Pathian Riantuanmi Nih Ram Thanchonak Ramkhel Rian Le Taksa Lei A Herhmi Ah Kan I Tel DIng A Si Maw?

Pakhatnak: Adam cu Pathian nih a sermi saram vialte minsak tu dingah a hman. Thlarau lei rianttuan ding zong a fial bantukin amah le a fale hna nih an umnak ding asimi Eden dum zohkhenh hi a fial chih. Gen. 2: 15 ahcun thingthei an ei hlan te khan Eden dum thlawh le zohkhenh hi Pathian nih Adam kha a fial cang. Pahnihnak: Moses cu Pathian nih Israel mi hna thlrau rawl pe ding lawngah a hmang lo ti kan theih. Sal chungin an luat khawh nakhnga Pharoah sin ah biachimtu ding ah a hman ve. Cun Israel mi hna nih ram nuam ah an um khawh nakhnga ramcar chung ah kum 40 chung Israel mi hna lam a hruai hna ti kan theih fawn. Cucaah Moses cu Israel mi hna thlarau lei he taksa lei he hruaitu asi.

Pathumnak: Pathian nih a hman ngai mi Joshua cu Israel mi hna kha thlarau rawl lawng a pe hna lo. A taksa, a nunnak caah ral a si mi miphun vialte kha do tu ding ah Pathian nih a hman ti kan theih fawn. Joshua nih thlarau lei he taksa lei he ral a doh caah Kanan ram cu Israel ram ah ai cang ti kan theih. Palinak: David cu thlarau lei ah hruaitu asi bantukin taksa lei zongah Israel mi hna an ral hna chungin an himnak hnga caah ral a do lengmang mi siangpahrang asi. Panganak: Solomon cu thlarau lei hruitu asi bantukin taksa lei ah deihnak in ram a hruaitu asi ve. Paruknak: Nehemiah cu thlarau lei ah Ezera he reform an tuah pin ah Israel mi hna an ram ah a kir pi tu hna le Jeruslam sak hram a awt pitu hna asi faw.

Pasarihnak: Zisuh cu thlarau nunnak rawl petu asi bantukin taksa rawltam mi hna rawl petu, taksa ngan a dam lo mi hna damnak a petu le taksa in a thi mi hna nunnak petu asi. Pariatnak: Paul cu thlarau leiah hruaitu asi bantukin Jeruslem i zumtu pawl, mangttam nih a den mi hna a bawmtu asi.
Cucaah Pathian rianttuantu hna i kan rian hi Baibalca chung i a um mi thawngttha chim lawng hi asilo ti hi kan theih a hau. Chan nih a rawk cang mi kan nunphung, cozah tthalo nih a rawk cangmi kan nunning, le sifahnak nih a rawk cang mi kan khuaram, Pathian nih kan techin-fapar tiang caah a kan pek mi kan ram zohkhenh le siamremh hi Pathian nih a mithiang mi hna a kan pek mi rian sunglawi asi ve ti hi kan theih a hau.

Khrihfa riantuantu ttha hna nihhin kan ram kan dawt chih a hau. Kan ram kan remh a hau. Asinain kan nih Laimi thawngtthachimtu tampi cu Baibal in kan i thawh le Baibal ah kan dong. Baibal pin hin zeidang chim ding kan theih lo lawng siloin, a chim mi zong kan doh hna. Laimi nih kan ngeih mi buainak hi Baibal kong buainak zong ai tel ve bantukin taksa lei buainak zong ai tel ve ti hi kan lung a pian a hau. Taksa lei tthanchonak kong chim a hua mi Pathian thawngtthachimtu hna cu kap-khat lei lawng a kal mi an si. Kap-khat lei lawng a kal mi cu, lung-khat lawng in a kal mi tinak asi. Pathian rianttuantu tling nihcun na thlarau ca le na taksa caah thluachuah an phawrh lai. Kan ram hi thawngtthabia in sersiam a herh bantukin politic le economy in sersiam a herh ve. Catialtu Dr. Aung Myint Thang.

Leave a Reply

Your email address will not be published. Required fields are marked *