LUNGTHIN THIANGMI NIH PATHIAN AN HMUH

Phungtlungbia 27:19 – “Ti chungah hmai cu, hmai in alanghter bantuk khan, Minung cu alungthin nih khan zeibantuk mi dah asi kha alanghter.” Minung kan sining hi, khoikaa dah a um ti ahcun, kan thinlung in hmuh khawh asi. Zeicatiah Pathian he kan pehtlaihnak cu kan thinlung in asi caah hngalh khawh asi. Eph 3:14 – zumhnak thawngin Khrih cu nan lungthin chungah khua asak nak hnga” thlacam in ka kun tawn” tiah ati.

Jesuh khrih cu kan thinlungah khua asak cang caah, Pathian he ihawikomhnak le pehtlaihnak kan ngei. Kan lungput athat lo ahcun, zeitlukin thla kan cam zongah Thiang Thlarau nih rian atuan kho lo. Cucaah kan thinlung ah nawlngaih lonak thlaici tuh ti hlah usih. Mathai 5 chungah “lungthin athiangmi cu lunglawmmi nan va si dah, Pathian kha nan hmuh lai” tiah ati. Asinain zeitindah kan thinlung hi athiang khawh hnga? John 15 chungah “ka bia nan theihnak thawngin nan thiang cang” tiah ati. Kan ruahnak le kan thinlung hi ti nih athianh kho lo, cucu Pathian bia lawnglawng in asi.

Pathian nawl kan ngaih lo ahcun, zeitlukin kan lenglei kan kholh zongah kan thinglung athiang kho lo. Cu Pathian bia cu chunzan in kan ruah ahcun kan thinlung athiang lai. Mi kong lawng aruat pengmi nihcun zeitindah athinglung athiang khawh hnga. Mi lunglawmmi si kan duh ahcun Pathian nawl kan ngaih tikah, Pathian aw kha fiang tein kan theih khawh lai. Pathian nih na hna in an chawn lai lo, kan thinlung in an kan chawnh lai. Cucaah kan thinlung hi thiang tein kan chia awk asi.

Kan thinlung kha Pathian bia tu in pe, thaizing kongah lungretheihnak in kan um awk asi lo. Thaizing kongah kan tih awk asi lo. Jesuh cu nan taksa ah um ati lo, nan thluak ah aum ati lo, nan thinlung chungah a um ati. Mi kan dawt hna tikah, ruahchannak he kan dawt hna lo, Khrih dawtnak in kan dawt hna.

Mark 2 le Matt 9 chung ahcun, “Jesuh nih an zumhnak kha ahmuh tikah, Ka Fapa na lung dong hlah na zumhnak in na dam cang tiah ati. Jesuh nih an ruahnak le an thinlung cu an hngalh” Tuzan ah hin Pathian nih na thinlung an hmuh, Pathian nih an hngalh dih. Kan thinlung nih rian an kan fial hlan ah, kanmah nih kan thinlung hi rian kan fial hmasa awk asi. Kan thinlung hi nifatin tein kaa lawm tuk tiah kan chim peng ahcun lawmhnak in ka khat peng.

Sehtan hmai ah Pathian ka thangthat zungzal. Cucaah ka thinlung kha lawmhnak in ka khat zungzal. Kan tuah lengmang mi hi kan zia ah acang te lai. Zeiruangah ruahnak thalo hi kan thinlung ah aluh tawn ti ahcun, kan thinlung hi kan ven lo caah asi. Sehtan hmunhma kan pek tawn caah asi. Daniel le Peter te hna, thong an tla ko buin Pathian an thangthat khawh. Asinain kan nih cun Biakinn ah kan um nain Pathian kan thangthat kho lo.

An khih tu pa nih an phoih lai lo, an thla tu pa nih an chuah lai lo. Zeitik hmanh ah na kut le na ke an khih tu nih an luat ter lai lo. Jesuh lawnglawng nih an luat ter lai. Senhtan nih thongtlak cang mi hna hi Jesuh lawnglawng nih a luat ter khawh.

Kan thilrit mi kha Jesuh sin ah kan chiah tak tikah cun, kan tli kho cang. Kan zaang kho cang. Kan thadam cang. Thinlung aluat tikah kan nun azang i, lawmhnak kan ngei. Pathian nih hin azungzal in afale hi i lawm hna seh ti an kan duh. Cucu Sehtan nih an kan fiar piak tawn caah asi. Sehtan nih an kan fiar piak lai tiah kan theih tikah, Bawipa kalawm tuk tiah kan ti tikah, Sehtan kha kan tei. Cucaah lawmhnak in kan khat.

Kan mithmai achiat tikah le, kan ilawmh lo tikah, Sehtan khi aa nuam tuk nain Pathian tu kha angaih arak chia. Cucaah ilawm peng. Kan thinlung kan luat ahcun kan hmurkaa zong aluat chih. Bawipa kaa lawmtuk tiah kan chim mi nih khan kan zumhnak kha athanter. Nani 24 chungah Bawipa kaalawm tuk tiah na chim peng ahcun na zumhnak athang hrimhrim lai.

Minung tampi cu an dam hnu lawngah lawmhnak an chim nain, zumhnak angeimi nih cun an dam hlan in lawmhnak bia an chim khawh zeicahtiah Bawipa nih an kan dam ter khawh ti kha fian tein an hngalh caah asi. Cucu thinlung thiangmi nih Pathian an hmuh caah asi.

Atlamtling lai lomi thil kan tong lai tiah kan hngalh tikah, kan thinphang. Asinain cu lio ahcun, na kut thir law Bawipa kaa lawm tuk tiah chim law atlamtling hrim lai. Cucu biatak asi. Jesuh zulh cu mah le mah iphilh asi. Tuzan ah hin nangmah le nangmah rak iphilh ta. Thla kan cam lio ah khin kan iphilh lo caah Thiang Thlarau nih riantuan kho lo. Bawipa zoh in thinlung in Bawipa pehtlai hna usih.

Evan. Mengku
(26 October 2019) Saturday Zaan

Credit: James Vanneilian

Leave a Reply

Your email address will not be published. Required fields are marked *