Rev. Dr. Aung Mang Nih Ruahllo Tuk In A Kan Thih Tak

Ruahlo tuk in Peter Ngun Za Cung nih Chinmi nih kan bochan tukmi Rev. Dr. Aung mang nih mual a kan liam tak cu kan lau tuk cio. Amah hi Chinmi nih buaknak lei he vawlei lei ah kan bochan ngaimi pakhat a si. Miphun dawtnak le zawnruahnak a ngei ngaimi a si. A Rian a tuan piakmi Pathian nih vawleicung a nunnak can a za cang ah a nunnak a dongter mi a si. Dr. Aungmang thihnak thawng in Peter Ngun Za Cung nih “Rev. Dr. Aung Mang ( Director Of Theological Education, MECA) Tuzing ah ruah lo tuk in Khrih tangnem ah na kan dinhtak ti mi thawng kan theih cu minung titsa sinak in MECA na riantuan ti hawi kan lung a tha lo tuk. Vawlei na nun lio ah Khrih nih an khinh mi rian, na lim na tuan dih cang i, Vanram ah Laksawng tampi he nuam tein nai din cang. Na tantak mi chungkhar caah thlacampiaknak he. Na riantuan ti hawi.” tiah Peter Ngun Za Cung. Director. Public Relations MECA. nih a tial.

President Donald Trump Duhnak Cu Tihnung Asi Ko Cang, America Mipi I Chawnhbarh Viar Dawh Kan Si Ko Cang Hi: US economy hi virus ruangah a tumchuk tuk cang caah, virus tawlrelnak rian hi hmaizarh asiloah zarhnolh chung tal ah tawlrel khawh i, economy thanchoter rian tu hi van i hmaithlak zokzok dingin Trump nih a chim. Asinain, khat le khat naih te in riantuanti lo dingin nawl an chuahmi hnawl dingah cun, US health officials pawl nih ralrinpeknak an chuahmi ca hi a phalh khawh hmasa a hau lai, tiah Anthony S. Fauci nih a chim. Virus a karhsomi ruang i puicimhnak nakin hnursuan a tongmi kan economy a dirhmun hi tih a nung deuh hi a si. Cucaah, kan ram chung i virus a karhlo nak bik hmun pawl ah hin cun a rauh hlan ah riantuan on ter than hna ah a tha ko lai, tiah Monday ah khan Trump nih a chim.

A rauhhlan ah riantuan on a si chom ko lai… hi hnu thla thum li hrawngah, tiin mipakhat nih a chimmi nak tuan in kan on ko lai. Zawtnak damter rian hi zawtnak nih a chuahpimi buainak nakin kan lenhter (zualhmatter) deuh awk a si lo, tiah Trump nih a chim. Khat le khat i naih lo dingin US health officials pawl nih ralrinpeknak bia an chimmi hi na pah chih ne kun lai maw? tiin Trump cu an hal. “Hi kong hi doctor pawl kut lawngah chiah siseh law cu, annih tham nih cun vawleipi hmanh hi phih top an duh ko lai cu ta” tiin a leh hna. Biachahnak kan tuah hlan ah Fauci le a dang public health officials pawl an fimcheuhnak hi a zoh hmasa ta te ko lai, tiah a chim. Zawtnak rai a karhmi khamh, hnumter dingah ni 15 chung caan White House nih a rak tuk cang caah, cu caan an tukmi cu March 30 khin a dih ding a si. Cu hnu lawngah cun biachahnak hi ka tuah te lai, tiah a ti. Kan economy a tlakmi hmual hi zawtnak nih a chuahpi mi hmual nakin a fakdeuh ding a si. Hi zawtnak hi cu mawtaw accident bantuk ah ruah ding a si. Mawtaw accident in a thimi an um ruangah mivialte kha mawtaw mongh thloh ding an si lo, tiah President nih a chim.

A caan a tlin hlan rumro i, khat le khat i naih lo dingin ralrinpekmi van buar, pah chih cu virus kan tawlrelnak rian pei a hnursuan tuk lai cu. Cun, sizung i kan i tawlrel ning le cang zong a vaivonh dih lai, tiah coronavirus kongah President Trump nih member ah a hmanmi, National Institute of Allergy and Infectious Disease ah director a si mi Fauci le a dang public health officials pawl nih an chim. US ah hin minung 40,000 remglo hi zawtnak ngei an si cang. A karh lei lawng panh an si ko rih caah, US chung sizung inn le lo hi a khat in an khat te lai. Asinain, economy cu a pelpawi tete talin on than ah a tha ko lai, tiah biasu a ummi cu Senate le House ah a ummi Republican lawmakers nih an cohlan ngai. Asinain, rawldawr, dawr le mitam an i butnak lentecelhnak hmun pawl hna belte cu on rih lo ah a tha lai, tiah Steven Moore le Art Laffer nih White House cu bia an ronh ve hna. Wall Street le conservative media pawl zong nih cu ruahnak cu an i tlaih ve mi a si.

Amah a duhnak ko ah cun Trump nih hin chim a cheutu, GOP senators le a dang a hawi le pawl an bia hi lak ai tim lo. 2020 i ai thim tikah, riantlai lo miluzat a karhtuk lai, ti a phan caah, business hruaitu pawl cu heh tiah phone in a chonh cang hna. Stock market a tlakmi kongah a lung ai tuaitam peng i, summer tiang tal cu hi virus hi a cambual kho mi a si, tiin an chimmi bia hi a cohlan a duh kho hrimhrim lo. US economy cuhlan bantuktein umter than i, riantuantu pawl an rian hun tlaihter than hi hnawh kan hau taktak ko, tiah White House economic team sinah bia a chimmi mipical pathum lakah hin Moore zong cu ai tel ve.

“Zawtnak kan thlopnak nakin zawtnak ruang i a chuakmi buainak hi kan nganter deuh awk a si lo. Tukmi ni 15 a dih bakin, zulh kan duhmi lam zul kho dingin biachahnak kan tuah colh ve ko lai,” tiah Trump nih a chim. Trump biachimmi hi nang zeitin na ruah, tiah House Speaker Nancy Pelosi cu an hal tikah, “Buaibainak tawlrel thiamlo bia a si” tiin a leh hna. President nih tuanvo a la lai lo. Anih hi cu ning le cangtein tawlrelmi thil pawl a vaivonhtu memem a si. State governors pawl nih anmah le tuanvo an lak cio caah le Trump cozah chungum a cheukhat pawl zong an lubik sinah biatak an chim caah Pathian ka thangthat, tiah Nancy nih a chim.

Cu bantuk i economy lei hna vun chit colh dingin Trump nih tilam a merhmi kongah a cheukhat Republicans pawl zong an hna a tla ruam lo. Thil pakhat khat zohkhenh le domhtlaih (control) hau a si lio caan i lamhleng hun sial diam cu ai palh cikcek. Dr. Fauci he zong kan i chawm cang. Hi thil ruang i thil pakhat khat a tlun sual ah cun kan zoh sawh lai lo. Kan sizung ah mizaw a khah in an khah ko lio ah hin zeiti cun dah economy cu thanchoter a si khawh lai. Cu bu cun mipi hi riantuan an i thawh lai lo, tiah Trump he naihniamtein rian a tuanmi Sen. Lindsey O. Graham nih a chim. Economy on than dingin baisu a ummi kongah cozah lutlai pawl an lung ai tuai ngai hna. Cozah nih ai tinhmi cu, zapi nih ciitmi tlanglong, bus pawl hrial kho dirhmun ah a ummi rian (business), asiloah virus nih a tlunh theng lo nak hmun i business pawl hi on than awk an si ko, ti hi a si. US economy hi a lam cungah tli kho zau sehlaw a tha, tiin a duhbiktu ah hin National Economic Council Director Larry Kudlow, Treasury Secretary Steven Mnuchin, le the Office of Management and Budget i officials pawl hi an si hna.

Kan President hi a hman. Zawtnak thlopnak rian hi a zawtnak nakin kan zualhmatter deuh awk a si lo. Cucaah, ngamh ngaiin lam kan sial a hau ko cang, tiah Kudlow nih a Fox News ah a chim. A tutan hi rian on thannak kongah, kum 40 in a tanglei a ngan a dammi paoh hi riantuan onh hmasa i, nehhnu ah kum 40 in 50 minung pawl hi thlah te ding, ti a si. Kan economy hi zeithluk a tum ko hmanh ah, hi zawtnak a um chung paoh cu a mikip in inn tang te ah i benh peng ding a si, tiah health lei nih an chim. Hi zawtnak hi, hihnu zarh 10 hrawng a cambual rih ah cun, kan economy hi khamh awk tha hmanh ah ai tuah ti lai lo. Kei ka hmuh ve ningah cun, economy chanh dingin White House nih karhlan thok chom ai timhmi hi thil tha a si, tiah ka ruah ko, tiah Moore nih a chim.

Hi kongah, public health an tuanvo a ngeimi pawl zeiah kan rello a si hrimhrim lo. Nan biapituk ko hna. Dollar trillion tampi a va dih ko zongah minung nunnak hi khamh khawh kan i zuam hmasa lai, tiin phung (policy) ser khawhnak nawl nan ngei lo, tiin Moore nih a ti ve hna. Mipi khat le khat i naih lo dingin health officials pawl nih an chim cang ko nain, a karlak ah thil sining zoh in thlennawn chom ding tete cu a um ko, tiah an chim. Economy pi hi a ningpi in nan phih dih i, inn le lo pawl nan khar dih a si ah cun, cu ko nih cun minung ngandamnak hi a chiatchuah te dingmi a si. I ruahlo piin thil tihnung a cang te lai, abikin hmunhma a herh ko nain ai kawl kho lo mi ca ko ah hin a si te lai. A thabik nan tuah khawhmi kha tuah ko u, tiah Fauci nih a chim.

Trump nih cun an tukmi ni 15 hi ai hmaithlak ko nain, health experts pawl belte nih cun zawtnak karhsomi khamnak dingah caan ai za in an hmu kho rih lo. Mizawt an karh chinchin caah, sizung ah a herhmi thil le ri, si le ai kan i za hrimhrim ti lo, tiah sibawi pawl an au cang. Virus nih karh lei a panh. A zualhmabik dirhmun hman a phan rih lo. Asinain, virus a karhsonak kongah le minung nunnak zeizat dah a lak te lai, timi kongah cozah lei nih zeihmanh chimchung khawhmi an ngei lo. Cun ai zatawkin hmunhma, ihkhun le thil le ri an i ngeih kho rih fawn lo.

Mipi khat le khat i hlat dingin an chimmi pah an timhmi kongah public health officials pawl an lungre a thei ngaingai. Zawtnak kongah zulhdingmi nawl an chuahmi paoh hi cu zulh dih ah a tha bik ko, tiah the Harvard T.H. Chan School of Public Health saysa a tuan i, Harvard’s Center for Communicable Disease Dynamics ah director a si mi Marc Lipsitch nih a chim. Virus a karhsonak hi tumchuk lei a panh naisai rih lo dawkaw. A karhlei pei a panh cutmat ko hi. Cucaah, virus chonh khawhnak lam a si mi paoh cu phih vir ding a si ko. Pahchih ding hrimhrim a si rih lo. Cu bangin kan tuah lo sual ah cun, kan ram pumpi cuul in dawkaw ngandamnak kongah vava kan tum ko lai cu. Hi ka chimmi hi zawtnak kong fiangtein a theitu sinin ka theihmi a si, tiah Lipsitch nih a chim.

Asinain, khatlei kap in business lei i hruaitu nganngan le conservative media pawl nih economy a dirhmun kongah Trump cu heh tiah an turh ve. Hi ti ning te a si ko ah cun, rian lo dirhmun hi 30% a tla vurmar chom lai hi aw, tiah Federal Reserve Bank of St. Louis ah president a si mi James Bullard nih ralrinpeknak bia chim ve fawn. Trump ai thimnak ding ca i an i bochanmi stock market pawl zong vava an tum ko cang. “Coronavirus Perspective” tiin Hoover Institution ah rian a tuanmi Richard A. Epstein nih a tialmi kong cu Trump minung le a cozah officials tampi nih biataktein an hun ruah cang.

Health pawl nih pulrai an tawlrel ruang i economy a chiatchuahmi hun mersan than dingin a cheukhat Wall Street minthang pawl zong an au lulh ve cang. Zawtnak thlop duh ruang i economy pi hun hnursuan hi chikkhat caan chung caah cun a poituk lem lo e. Asinain, enonomy, rian le minung an lungthin hun zawtter le den zong hi pei ngandamnak hnursuan a si ve thiamthiam ko cu. Cucaah, zawtnak nih a tlaktuk lo mi hna paoh cu rian ah hun lut chom hna sehlaw a thabik ko, tiah Godlman Sachs ah chief executive a si balmi Lloyd Blankfein nih a chim.Credit: Chelsea Bawi

 

Leave a Reply

Your email address will not be published. Required fields are marked *