Rev.Thawngling Mualhlun: JOSHUA RAM NUN CU

Joshua 11:7.. ‘Cucaah Joshua le a ralkap vialte hna nih cun Merom ti pawngah cun ‘duak’ tiah an va paoh hna i an nam colh hna’. Voikhat cu a cunglei Baibal cang hi tha tho ngai in ka rak rel. Cu lio ahcun Bawipa Thlarau nih thuk ngai in a hon ka fianter mi a um. Ka chunglei ah ai lawm i, thathawhnak thar ka hon ngei tthan. Kan thlarau ram ah a hon ka fianter ko tiah ka zumhmi cu hihi a si: Sehtan hi ‘duak’ tiah nan paoh lengmang a herh timi a si. Amen. Joshua le a ralkap hna nih Jeriko khua le Ai khua an lak khawh hrawng ah hin, an ral ngan ngaimi cu Hazor siangpahrang Jabin a si. Jabin nih amah lawng silo in siangpahrang tampi a roih hna i, Joshua le a ralkap cu an rak fuh hna. Jabin hi mi hruihruaikho, thilti kho ngai sidawh a si, siangpahrang dang tampi kha aa roih hna i, ralkapbu nganpi ah an i chuah. Joshua le Israel miphun hna cu kan hloh dih hna lai tiah an i tim.

Sihmanhsehlaw Bawipa nih khuakhannak a rak ngeih diam cang. ‘An nih kha ṭih hna hlah, zeicahtiah thaizing atu tik ah hin an dihlak in thah cia in Israel mi sinah ka pek hna lai; an rang cu an tha nan pheh hna lai i, an rangleng cu mei in nan khangh hna lai, tiah a ti’ (Joshua 11:6). Cu tik ah Joshua le a ralkap hna nih Jabin le a ralkap bu nganpi cu Merom ti kam ah DUAK tiah an va paoh hna i, an nam colh hna. Bawipa nih an ral vialte cu Israel kutchung ah a pek hna i an thah dih hna. An rang tum ṭhaṭha zong an tha an pheh piak dih hna. An hruaitu siangpahrang Jabin umnak Hazor khua zong an khangh dih. Siangpahrang dang vialte zong an hrawh dih hna.

Thlaraulei kan pale tampi nih Joshua cu a ra lai dingmi pa Jesuh hmanthlak a si tiah an kan chimh. Joshua a min sullam cu khamhtu tinak va si kaw, Jesuh min sullam zong Khamhtu tinak a si ve. Cucaah Joshua nih a ral hna cung ah a tuahmi hi Jesuh kan Bawipa nih kan ralpa Sehtan cung i a tuahmi he tahchunh tawn a sinak a si. Bawipa Jesuh nih Sehtan cu tha lo in a tei cang. Vailam ah sehtan lu cu rialchih a si cang. Joshua nih a ral hna lak i an lubik Hazor le a siangpahrang Jabin a hrawh cikcek hna bantuk in kan ral lak ah a nganbik Sehtan cu vailamtah ah a luh rialchih in hrawh a si ve cang. Haleluia!

Ule nau hawile, Joshua ram nun cu chunglei ah thoṭhan Jesuh nun a ngeih ai fiangmi an si. Cu zumtu nih cun nifa tein Sehtan kha ‘duak’ tiah an paoh zungzal. Khoika hmun paoh ah, zeitik can paoh ah Sehtan a paoh zungzal. Cu bantuk paoh khawhnak ah a hmanmi hriamnam cu hihi a si: ‘tonmi kip cung ah thangṭhatnak chim’ (1 Thesalon 5:18), a silo ah ‘haleluia’ timi a si. Amen.

Sehtan kan puṭhing, Bawipa Jesuh nih vailam ah a lu a rialchih cangmi pa hi a nungrih mi bantuk in khuazakip ah aa chok i, ahodah ka seh khawh lai tiin a vaak cuahmah. Cucaah pei Peter nih fiang tein a kan chimhnak a si cu: ‘Fimhring tein um u, ralring tein um u. Nan ral Khuachia cu seh awk kawl ah, chiandeih bang in a vaak cuahmah ko’ (1 Peter 5:8). Innkip, hmunkip a kan fuh i, a kan bih a kan ngia i, a kan tuaiter tawntu a si. A kan bawh i, a thlithup in zeitindah ka paoh khawh hna lai ti kha ai zuam lengmang. Asi nain Jesuh Khrih nun a ngei cangmi Joshua ram zumtu nih cun ‘duak’ tiah Sehtan tu kha kan paoh ve cang. Haleluia!

Voikhat cu home crusade tuahnak in inn ah ka hong ṭin i, innka hram ka phanh tiang cu crusade chung i, kan i lawmhnak, kan thathawhnak le kan cawlcanghnak lawng kha ka mitthlam ah a cuang i, ka tha a tho, ka muihmai ah panhnak in ka khat. Sihmanhsehlaw innchung ka hong luh cangka in kan mileng khan a buai, coka lei zoh ah buaicur in thil ai cawh dih. Pakan ṭawl lo ai pong. Chikkhat te cu ka ing a hong puang curmar i, ka au khuang dengmang nain, ‘duk’ tiah ka lungthin chung ah a hong fiangmi cu, hi thil hi Sehtan rapchiahmi an si ti kha a si i, ka hmurka in ka phuancolh mi cu, ‘haleluia, ka Pa na min kan thangṭhat’ ti a si. Puṭhing Sehtan nih paoh a ka timh i, rap a ka chiah nain keimah tu nih ‘duak’ tiah ka paoh diam ko ai. Amen.

Cucaah pakan ṭawllo in aa pon zong ah haleluia tiah ka au kho cang. Ṭuang le carpet cung a buai tuk zong ah haleluia tiah ka au kho cang. Inn a hnomhtuk zong ah haleluia tiah ka au kho cang.
Innchung a buaituk zong ah haleluia tiah ka au kho cang. Chungkhar ah lungtlin lo nak, lungtuainak, nuamhlo nak deuh aum zong ah haleluia ka ti khawh cang. Community le rianṭuannak hmun, buu tiang zong ah tlamtlin lo nak, lungsi lo nak a um zong ah haleluia ka ti khawh cang. Amen. Ule nau hawile, Joshua ram nun cu tonmi thilkip cung ah Bawipa thangṭhat kha a si. Cuti kan chim tik ah kan ralpa Sehtan kha ‘duak’ tiah kan paohmi he ai khat bak. Kan ralpa cu kan chung a nungmi Jesuh thawng in kan nun ah a cawl kho ti lo. Haleluia!

Joshua ram nun cu, Midang nih an kan soisel tik ah, Midang nih an kan thangchiat tik ah, Midang nih an kan mualphoh tik ah, Midang nih an kan nihsawh tik ah, Midang nih an kan hrem tik ah, Harnak nih a kan ton tik ah, Tukforhnak nih a kan ton tik ah, Vawlei nih a kan hngalhlo tik ah, Chungkhar nih an kan hngalhthiamlo tik ah, Hawikom nih an kan hngalhthiamlo tik ah, Ral hna nih an kan hngalhthiam lo tik ah, HALELUIA tiin au zungzal a si. Amen. JOSHUA RAM NUN CU SEHTAN PAOH NUN A SI. HALELUIA! Bawipa nih sunparnak co ko sehlaw, kan dihlak caah thluachuahnak kan pek piak ko seh. Amen.Khrih ah nan hawi,

Thawngling Mualhlun
CEBC Indianapolis

 

Leave a Reply

Your email address will not be published. Required fields are marked *