Kan Tonmi Thil Kip Ah “Amen” Ti Ko Usih

Hlaphuah thiam minthang Horatio G. Spafford nih cun, “ka nunnak lamthluan ti dai bang a kal caan ah, ngaihchiatnak nih tilet bang a ka fenh caan zongah “Amen” ti khawhnak na ka pek. Cucu ka thlarau le ka taksa ca ah a țhami an si ko” a ti. Hi pa hi Pathian a ttihzah i a duh mi, thawngțha ngaih awk a umnak hmun paoh ah umkal a duh mi pa a si. Voikhat cu London ah Evangelist minthang D.L Moody thawngțhachim ngai dingin a chungkhar he kal an i tim. Sinain a rian tlamtlinlo ruangah anih tu ni tlawmpal US ah hun um rih i hnuhniang ah va kal ve te dingin a nupi le a fale sin kal cu aa leet. Vanchiat ah a dawtmi a nupi le a fanule 4 hna cu Rili laifang an phak ahkhin țotho thlichia nih a den hna i a fanule 4 nunnak cuka ah cun a liam. Thawngpaang ngaih nuamlo a theih tikah, a ngaihchia hringhran. Van a zoh ah a sang, vawlei a zoh ah a pit. Pawngkam a zoh i a fale khuktti rual a hmuh hna ah mitthli nih mipi sin ah bia a chim. A nun a kuai, a thinlung a kuai. Hmurka ah a poi ti hlei bia dang a chuak kho lo. Cu lio ah a nupi zong ngaihchiat zuntuar in a um.

An nupa nun nih vawlei cungah vanruah bang mitthli a tlakter. Cutluk lungfak le ngaihchia in an um lio ah a nupi sin ah a hung kal. Tilawng in a hung kal i a fale thihnak hmun an hun phak ahkhin, mahka hi na fale thihnak a si tiah an hun chimh. Mitthli he khuaza a ruat i riliti dai tein a um ko rua tiah kan ruah caan, nunnak zong a tluangtlam ko rua tiah ka ruah caan ahhin, ruahlo in mitthli ti nih kan nun a ciah tawn si mu a ti i “Ka thlarau ca ah țha, ka thlarau ca ah țha” timi ZBC hla kan sak tawnmi kha a hun phuah. A tonmi kong ruah ah Pathian mawhphorh awk tlak khin a um nain, anih nih cun “Amen” ka tonmi hi nangmah hnatla a si ko caah Bawipa, ka ca ah a țha ko; Nangmah duhning a si ko ka Pathian, ka taksa ka thlarau ca ah a ttha na ti caah si ko tiah a ti.

Cu bantuk țhiamțhiam in vawlei minung nih nunchan ngei lo, chuahchan ngei lo an ti mi nu, Fanny J. Crosby hi, a chuahka ah cun vawlei a dawhnak le a thlum-alnak par a tep ve ko. Sinain sii chunh sual ruangah bawhkeuh a si lio in a mit pahnih in a caw. Hawi nih vawlei aa dawhnak le a nuamhnak theipar duh in an ceen lio ah anih ca ah cun vawlei hi muihnak in a khat i a thlum-al kho hrim lo. Anih ca ah cun ni ceu hi sullam ngei lo tluk a si. Hawi hmuh a hmu lo. Hawi kalnak ah a kal kho lo. Vawlei hi a ca ah a kha hringhran. Cutlukin mi vanhai le nun har in nun a hman lio ah, vawlei ah hrin le minung ah ser ka si cu vawlei nuamhnak partlanh in duhdim nun hman a si ttung lo, sertu Pathian sunparnak pek tu ah pei ser ka si ko cu (Isa.43:7, 21) a ti i, a tonmi thil kong ah lungsi tein Pathian a thangțhat kho mi a si ve.

Ka sining hi ka lungsi ko. Hihi si hlah ninglaw, vawlei a dawhnak le a nuamhnak theipar ka tlan hnga i cu nih cun zungzal hremhmun ah a ka hruai hnga. Cucaah ka mit nih khua a hmuh lo hi ka ca ah cun a ttha ko. Zeicahtiah, Pathian nih ka ca ah a tthalomi khua a khanglo ti kha fiang tein ka hngalh. Cu si hlah sehlaw, lei nuamhnak partlan in ka nun hi a liam cang hnga tiah, vawleipi nih chuahchan ngeilo tiah an timi nu nih cun an biahalnak a leh hna. Fanny hi mitcaw a si ko, nain Pathian nih a sunparnak ca ah tthawng taktakin a hmanmi a si i Khrihfa hla hi fung 800 lengkai a phuah. Culakah amah nun he vawleipi nih chuahchan ngeilo tiah an ruah lio ah, “Mah hi ka hla le bia cu a si, chun nitlak ka Khamhtu thangtthat hi” timi hla a phuah. Cucu ka chuahchan cu a si ko tiah a ti.

Hi hna pahnih nih an tonmi harnak le intuarnak hi a fak hringhran. Cuaithlainak lung nih lerh khawhlo tiang ngaihchiatnak a si. Vawlei hi an ca ah cun lawmhnak petu si loin ngaihchiatnak phortu ah a cang. Ngaihchiatnak le harsatnak cu an chungkhar ah mi chuakkhat unau bang a caam i, lunglomhnak nih khuallian bang a veh hna. Sinain, Pathian an thangtthat i, “Amen” -Bawipa kan ca ah thilttha na kan khanpiak caah an ti i a min thiang an thangtthat” zungzal. Cucu zumtu nun tak zong a si. Rev. Dr. Lian Mang nih cun, kannih zong thlarau hruaimi kan si. Harnak kan tonmi hi Bawipa remruat, thluachuahnak hram a si. Zei thil paoh kan cung tlung ai kun hawi dawt, van Canaan tu cuan in harnak ruat hlah. Kan tonmi thil kip ah hin “Amen” kan ti kho maw tiah, hla a phuah. Cucu Khrihfa nun kan timi cu a si. Kan harsatnak le intuarnak aa dang cio lai. Sinain kan harnak le tuarnak chung hin amah bochannak nun ngeih kan thiamnak hnga ca ah, kan tonmi kip ah Amen ti khawhnak nun Pathian nih kan pe cio seh. Catialtu Carson Tin Twin Oo.

Leave a Reply

Your email address will not be published. Required fields are marked *