Lungre theihnak in Chungkhar lawmhnak

Nifa kan nunnak ah din lo in tuan le kawl hawl hi kan rian ngan bik a si. Chungkhar tling in khuasak ti caan hi a tlawm ngai ngai. Dinh caan kan ngei lo, chungkhar khuasak tuntuk that deuhnak caah pei rian kan tuan cu kan ti cuahmah lio ah Chungkhar ah hnangamnak a tlawm ngai cang. Caan tampi cu Chungkhar ah lawmhnak in kan khat nain caan tlawm pal ah lungre theihnak le ngaihchiatnak nih a kan zulh colh i kan i lawmhnak hna cu khuadawm bang an tian dih than tawn. Chungkhar cheukhat hna caah cun Chumhmui a tlung kan ti khawh. Lawmhnak ni a tlang kho ti lo.

Covid-19 zawtnak nih Chungkhar a kan funtom. Hmun khat te ah khua kan sa ti kho hna. Chungkhar ah dawtnak a leng. Chungkhar ah kan tuan bal lomi rian zong kan tuan. Chungkhar dirh hlan, ngaknut tlanval lio i rak i dawtnak bantuk khan kan chungkhar cu kan i thar chuah kan ti khswh. Ei din ti rawl kongah lungkhat in khua kan khang ti hna. Chiat ah chiat ti that ah that ti timi bia kha hleng lak in chungkhar kan nun ah a um. Dawtnak in kan khat. A nuam tuk ee. Maw Pathian ‘Na tuahmi thil ka ruah ah ka lung nih a phan lo. Khuaruah har a si,’ tiah thla ka cam.

Biak inn ah zapi he Pathian thangthat ti cu a nuam hring hran. Kan ton ballomi caan a hung phan. Biak inn ah zapi tel in Pathian thangthat khawh si ti lo. Kan lung a leng. Kan si a vang. Zumhnak deu ngeimi kan lo. Asinain Vawlei cung dih lak nih kan tonmi a si. Pathian khua khan hi zeitindah si hnga ti in tah ai hram bu in thla kan cam hna.

Pathian thil tuah hi khuaruahhar a si. Khamhtu Jesuh chuah lio caan, tukhal hna sin ah Vanmi an rung lang i ‘A sangbik van ah khin Pathian cu thangthat si ko seh. Cun a dawtmi hna umnak Vawlei ah hin remnak ( daihnak) um ko seh’ tiah hla an sakmi kha ka lung ah a hung chuak. Remnak (daihnak) hi chungkhar in kan thok ding a si. Ram hruaitu hna zong khi chungkhar ngeimi an si. Chungkhar ah dawtnak in a khat lomi Ram hruaitu hna cu a hruaimi hna minung sinah dawtnak ngei lo in a uk in an uk hna i harnak tu an pek deuh hna ti cu tuanbia ah kan hmuh khawh.

Covid-19 ruang ah Lengchuak lo in inn ah chungkhar dihlak khua kan sa ti hna. Lawmhnak in kan khat. A chel ahcun bia el pah caan cu a um ko nain ngeihthiamnak nih chungkhar a lawmh ter. Zaan chiar chungkhar pumhnak kan tuah. Khat le khat thla kan i cam piak hna. Chungkhar van ram kan ser hna. Chin miphun cu Covid -29 pulrai in kan luatter hram ko, Maw Pathian tiah thla kan camnak cu Pathian nih a theih ko.

Khua chung ah buaibai le khawn den a um ti lo. Firtlei zong a um lo tluk a si. Leicung sualnak le hur duh cuainak vialte a lo cang. Pathian nih leicung thurh hnomhnak kha Covid-29 in a thianh cang. A rauh hlan ah Van thar le Vawlei thar ah kan um cang lai. I lawm u sih! Pathian sin ah Chungkhar cio nih lawmhnak chim cio hna u sih. Pathian min cu thangthat si ko seh! Amen.Credit: Jacob Thang.

Leave a Reply

Your email address will not be published. Required fields are marked *