NIHIN PATHIAN BIA RUAH AWK

Tulio kan vawlei cul in kan tonmi pulrai (Covid-19) lio ahhin Pathian fale hna nih zeitindah kan um awk a si timi hi a biapi ngaingai ko. Hruaitu tampi zong nih a lamkip in an kan chimh, an kan cawnpiak i an thatuk hringhran. Nihin ah a tanglei thil pali hi zumtu Pathian fale hna nih ruat ve usihlaw ti ka duh ko. 1. TTIH LO TEIN, LUNGDAI TEIN KAN UM AWK A SI. Zeiruangah tiah cun kannih zumtu Pathian fale cu tulio pulrai hi vawlei teitu Bawi, Jesuh Khrih he kan ton caah a si. Khrih he kan tonnak hmelchunh pakhat cu tihlo te le lungdai tein kan um mi ahhin a lang ko lai. A bianing tein kan i lak tik ahhin a sunglawi khun: “Nannih nih keimah he nan I pehnak thawng in lungdaihnak nan hmuhnak hnga hihi kan chimh hna. Vawlei nih hin harnak an pek hna lai, sihmanhsehlaw ttih hlah u. Vawlei cu ka tei cang, tiah a ti” (Johan 16:33). Amen.

2. FIMHRING TE LE RALRING TE TU IN KAN UM FAWN LAI. Sehtan kan putthing nih aa timh pengmi cu zeithil kip cung in minung hna nih Pathian an hngalh khawhlo ding hi a si. A hngal rihlo mi nih an hngalh thai tinak hnga lo, a hngal cia mi Pathian fale nih ruru hranghran in, daithlang thlorh in khua an saknak hnga hi aa timhpeng mi thil pakhat cu a si.

Bawipa Jesuh hmanh kha a zalchung sanh ding in khua a rak khanpi khah (Mt 4 relchap), nangle kei chinchin hi cu a lamkip in rap a chiah peng ko lai. Zumtu pei nan si cu, nan duhpaoh in tlongleng u, uktu le nawlngeitu biachuah zong zulh a hauh ttung lo, nan Bawipa nih pei kan umpi hna lai a ti ko kha, tbk hi a bia a si. Tihlo le lungdai tein um hi thathut le daithlan he aa khatmi an si lo tihi kan fian a herh. Cucaah Pathian fale hna, hitin Pathian bia nih ralrinnak a kan pek: “Fimhring tein um u, ralring tein um u! Nan ral Khuachia cu seh awk kawl ah, chiandeih bangin a vak cuahmah ko” (1 Peter 5:8). Amen.

3. THLARAU TLAU TLAIHNAK LE THLARAULEI I THARCHUAHNAK CAAN AH KAN HMAN LAI.
Inn chung erh a hong si tik ah Pathian fale hna caah thazang thar laknak caan ah a hong cang. Pathian he tam deuh in i chawnh caan, a bia tam deuh in relnak caan, a dawtnak tamdeuh in ruahnak caantha a kan pek. Nule va karlak, nulepa le fale karlak, chungkhar karlak ah elhnialnak le sikvelhnak a zor ngaingai lio caan a si. Dawtnak tein khuaruah tti caantha a kan pek. Cuti te cun hi lio caan hi thlaraulei tharchuahnak caantha ah kan hman ve lai. Tharchuahnak nih a hrin pengmi cu thlarau tlau zawnruahnak kha a si zungzal. Kai tharchuah bak ko kan ti ttung i thlarau tlau zawnruahnak kan hrin pah lengmang ttunglo ahcun kan i tharchuahnak kha kan review than lengmang a herh fawn.

Tulio Italy ram ah Pathian biatak a pemhmi sibawi Dr. Julian Urban kong hi rak rel te hmanh. A tulio rai nih a zawt termi pastor pa, kum 75 mizaw pa nih tehte a khannak in dahkaw aa thlen cu. Pathian a umlo a ti bakmi sibawi minthang pa nih Pathian a hon co thanmi cu a thi cuahmah mi pastor pa (tlawmpal ah a thi) tehte khannak kha Pathian nih thluachuah a pek caah a si. Cucaah Pathian fale hna, kan innchungkhar ah siseh, kan pawngkam ah siseh, tharchuah caan le thlarau tlau zawnruahnak caantha kan hman a herh lio caan a si.

Pathian bia nih a fianter ngaingai ko hih: “Thlitu le nikhua an tthat tiang na ngan peng ko ahcun, thlaici zeihmanh na tuh bal lai lo I zeihmanh na zun bal pek fawn lai lo. ..Zinglei ah thlaici tuh ko, zanlei zong ah ngol hlah..” (Phungchimtu 11:4,6a). Amen. “Sihmanhsehlaw lo khi tha tein hei zoh hna hmanh u; rawl cu an hmin dih cang I ttuan an cu diam cang”(Johan 4:35). Amen. “Ruahchannak nan ngeihmi kong kha, kan chim tuah u, an timi hna an um ahcun, zeitik caan paoh I chim kho ding in timhcia tein um zungzal u” (1 Peter 3:15b). Amen.

4. PATHIAN SIN AH THANGTHAT SUNPARNAK PEK THIAM CAAN A SI.
Kan tonmi thilkip cung in Pathian sin ah thangthatnak chim KAN CAWN CAAN a si. Zeizong te a hngaltu, a theitu, a kan umhnawhtu a si caah thangthat sunparnak kan pek hrimhrim ding a si. Miphun kip nih Pathian a si kha an hngalh khawhnak ding caantha a si.

“Nan tonmi kip ah thangthatnak chim u. Khrih chung I nan nunning ah Pathian duhmi a si” (1 Thesalon 5:18 NKJV). Amen. “..zei nan tuah hmanh ah, nan ei ah siseh, nan din ah siseh, nan tuahmi cu a dihlak in Pathian thangthatnak caah si ko seh” (1 Korin 10:31) Amen. “..cuticun thiltha nan tuahmi kha an hmuh lai i vancung nan Pa kha an thangthat lai” (Mt.5:16b). Amen. Bawipa nih a Thiang Thlarau in kan kilveng sehlaw a bia cu a sunparnak caah kan fianter zungzal ko seh. Amen.

Khrih ah nan hawi,

Thawngling Mualhlun
CEBC Indianapolis
April 4, 2020

Leave a Reply

Your email address will not be published. Required fields are marked *