Midang Nun Na Tah Hlan Ah Nangmah Nun I Tah Hmasat

Laimi Khrihfa zumtu cu miphun dang Khrihfa zumtu he kan idang ngaingai tiah ka ruah. Zumhnak, dinfelnak, tuahserhnak tbk, ah kan ithlau ngaingai hna. Ahleiin midang thazaang peek chinchin cu atluk te kan tluk hna lo. Laimi Khrihfa zumtu bangin soisel an hmang ve lo. Kannih Laimi cu, Khrihfa chungkhar in a chuakmi le a ṭhang lianmi kan si ti usihlaw kan palh men lai lo dah. Hlanchan kan pipu hna an zumhnak le biaknak zoh tikah, thing le lung a biami an rak si hna. Takkholhnak sapiat hmanh cangreu a ruat i ei a timhmi kan rak si hna. Kan ram ah mirang Carson Siangbawinu le Siangbawipa an rak phak hnu ceo ah a nung Pathian a zummi kan rak si (a tawinak in). Nihin Laimi khrihfa zumtu hna nih, kanmah le kanmah tahfung kan hman ttheo tawnmi cu zeidah a si kan ti ah cun, pianthar or hrintthan timi tahfung in midang nun kan tah tawn hna. Kei ka zumhnak hi kan can dah a si tiin pakhat le pakhat von ihal taktak tuah usihlaw, zu le sa he ai ciah cuahmahmi minu or mipa hmanh nih kei ka zumhnak cu a fek, ka hrinṭhan (piangthar) ko an ti ve ṭheo lai. A fawinak in chim ah cun, keimah tawkin kai za ve si timi lungput a ngeimi kan si.

Anih cu, zu le sa he aiciah peng le a thih tikah, Vanram cu a kai lo hrimhrim lai. Faak deuh in kan chim a si ah cun, Hell hmanh ah a tawne ah a tla lai tiin mah nun hmanh itah hmasat loin midang a nun tahmi khrihfa zumtu ka si ve ko ai timi miphun kan si. Cucu pheh awk ṭhalo a si. Hrinṭhan ṭung loin a biakinn kal huam le thlacam huam khi khazeimaw a fel bik le a piangthar bik bangin t’ah midang na tahchunnak tawn si lo maw? Zeitluk in dah Pathian he an ipehtlaih ti na thei khawh ṭung lo. Pumh hau lo, online in thawngṭha chim thiam an tamtuk na hei ti maw? Online thawngṭha chimmi ngaih le biakinn (pumhnak) i thawngṭha chim ngaih cu aidang deuh hrimhrim. A nun na tah lengmang mi mino or mipa nih Pathian he zei bantuk zumhnak le pehtlaihnak dah a ngeih ti na theih khawh ṭung lo. Vanram ah a kai le kai lai lo zong na theih ṭung lo.

Vawlei cungah a tlamtlingmi hodah um? Biakinn chung i kan um Pathian kan thangṭhat ko bu zongah sual ah kan tlu kho i sualnak phunkip kan tuah kho ti philh hlah! Cun, tlamtlin lonak vawlei ah kan um ti thei. Hi vawlei cung i a ummi na hawinu hawipa nunnak kha a hrinṭhan le hrinṭhanlo tahfung ah hman itim hlah! Khrihfa upa or Pastor te nun na tah hlanah nangmah bantuk minungte an si ve ko timi kha hngal zungzal law, an nun na tah ngam hna lai lo. Mawhchiat awk tlak tiangin an um caan zong cu a um ve ko lai teh. Minung lungputte an pu ve ko. Khrihfa upa or Pastor an si ruangah an tlamtlin awk a si ti na ruah sual ahcun nangmahtu kha naa palh cang.

Pathian fapa Jesuh Khrih hmanh kha hi vawlei a rak um lioah soisel le thangchiat a tong khah. Minung tahfung in kan zoh i kan tah ahcun atlamtling lo kan ti khawh lai. Midang nun zohchih in Vanram kai le kai lai lo kongah biachahnak tuah hlah. Na zumhmi i fiang law, nangmah nun iremh hmasat. Na tlamtlin lonak naa hmuh cun midang nun na tah ngam hna lai lo. Na theih awk ah ka duhmi cu midang nun tah in caan na hman le midang tahfung in na tahchung hna paoh cu Vanram he kai hlat deuhdeuh titu i thei. Midang tahfung na hmanmi kha thihnak a si ahcun, cu ve bantukin nang zong tah na si ve lai. Midang na tahnak fung khan nangmah tah na si ve lai. Cucu keimah bia si lo, Baibal hrimhrim nih a kan cawnpiakmi a si.

Midang zumhnak ah buai loin nangmah zumhnaktu ah khan buai deuh. Zeitluk in dah Pathian he kan ipehtlaih titu ruat deuh. Midang nun na tahchung paoh cu anmah bantuk na si ve ti philh hlah! Nangmah bantukin an um lo ruangah an nun tah (biaceih) hna hlah! Nangmah le Pathian nan ipehtlaihnak tu ah buai deuh cang. A tawinak tein ka ṭial. Cathluan saupi cu rel ahar deuh caah a tawinak ka rak ṭial a tlamtling lomi tampi lai. Salai Van

Leave a Reply

Your email address will not be published. Required fields are marked *