US Citizen Halmi Liomi Caah Inka An Khar Chung

tu lio vawleicung pumpi cu Covid-19 nih buaicur in a kan tuah ko. ram rum hne le ram thawngthawng zong lungrethei in a chiah hna. Cozah nih siangin an khar thluahmah, mipi zong lengchuak lo ding in lock-down a van tuah thluahmah cang. US rampi zong mipi himnak ding caah Citizen phitnak (USCISS) zung an khar ruangmang cang lai tiah theih a si. mah zungpi hi mipem mi caah a biapi taktak mi zung a si. cu hlan ahcun rammi sinak hi hal khawh peng a si nain tutan cu zawtnak hrik lengmi ruangah may 3 in khar dir in biakhiahnak an tuah cang. a tang lei ah Salai Z T Lian nih a tarlangmi rel khawh a si.

“Citizen phitnak (USCIS) zung an khar chap rih lai Tulio Covid-19 zawtnak ruangah USCIS zung cu a tlawmbik May 3 tiang an khar chap rih lai. Cucaah citizen camipuai phit ding appointment, citizen lakding appointment na ngeih zong ah kal lo ding a si lai. Hi pul zawtnak pakhat le pakhat i chawnhnak kongah thinphang ding um ti lo ti dirhmun kan phanh tikah appointment an in tuah piak than te ko lai. Mah tikah appointment thar an in tuah piak thannak ca cu ca in an in kuat te lai.” tiah a tial.

Mah thangtha bia hi a tha taktak mi a si. A sullam ruat bu tein rak rel ve. Rom 5:1 “Atucu zumhnak thawngin thiam coter kan si caah, Kan Bawipa Jesuh thawngin Pathian he kan irem.” Pathian cu pakhat lawng asi. Pathian le minung karlak ah remhnak asertu cu Jesuh khrih asi tiah Timothy chungah kan hmuh. Pathian he remhnak kan ngeih khawhnak hnga, Jesuh he ipehtlaih hmasa kan hau. Minung he pehtlaihnak kan ngeihmi cu kan hawikom thabik an si. Cubantuk cun thlacamnak kan ngeih khawhmi hi Pathian he pehtlaihnak le hawikomhnak asi. Khrihfa kan sinak alanghnak cu Khrih he hawikomhnak kan ngei ah khin asi. Jesuh ka ngei ti lawnghi aza lo. Kan ngeihmi Jesuh he ihawikomh aherh tuk. Jesuh ka ngei tiah azaami laimi kan tamtuk. Jesuh ka ngei tiah ati hi athathumi kan tamtuk. Jesuh he rian kan tuan ti, kan thu ti, kan kal ti maw tihi abiapi tuk. Micheu cu hrinthan kan si nain kan chungah Sehtan cu a um ti lo nain a thilri atam tuk tawn caah kan thinlung luatnak kan hmu kho lo. Kan thinlung hi athiang ahau. Lungthin athiangmi cu Pathian kha an hmuh lai tiah Bible nih ati.

Pathian fa asi cangmi hna nih kan thinlungah hin Pathian bia kha kan tuh awk asi. Tlaici lakah athabik cu Pathian bia asi. Kan thinlung ah Sehtan thilri hna hi chuah hna u. Pathian biatu kan khumh awk asi. Hrinthan kan ti nain Pathian nawl kan ngaih lo caah, Bawipa kan hngalhnak athuk kho lo. Bawipa nawl kan ngai deuhdeuh, Pathian ka hngalhnak athuk deuhdeuh. Minung kan sunglawihmi hna Bawi le Uktu le minthang hmanh lunglawm tein kan don hna le timhlamhnak kan ngei. Thianghlim tein kan innchung le kan thilri kan chiah hna. Cu hmanh cu caan sau a um ding an si lo. Cubantuk cun azungzal kan sin ah a um mi le an kan bawmtu asimi Thiang Thlarau hi zeitlukin dah kan timhlamh piak aherh. Zeitlukin dah timhtuahnak kan ngeih awk asi. Thiang Thlarau cu kan innchungah a um lai lo, kan thinlungah a um mi asi. Cucaah ka thinlung hi kan remh awk le thiang tein kan chia awk asi.

Thiang Thlarau nih kan thinlung hi owner si aduh, uk aduh, ngeih aduh. Amah lawnglawng nih kan thinlung hi uk aduh. Thiang Thlarau loin cun kan si kho lo. Harnak kan inn tikah, bawmtu kan ngeih aherh. Khrihfa kan i ti nain, bawmtu kan ngeih lo ahcun zangfak takak kan si. Jesuh nih harnak nan tong ko lai, asinain ka tei cang tiah ati. Kan thinlung hi tihnak kan ngeih awk asi lo. Bawmtu Thiangthlarau kan ngei. Kan thinlungah Sehtan thilri a um rih ahcun, fawituk le awltuk in an kan naih peng. Kan thinlungah kan duh bikmi hi Phone hna asi, coffee hna asi, facebook hna asi. Kan dawtmi hna an si. Kan duh bikmi Jesuh asi lo tikah, Bawipa he kan I hlat tuk tihi kan hngalh awk asi. Cucu kan thinlung a luat lo caah asi.

Vawlei cungah, kan nupi le kan va le hi, midang nakin an idawh bik tiah kan thinlungah aum lo ahcun, cucu Sehtan nih an kan uk rih caah asi. Cucu luat kan herh, kan luat khawhnak ding caah Thiang Thlarau kan herh. Thiang Thlarau cu remhnak sertu asi. Remhnak sertu kan si ruangah Pathian fa kan si lo. Pathian Fa kan si ruangah remhnak sertu kan si. Bawipa nih khoikaa hmun paoh ah an kan thlen khawh, an kan remh khawh, zeitik caan poah ah an kan thlen khawh.Jesuh nih an kan chimh mi cu, sualnak chungah mi atlak tertu an um ko lai, asinain cu bantuk sualnak atuahmi hna cu tihnung ava sidah. Ngakchia sualnak apialtertu cu an hngawngah lungtum tlaih in hlonh awk ah atha deuh ati. Cucaah kan iralrin awk asi. Sualnak chungah mi atlak tertu kan sinak hnga lo, nifatin kan iralrin ahau.

Mi le mikar lakah, bia kan ruah hna tikah, mikong kan ceih hna tikah, midang caah sualnak phortu ah kan I cang tawn. Kan theihmi bia hna le, kan thinlung a um mi bia hna hi, midang sinah kan chuah pi awk asi lo. Midang sin ah kan chuahter ahcun, midang cungah sualnak phortu kan si. Cucaah kan iralring awk asi. Mi le mi kar ah remnak le dawtnak kan ser tikah, Pathian nih kan fa an kan ti. Kanmah ziaza nih sualnak achuah pi I, Khrih ziaza lawng nih Bawipa sunparnak alanghter khawh. Cucu kan luat tikah Khrih ziaza kan ngei te lai. Sehtan nih Pathian fa kan sinak ahgalh ko nain, azernak kha kan cungah alang tawn. Pathian bia hngalh khawh lonak dingah kan nun an kan melh tawn. Pathian biatak kha hrawh aduh zungzal. Sehtan zong nih Jesuh kha Pathian fa asi ahngalh ko nain, na si taktak ahcun tiah ati.

Thlarau chia cu khualtlung asi. Khual tlung cu zeitik paoh ah thawl khawh asi. Cucaah Thiang Thlarau thawnnak kha hmang law thaal. Kan khual tlung khi, umternak nawl le thawlnak nawl kan ngei. Thlarau chia hi kan thinlung ah um ter zungzal hlah uh. Thiang Thlarau tu hi umter zungzal uh. Kan thinlung kan on piakmi thil paoh hi kan chungah a um. Sehtan nih tukforhnak ahman mi thil hi atam tuk. Cucu kan caah thihnak lawngte asi. Bawipa nih atuhmi thil cu kan caah thatnak lawngte asi I nunnak asi. Kan itheih lo karah, kan thinlung ah hin Sehtan nih, thintawinak, tihnak, mikong ceih huamnak, miphorhlawtnak, hnahchuahnak in riantuan tawn. Cucu Jesuh min in thawl hna usih. Cu vialte aphi chuak cu thihnak lawngte asi. Zu ding pengmi khi, adonghnak ah zutama an icang. Cubantukcun, nifatin thla na cam I, Bible na rel ahcun, thlarau mi na chuak ko lai.

Kan thinlung aluat lo ahcun, Bawipa dawtnak kan hngal ko lo. Bawipa aw kan thei ko lo. Hrinthan mi cu Pathian fa kan si cang caah, Sehtan thilri hi kan ngeih ahau lo. Hnawmtaam lawngte an si. Cucaah kan hlawnh hna dih awk asi. Hlawnh duhnak thinlung kan ngeih awk asi. Kan thinlung chungah Sehtan thilri a um rih ahcun, Thiang Thlarau nih hmunhma ala kho lo. Thiang Thlau le Sehtan hmun khat ah aum ti kho lo. Kan thinlung in kan zumh I kan kaa in kan phuan tikah, luatnak kan hmu. Kan kaa nih kan chimmi thei tlai hi, kan zun tawn. Ka kaa nih kan duhmi thil fak piin Jesuh sin ah kan au tikah, kan nunnak a kekuai colh. Kan ihawikomhnak atha maw? Nuleva kan ipehtlaihnak atha maw? Midang kan pehtlaih mi hna atha maw? Cucu Khrih kan ngeihmi nih an kan pekmi Thiang Thlarau thawngin remhnak kan ser awk asi.

Luka 19:1-10 – “Jesuh le Zakia tuanbia kan hmuh. Jesuh hngalh aduhmi hna le hmuh a duhmi hna caah cun hngalh khawh le hmuh khawh asi. Mi zeicapaoh caah asi. Zakhia aniamnak cu aa chuahpi mi asi nain cu aniamnak nih khan aa donh ter lo. Mitampi cu kan sining kha Jesuh hmuhnak dingah kan idonh ter. Zakhia nih athinlung chungah duhthimnak angei. Cu aduhthimnak cu Jesuh hmuh nak asi. Cucaah luatnak ahmuh. Kan itinhmi a that ahcun, zeihmanh nih an kan dawn kho lo. Tuzan ah Bawipa he ipehtlaihnak le ihawikomhnak ah an kan dawntu thil vialte hi kan thawn awk le kan thial awk asi. Kannunak ah kan herhbikmi hi Jesuh asi. Jesuh nih zakhia khulrang in rungtum law na inn ah ka tlung lai ati. Zakhia nih jesuh hmuh duh lawng asi loin, zeidah achim lai tiah thinglung dihlakin hngalh aduh in apanh. Cucaah thawngtha kan ngaih tikah, kan thinglun dihlakin kan ngaih ahcun, Jesuh nih an kan chawnh. Jesuh nih achim ning tein khulrang in atum i , lunglawmhnak in atlun ter.

Zakhia nih in, khamhhnak ahmu rih lo, thluachuah aco rih lo, asinain anawl angaih hmasa. Cu anawl angaih tikah, khamhnak ahmu. Kan thinlung dihlak le chung leiin, sualngaihchinak le zumhnak kan ngeih lo ahcun, Pathian thawnnak nih rian atuan lo. Sual ngaihchihnak kan ngeih lo ahcun sualnak atlau kho lo. Sualnak kan ingaihchih tak hnu lawnglanwgah atlau lai. Sual ngaihchihnak in rawlulh lo ahcun, kan thazaang ader lawng ader le kan tha athawng lo. Rawl an ei than tikah, an tha athawng than. Cucaah zeitlukindah sual ngaihchihnak abiapit. Sual i ngaihchih nak hna aw cu, Bawipa nih atheih. Zumhnak taktak kan ngei lo caah, sualngaichihnak kan ngei kho taktak tawn lo.

Minung lawngte appointment tuah hlah u. Bia iruah hlah u. Pathian he appointment tuah u. Nikodemu kha Jesuh alen caah, khmahnak he atin. Innpa lawnglawng hi len awk asi lo, bia he kan tin. Jesuh kan len ahcun, biatak le thlarau he kan tin. Thawnnak he kan tin. Zingkaa dei lei ah appointment an kan tuah ahcun tho law thlacam. Cucu abiapi tuk. Bawipa nih biaruah an kan duh caah asi. Bawipa hi leng hna usih, kan caah luatnak asi. North Korea Minung Rawl Eidin Tha Lo Million 11 An Um.United Nations independent Investigator on human rights nih North Korea ramah rawl eiawk nei lo minung Million 11 an um tiah cathanh an chuah. Raw lei awk ngeilo hna caah thinphang dirhmun an sinak le North Korea minung cheukhat cu rawl din ei awk tha lo in an um ti a si. United Nation Special Rapporteur on human rights in North Korea Tomas Ojea Quintana nih a chim.

UN General Assemble human rights committee sinah Tomas Ojea Quintana nih hngakchia 140,000 cu Rawl khim lo in a ummi an umnak le mah hna lakah 30,000 hna cu ei ding chambau ruangah ruahlo ah a thi kho mi dirhmun an si a ti. Wuintana nih “North Korea nih harsatnak a tongmi ahhin tuanvo ngeitu cu cozah a si, Pumpak zalennak phihkham a si, Ram mipi dinei kong ah le Lo hmun tuahnak kong ah cozah a chambau ruangah a si” tiah a peh. Khuasik le Khualum a thlen ruangah Vawlei thahlo ruang le, ruahti chianak ruang, le thlaikeu thah lo ruangah North Korea ramah hin rawl dinei a zalo mi an tamnak a si. an ram dinei kong ah harsatnak an ton caah North Korea minung cu China ram ah tampi an pem hna.

US President A Cuh Ve Dingmi ASIAN Thisen Kengmi. Asian rammi pa a si I apa hi loram(farmer) riantuannak I a cawmmi a si, Apa hi physics in Ph.D a la mi a si Asinain a tu ahcun kum 2020 ah US rampi President thimnak ding ah a tel kho mi pa a si. Amah min cu Andrew Yang a si,Amah hi January 13, 1975 a chuakmi kum 44 minung a si I A Pa hi Taiwan rammi a si. . Democratic party in 2020 US president thimnak ah president cuh a tim ve. A biachim mi pawl le a khuaruahmi pawl zong uar a um ngai. Business zong a tuahmi a si I business mind le hmailei US mipi hrangah khua a ruat ngaingai ti mi a biachim in a lang, President Donald Trump he a zuam ding an si I zeidek a lawh lai. Kum 2020 thimnak thlihran cu US mipi hrangah Democratic maw Republic party tiah zuamnak a sang ngai ding a si caah vawlei pumpi nih cuanh asi ko. Andrew Ying hi mipi thinlung ah zeidek a lawh ve te lai. tu lio kan ram Myanmar thimnak ah NLD, USDP le CNLD bang 2020 thimnak kong remcang ah aupi a si pah cang.

 

Leave a Reply

Your email address will not be published. Required fields are marked *