Ruah Chuk Cho le Thawngpang Bultan

President Donald Trump nih US police zulh phung tharchuahnak dingah executive order cu tuchun ah a chuah. Police nih mi an tlaih tik ah anmah nunnak a hnursuan lo ahcun an or/ hrom in reh lo ding, rial lo ding in nawl a chuah. Police nih an riantuan zia an thiam deuhnak dingah tharchuah ding. Training tam deuh in tuah ding le Police pawl caah federal cozah nih a si khawh chung in phaisa bawmhnak chap ding in a chuah. Police mi tha lo tlawnte ruangah police mitha tampi fund phih ding timi cu a si kho lomi a si,” “Police lo cun buaibianak vialte kan control kho lai lo. Police cu phung a hnehter tu an si, phung lo cun rawhralnak a chuak, himnak a um lo ahcun, puicimhnak a chuakpi” tiah a chim.

$600 unemployment checks, President Trump’s economic adviser, Larry Kudlow nih rian ngei lomi caah Federal cozah nih zarhkhat ah $ 600 kan pekmi hna hi July thla in ngol dingah White House ah ceihmainak kan ngei tiah tuchun CNN he interview tuahnak ah a chim. Mah phiasa kan pekmi hna nih mi tampi cu riantuan than duhnak ngei lo in a tuah hna lai ti kan phang “ tiah a chim. $600 pin ah state cozah nih adang tein bawmhnak phaisa pek rih a si. Zarhkhat ah minung pakhat nih $ 800 renglo hmuh a si caah, micheu khat cu an thla hlawhnak in a tam deuh ti a si. US ah rian ngei lomi 40 million renglo kan um.

President Trump nih Lam le Sul Caah One Trillion, US ramchung lam le sul, hlei le 5G wireless khuate lei tiang ngah dih ding in tuahnak caah President Trump nih billion 1000 [ one trillion ] hman dingah timtuahnak a ngei. Democrats pawl nih cun billion 500 tiang lawng hman ding an duh. President Trump nih 2016 election campaign lio tein US lam le sul, airport, sizung le sianginn vialte hi third countries pawl hmanh kan tluk ti hna lo, vawleicung ram tha bikmi nih third countries hmanh kan tluk ti lomi hi a si ding a si ti lo, kan remh hrimhrim a herh” tiah a rak chim, atu hi a chim bantuk tein tuah taktak a timh than.

Tuluk Khualipi Ah Covid-19 Zawtnak A Chuak, Tuluk ram Wuhan khua I a thawkmi Covid-19 cu Tuluk cozah nih kan control khawh cang tiah an I ruah nain an khualipi Beijing ah a chuak than I, minung million 20 renglo an umnak khuapi cu zahan zan in lockdown an tuah colh hna. A zaw tharmi minung 106 an si. Beijing’s khua, Fengtai district in a thawk ti a si. Zawtnak a thawknak hmun I a ummi minung 200000 cu zawtnak chek dingah nawl an chuah cang. Covid-19 Zawt Damnak Sii An Hmuh Than: UK ram ah Oxford University hruainak in coronavirus mizaw hna caah hneksak nak an tuahmi, dexamethasone nih Covid-19 mizaw a damh hna tiah an fehter. Minung 2000 ah hneksak nak an tuah hna I, ventilators a hmangmi mizaw 40% a thimi kha 28% lawng an thi cang. Oxygen an pekmi mizaw 25% a thi tawnmi kha 20% lawng a thi cang.

Mongolia Vate Cuckoo Africa Zambia Ram Ah An Peem: British ornithologists pawl nih satellite hmang in hlathlainak an tuahmi ah Mongolia ram I a ummi, Cuckoo timi vate pawl cu khan/meng 7,500 a hlatnak Africa ram, Zambia ram ah March 20 thawk khan peem ah an zuang tiah an hmuh. Mah ti an I thialmi hi ruahsur nak hmun dawi hna sehlaw a lo tiah an chim. Ruah tamnak poah ah an rawl ei awk atam deuh caah mah ti an peem hi a si lai tiah an zumh. Vawleicung saram a peemmi vialte lak ah hlat cem a peemmi an si an ti. Cuckoo vate hi Lai holh in atheimi nih van comment chih te uh.

Tulio Laitlang Ramkhel Thlihran: November thla Kawlram pumpi thimnak ah NLD aiawh in palai a cuh dingmi hna palai pawl thimnak cu Laitlang khuapi dihlak ah an tuah dih cang, asinain fehter thai cu a si rih lo. Central ah fehter a si lai caah thlen khawhmi thiamthiam an si. Miphun a daw takmi le daw lomi, ram daw takmi le daw lomi cu mah mirang Phungtluk nih hin a kan khen bik ko rua tiah ka ruah “A politician thinks of the next election; a statement of the next generation. A politician looks for the success of his party; a statesman for that of his country.” Ramrian tuantu hna nih cun, thimnak ca tiang lawng an tuak, Asinain ramdawtu hna nih cun an techin fapar ca tiang an tuak. Ramrian tuantu hna nih cun an party teinak ca tiang lawng an tuak. Asinain ramdawtu hna nih cun an rampi teinak ca tiang in an tuak. Credit: Salai Lairam Thang.

Leave a Reply

Your email address will not be published. Required fields are marked *