Nangmah Ve Lo Bang Dinnak Ah Fehte In Na Dir Ngam Lo Tiah Aung La Nsang Cu An Phomh Cang

Myanmar ram in World Champpion kan neihmi Aung La NSang Cu vawleicung mipi nih theihmi le minthang a si cang in kawlram mi chinchin nihcun duh ngai mi le uar ngaimi a si. asinain October 28 ah Rohingya timi biafang a hman ruangah kawl pawl thin a phawh hna I comment ah an phomh len. Mah a tial tlawmpal ah Rohingya timi biafang cu Myanmar pa tiah a let than. Tuban tuk in Rohingya pa a ton hi Japan ah One Championship taisawm a hmuh hnu ah US ah a ker than, A Kut surgery tuah dingin Chicago airport a kal ah South Dakota pan ding a si. Chicago airpoet kam ahcun rawlrawr pakhat ah a lut I Rohingya pa he an I tong. Mah kong cu Aung La Nsang nih a facebook ah a tial.

Aung la Nsang nih Rohingya biafang a hmanmi cu soiselnak fakpi in an tuah, Myanmar ah Rohingya an um lo, zeiruang ah Rohingya biafang nah man, Benggali si lo Bangladesh leimi an si lai. Myanmar ah Rohingya timi an um loh, Myanmar mi zong nih kan cohlang hna lo, mah bantuk biafang hmang ding na si lo. Rohingya biafang na hmang, Iralring tiah an phomh cawlh.

Aung La Nih “ tuzing cu Chicago airport ah ka um I ka kut surgery tuah ding ah south Dakota pan ding ka si. Airport kamah Rawldawr ah ka lut I rawl a rak ka petu cu Myanmar in Rohingya pa a si. Amah nihcun a hawi le pawl hi keimah an ka tanhnak le keimah ruangah an aukhuan ning kong a chim, amah ka ton khawh cu ka lawm tuk, hmai lei ah lunglawmnak le hlawhtlinnak hmu ko seh tiah saduhthah ka hlan” tiah a chim.

Mah ti comment an pekmi cu Aung La Nsang cu a lungtha than lo in Rohingya tiah a hman mi biafang a hloh than, mah kong cu Rohingya an tuar tuk ve I “ Aung La bak nih mipi tih ruangah dinnak biapi chia lo in a ca a thlen than, na dirnak ah a dir ringring mi na si nain Aung La zeiruang ah na ca na remh, fekte in dir ca” tiah an rak phomh ve.  Myanmar ram chung ah Rohingya buainak a fahtuk caah Kawl Midia zong nih Rohingya ti biafang an hmang ngam lo. ca dang re ding a um rih

SHOPPING MALL vs MIPHUN:Halkha khuathar Ralhmung Certual/Cerhmun i Shopping Mall sak an timhmi kong Sipin chairman hlun Pu Thla Hre nih fiang ko in a ruahnak a chim ve i kai lawm ngai. Chim caan a si. Sak dih hnu i cu e kha e a ti te ding mi upa an tor rih lai nain a tawlrel tu upa pawl hmaikhah lo le party ṭanhnak lungthin ruang ah puan lu an i khuhter rih hna i si lai.

Halkha khuathar sianginn le Ralhmung Cerhmun kam i Shopping Mall sak timhmi kong hi Khuathar khuabawi/upa pawl le Sipin/cozah lutlai pawl khuakhannak men lawng in tuah ding a si lo. Kan miphun dihlak aw-an le duh ning zoh chih hrimhrim ding a herhmi a si. Shopping Mall hna hi cu cozah nih a buaipi tuk dingmi rian zong a si lo. Company le business owners Association tbt. nih an tuah dingmi thil a si. Cun, zatlang/public ram; sianginn le cozah ram/hmun chung hrimhrim ah sak/tuah dingmi thil a si fawn lo.

Halkha cu kan Chinram khualipi a si bantuk in Chin miphun dihlak kan i hrawm dingmi khualipi a si. Cucaah, atu hnu kum 100 tiang i Chinmi dihlak khua kan sak, kan tlonlen le kan cawlcanghnak ding hmun rem si ding in khuakhan cia a herh. Nawl kan ngeih lio a si ai pet ti in hmailei kan khualipi ṭhanchonak a dawntu ding thil hi kan tuahter hrimhrim hna ding a si lo. Khua leng deuh hmun kaumi ah zalong taktak in sak khawhnak hmun tu kan kawlpiak/tuaktanpiak ko hna seh. Kan u/pa Jesse pa (Vice President Henry Van Thio) hrimhrim nih kan thlauhpiak hna seh law ti ka duh. An sak taktak sual ahcun, tuanbia chia ah a min hna an telh ve sual lai.

Shopping Mall sak hi kan doh hrimhrim lo. Kan i lawm tuk cio. A kan tawlrelpiaktu kan pale cung ah kan i lawm tuk. Upatnak kan pek hna. Nain, hmun dang tu ah kan sakpiak sawh hna seh ti kan duh deuh bia cio tu a si. Pumpak or party ṭanh/doh ruang ah pakhat hmanh a si lo ti zong kan theihpiak thiam hna seh. Kan khuapi zawn kan ruah tuk cio caah a si. #khuapizawnruat

Leave a Reply

Your email address will not be published. Required fields are marked *