Pastor Hram Bik Lian Nih Rak Kir Thang Tiah A Tialmi Ca Hi Rak Rel Ve.

Rak kir tthan! A.D 1954 ah Albert Einstein nih “Pathian a zumh hrimhrim lo nak kong” a rak tial. Kan theih dih bantuk in, Albert Einstein cu minung tuanbia ah scientist minthang bik a si. Thil a tuaktan khawh ruang le a fimthiamnak ruang ah, Pathian a ttih kho lo, a hmai zong a zah kho lo i ‘Pathian cu keimah tluk hlei a si lai lo’ ti phun in a rak um. Hi bantuk lungput a ngeimi hi, nihin vawlei zongah tampi kan um; nangmah zong na si kho ve! Thil kan ti khawh ruang, kan rum ruang le kan thiam ruang ah, “Pathian hi zei huaha si lo, a fim ve lem lo hih etc.” hei ti bantuk khin kan um hnawh, zeite ah kan rel tawn lo!Sihmanhsehlaw Pathian nih a sermi vawlei minung fimthiamnak nih, a tei khawh lo zia kha tu kan chan zong ahhin a langhter peng ko rih; hmuh timh ahcun hmuh khawh peng a si!

2018 chung i vawlei cung company vialte lakah, a miak tam bik a hmumi cu Saudi Arabia ram hrambunh “Saudi Aramco company” a rak si; $111 billion bak a miak! An nih hi, zinaan (Oil) zuarmi company a si. A hun changtu a miak bik pathum hna cu: 1. Apple Comapany ($60 billion), 2. Exxon MobilCorp company ($21 billion), 3. Amazon company ($10 billion) hna an si. Hi company pathum hna hi atu chan ah a lar taktakmi minung fimthiamnak technology cherhchan in sipuazi a tuahmi an si. Phun dang in kan chim ahcun, “minung fimthiamnak theipar zuarmi company an si.

Vawlei fimthiamnak theipar zuartu company tha bik pathum nih kum khat chung an miakmi dihlak fonh ah $91 billion lawng a si. Sihmanhsehlaw direct Pathian kutchuak zinaan (Oil) zuartu company nih kum khat ah a miak a hmuhmi cu $111 billion bak a si. Minung fimthiamnak theipar cu, direct Pathian kutchuak he cun tahchunh awk a tlak rih lo, timi fiang tein a lang. Hi report a chuah kaa ah, mi thiamsang Dr. Thomas Wrobel nih “nihin ah vawlei pumpi a khat dih cangmi le a sang bik cang rua, tiah kan ruahmi technology nih Pathian thil ser an tei kho rih lo” tiah a ti:

Na rumnak ruangah Pathian na hlam ti lo ahcun, na tlau cang tinak si; rak kir than! Na fimthiamnak tuk ruangah, Pathian naa bochan khawh ti lo ahcun, na tlau cang, tinak a si; rak kir than! Na nunzia a tthatnak tuk ruangah, Pathian na upat khawh ti lo ahcun, na tlau cang, tinak a si; rak kir than! Kaa lawm. Credit: Pastor Hram Bik Lian

 

Leave a Reply

Your email address will not be published. Required fields are marked *