Salai Bawi Lian Mang: UNIFORM HRING le CAUK HRING

Minung hi tthat dih khawh asi lo bantuk in chiat dih khawh asi ve lo. Kawl ralkap hi an tthalo tiah Chinmi zapi (atamdeuh pi) nih kan ruah. Ralkap uknak tang i saupi a rak ummi hna nih an chiat le an tthat cu kan theih bik. Asinain ka khuaruah ahar tawn mi pakhat cu Kawl Ralkap Bawi cheukhat he bia kan iruah ah hin an hmurka in dawtnak le zawnruahnak (humanity; sympathy and empathy) bia tete hi ka theih lengmang. An pumpak in cun Kawl Ralkap chung ah hin mittha tete zong an rak um ve ko lai. Ralkap Uknak system an rak hman tik ah ralkap uk in mipi an rak kan uk tikah mipi nih kan rak celh hna lo.

Cu kan rak celhlo mi achiakha tukmi ralkap uknak system chung in 2008 constitution cu an rak ttial mi asi. Kum 16 chung conference an tuah I an ttial mi cauk asi. Uniform hring ai hruk mi nih an duhmi poh an sawm hna I an mah duhning hoih in an ttial mi constitution asi tik ah an ttial mi constitution cu uniform hring nih a runh tuk. Atulio Burma ram politics chim tik ah 2008 constitutions hi chim lo awk a ttha lo mi asi. A mizei poh nih hi constitution hi remh ding asi tiah ti cio asi. Uniform hring ai hruk mi nih hring taktak in an ttial mi constitution hi a rel bal he rel ballo he, athei he theilo le remh ding ti dih cio asi. Tthate in a rel I a kherhlai mi nih cun hi cauk hi remh ding a tamtuk I athar lawlaw ttial tthan ahau mi asi ti cu fiangte in an theih ko lai.

2008 constitution ka rel ah hin cun Naga ram i rawlttaam in kan rak itaap lio ka lung ah a chuak tawn. CNA ralkap 100 deng Kachin ram ah training kan rak kai I kan ram ah kan rak tlung. February thla in KIO hmunlipi in kan I thawh I May thla dih ah Naga National Socialist Council of Nagaland (NSCN) hmun kan phan. Patkuai tlangpar ah nitlak lei in India ralkap, nichuah lei in Kawl ralkap nih an rak kan erh tonh I tlangpar ah cun fur chung kan taap. Rawl ei awk kan rak nei lo. Ni 45 rawllo ngacha in kan rak taap.

Kan rawl attaam, zeidang tuah awk theih lo ah kan hawi pakhat nih phe khoika in dek avun chuah pi I phe cu kan ikah hna. Kan ikah tuk ah hin kan phe cu a ttet dih I amot dih hnik tiang kan ikah. Aphaw zohnak bak in khi phe khi zeidah asi ti khi a tamdeuh cu kan theih khawh. Cu bu ah cun kan ikah tthiamtthiam ko. Phe kan ikah ahcun kan rawlttam kan philh deuh. Rawlttam philh deuh nak ah cu hman tlaklo phe chiate ikah cu acuh in kan icuh.

Kanmah lak ah cun phekah athiam taktak mi an um. Phe an vun cawh I an vun tonghtham ah khin an inuam tuk. Azoh zong an nuam tuk. Cu hna pawl I phe duhtawk I sau nawn te an vun cawh I an vun phawt ah cun an ran ning le an kut ai dawh ning hi chimawk tthalo khi asi. An phe cawh le an phe phawt kan zoh ko bu ah joker pa 2 asi lo hmanh ah pakhat tal hi cu an mah le anmah an Iphaw kho peng. Joker pahnih hna an vun tin ah cun (one round) voikhat kan vun hlonh ah khin an kan game lengmang ko.

2008 constitution hi uniform hring ai hruk mi pawl nih an duhtawk in (1993-2008) sau taktak an cawh an cawh I mipi sin ah an rak chuahpi mi asi. Mipi sin an vun chuahpi ah cun an nih cu joker 2 an rak iphaw diam cang. Uniform hring ai hruk mi nih an duhtawk in an ttial mi cauk cu zeitluk indah ahrin tiah cun a cauk phaw zong ahring I achung ca zong ahring mi in akhat. Cu cauk hring cu democracy phunghram pi tiah kan ti I kan Parliament zong hring dildel in a tuah I kan cozah zong hring dildel te in.

Uniform hring ai hruk mi nih zeitik poh ah game pengding in tuahmi cauk chung in cuka article kan remh lai e, khaka article kan remh lai e. Cu kan remh ah cun kha kan si lai e kan ti len mi khi sul le lam anei lo mi asi. Ahlat phih cawk lo mi zubui khur cawh bantuk asi. Uniform hring aihruk mi nih hring taktak in an ttial mi le joker 2 an mah le an mah an iphawt cia mi chung I kan vai icelh ve mi ah khin va buai tuk len ding aum lo. Kan nih phu ram kan daw deuh le nan nih phu ram nan daw lo deuh vai iti len ding zong aum lo. Cauk hring le uniform hring nih a runh lo mi, aho hmanh joker 2 mah le mah iphawt cia lo te in ai tluk ruangte in lente kan icelh khawhnak ding hi abiapi mi asi.

Atawinak cun cauk hring hi hman tlak asi lo. Diklo nak in akhat mi asi caah a hram thok in adongh tiang remh ahau mi asi. Hnawmbawm ah hlonh I cauk thar ttial ahau mi asi. Cucaah cun Chinmi nih 2008 referendum an rak tuah lio ah kan duh lo tiah kan rak ti cangmi cauk asi (hikong hi can arem tik ah ttial si te seh) . Can karlak chung I hei hmanchung mi do atla lo mi ttambal le dangcar phen cauk chiahru te lawng asi. Cu can karlak chung lawng hman dingmi democracy min an put ter mi cauk hring chung in tuah mi bawitlang kan thim tik hna ah mah le mah hma faktuk in ihmuah lo abiapi. Catialtu Salai Bawi Lian Mang.

Leave a Reply

Your email address will not be published. Required fields are marked *