Peeknak Kongah Jesuh Nih Zeitin Dah a Kan Cawn Piak?

Jesuh nih a nun lio ah a rem lo taktak mi mibu pakhat an rak um i, cu mibuu hna cu an min ah pharasi phu ti an rak si. Jisuh nih a rak rem hna lonak a ruang cu, an sual tuk ruang le peeknak an rak tanh lo ruangah siloin, lenglang nun an rak uar tuk ruang tu ah a rak si deuh. An nih an rak uarphun cu mipi sin in cawnglawmhnak, upatnak le thangthatnak hmuh tibantuk pawl khi a rak si. Pathian sinah cu zat cu ka pek, kha zat cu ka pek ti in mipi sinah chim le porhlaw ngai in i cawngia an rak hmang tuk.

Cu ruang ahcun pekchanhnak ah an rak i zuam kho tuk i, an ngeihmi lak ah a hme bikmi naannaan le khamhmui tiang in biakinn ah an rak peek. Peeknak pohpoh nihhin Pathian lung a lawmh ter rua tiah an rak ruah. Sihmanhsehlaw, pekmi nak in petu thinlung a zoh deuh tu Jesuh nih an lungthin le an peknak cu a hmuh tikah a luak a chuak, a fih tuk hringhran. “Nan orh-lei kut nih a tuahmi kha nan kehlei-kut hmanh nan theih ter awk a si tung lo” Matt 6:3 tiah a rak ti hna.

Cun a peh rih mi cu, “Nan pek tikah midepde hna nih an tuah bantukin mipi theih in thawng va thanh hlah uh,” Matt 6:2 tiah a ti than. “Thil tha nan tuah tikah mipi nih ka hmuh hnaseh ti phun in nan umnak hnga lo va i ralring uh, cu ti nan tuah ahcun, Pathian sin in laksawng zeihmanh nan hmu lai lo” Mat 6:1 tiah a ti than. Cucaahcun, U le Nau hna Pathian sinah amah thlauchuah cia mi chungin kan sian tawk kan pek than tik ah kan lungput a hman maw? zei bantuk lungput he dah kan pek? Pathian nih sunparnak co loin keimah nih ka co dih sual lai maw? ti ruat bu tein peekchanh i zuam peng ko hna usih.

Kan nih lai mi cu thil tha hme te kan tuah tikah tam piin i porhlawt kan hmang, Cheuhra tam deuh pek khawh poh ah Khrihfa buu uk kan i tim, Cheuhra pek tikah a thli te pek kan lung a tling kho lo, kan min theng mang te tial kan duh. Mipi hmai ah mithmai tha hmuh le thangthat mi si cu kan duh tuk. Hi ruang ah hin kan pekchanhnak nih voi tampi cu kan Pathian a lawmh ter kho lo.

Credit: Tha Ceu Lian

Leave a Reply

Your email address will not be published. Required fields are marked *