Tutan ICJ ah kawl ralbawi pawl tazacuai an tonnak he pehtlai in biaknak lei cawnpiaktu le hruaitu hna tampi an dir hmun a hung lang.

Tutan ICJ ah kawl ralbawi pawl tazacuai an tonnak he pehtlai in biaknak lei cawnpiaktu le hruaitu hna tampi an dir hmun a hung lang. Hi tiangtiang site lai ding hi mino a tamdeuh nih cun an rak ruah cio lai ka zum lemlo. Kan hmailei (future) arak kan hrawhpiak dihtu, chungkhar le miphun vialte a kan thencheutu, mitthli le thisen tampi arak luantertu, uico le ar tluk hmenh ah arak kan rello tu ralkap bawi hna tazacuai an ton tikah, lungfim bu tein dirpi duhnak nan ngeih khawh mi hi nan hnu arak in zultu hna mino tampi caah cun afak ngaingai ko.

Pi Suh hi ralkap bawi pawl dirkamh ah a kalmi asi lo, ram mipi dihlak duhnak (national interest) huhphen duh ah a kalmi asi nan ti mi ko hi afak khun. Sualnak khapthup in a tuahtu ralkap bawi hna dirkamh hi kan ram mipi nih duhmi a si ko ahcun ngaihchia taktak a si ko hnga. Tuchan mino tampi nih kan dirkamh mi le kan value mi he zong ai kalh lai ka zumh. Hlan ahcun, kan ram mipi nih duhmi hna hi dawtnak le remnak karhter, nuam tein khuasak, fim cawnnak le thiamnak ah thancho, chawlehnak ah thancho, ral thawh haulo in dai tein khuasak pawl hna an si, tiah nan rak kan cawnpiak tawn.

Nan rak kan hlen cikcek!! kan hngakchiat lio in nihin tiang Sunday School ah siseh, Biakinn pumhnak ah siseh, cawnnak tete nan kan tuahpi lio ah khan dinfelnak le zumhtlak sinak te hna nan kan cawnpiak. Pathian sermi thil dihlak hna le minung hawi hna dawt le upat ding nan rak kan cawn piak. Asinain, nan mah lila kha nan kan cawnpiaknak he a kalh in a nungmi le thinlungput a ngeimi nan si van hmuh cu, nan cawnpiaknak arak ngaitu hna kan caah cun a fak hringhran.

Caan saupi nan rak kan nawicawt khawh nain atu ahcun nan dirhmun zeidah asi ti fiang tein kan theih cang. Mi cheukhat cu dirhmun a ngeilo mi hruaitu nan si zong kan i fiang cang. Nihin tiang thil fate kong zongah dingthlu lairelnak (justice) a kawl belmi nan silo zong theih nan si cang. Ara lai mi caan tlawmpal cun nan chan a dih te lai. Nan tefa hna nih nan hmunhma an rolh te tik ahcun, dinfelnak, tlukruannak, dingthlu lairelnak (justice) le dawtnak a karh tertu si hram hna seh.

Credit: Ram Nun Cung

Leave a Reply

Your email address will not be published. Required fields are marked *