu an rak ra colh. George Floyd cu an tlaih. A kut an leh i cingcek in an khih. Mawtawk ke hram, lam cung ah an tluk i police officer pakhat nih a khuk in a hngawng ah minutes 8 tluk a rial chiah. A dang officers pahnih nih a ke lei in an tlaih piak. Asian lei officer nih minung a kham hna. George Floyd nih ka thaw ka chuah kho lo lo e tiah a nawl hna nain an thlah duh lo. Caan sau ngai a hrial chih hnu ah ambulance a rak phan. George Floyd cu a col ti lo. An cawi i Ambulance ahcun an khin. Cuticun an kalpi. Ambulance chung ahcun paramedic nih a thaw an zoh i, a thaw a um ti lo an ti. A ttang ah an nam len nain a thaw a um ti lo. Cuticun, sizung an phanpi i sizung in a nunnak a dih cang tiah an thanh.

George Floyd a tlaitu palek officers hna an min cu Derek Chauvin, Thomas Lane, Tou Thao, le J Alexander Kueng’ an si. A hngawng ah a khuk in a rial chihtu Pa hi Derek Chauvin a si. Nihin tiang ahcun an tlai rih hna lo. Minneapolis khuabawi, Jacob Frey nihcun ziah a tu tiang an tlaih bal hna lo. An tlaih diam cang hna ding a si tiah a au hnawh hna. Hma cu a luangmi thisen phih hmasa loin, zeitindah kan damh khawh lai? a ti hna. Video a hmutu vialte nih a tlaitu police officers hna cu sual an phawt dih hna. Minneapolis khuami cu an thin a hung tuk i sandah an piah. Innlo an hrawh. Target dawr cu an bauh lawng si loin mei in an duah. Cu lakah a cheu nih dawr thil cu an rak i fir. Sandah a piahtu pawl cu Palek nih meithal in an kah hna i minung pakhat kuan hma in a thi i 3 hliam an tuar tiah nydailynews nih a tial. FBI nih hlathlainak tuah colh dingin US President Donald Trump nih a fial hna.

Hakha 2015 Election lio ahkhan Hakha cu NLD nih an lak dih. Hakha hi thutnak Pahnga a um. Pathum hi Union lei a kalmi an si i Pahnih hi Hakha ah a tthumi an si. Tonzang ahhin thutnak Pali a um ve. Union Nypitaw ah Pahnih an ngei i State Hakha ah Pahnih an ngei ve. Nypittaw ah thutnak pahnih ahhin ZCD an thim hna. Hakha ah a tthu dingmi ahhin NLD pakhat le ZCD in pakhat tiah Parties 2 ah an i tthen. Palewah 2015 lio ahkhan Palewah cu NLD nih an lak dih. Thutnak 5 an ngei. Pathum hi Union lei a kalmi an si i 2 hi Hakha ah a tthumi an si. KanPetlet ahhin Union lei ah thutnak Pahnih, Hakha ah Pahnih tiah a dihlak in pali an ngei ve. 2015 lio ahkhan Union lei a kal dingmi ah NLD palai an thim hna. Hakha ahhin USDP pakhat le NLD pakhat tiah Parties 2 ah an itthen ve. Asicun a ra dingmi 2020 election ahhin Chin Party, CNLD nih Myone District pa zeizat ahdah teinak an hmuh khawh lai? CNLD Chin Party an tthawnnak ding cu Falam ah an tthawng lai. Matu ah an tthawng kho. Thantlang hi an la kho hnga maw? A ruah ding a tam rih. Hakha hi zeidah an lawh hnga? Cu lo Myone Districts dang, Tonzang le Tedim hi an la kho theng lai lo. Kanpetlet le Palewah zong hi an la kho theng lai lo.

Cuti a si ahcun, CNLD nih biatak tein campaign an tuah nak ding hi Myone 4, Falam, Thantlang, Hakha le Matu hi an si te lai. Union lei tthutnak cu a dang tein chiah usihlaw, Chin State Hluttaw PM ahhin mah Myone 4 dihlak chung in MP seats 8 lawng a um. Mah seats 8 hi a ning tein a lak khawh te lai maw? Chin State Cozah ser, form khawhnak ding caah tthutnak 12 an lak khawh a herh lai. Cucaah, Falam, Thantlang, Hakha le Matu ah a ummi MP seats 8 hi a dihlak in hei pe viar hna.usihlaw, Cozah an ser khawhnak ding ah MP 4 an herh rih. Cucaah, MP 4 hi Myone dang, Tedim, Tonzang, Kanpettlet le Palewah ah an lak khawh lai maw? Fawi dawh a si lo. Chin Party supporters pawl nih CNLD a dirhmun von ka chimh te tuah ulaw. Keicu an in harh ngaingai lai ka zumh ko hi. Note: Tulio ka von ttialmi tete hi political facts tete an si i, ka palhmi a um ahcun von ka remh piak colh tthan te ulaw. A ra dingmi 2020 election ahhin khuacuanhnak a fiang deuh hnga maw tiah 2015 lio election dirhmun review ka von ttialmi an si. Catialtu: Sazang Cinzah.

 

Leave a Reply

Your email address will not be published. Required fields are marked *