Kalay-Kabaw Hakha aa timi pawl Hakha sinak in chuah law law an si cang lai

 

Ramthumnak um kan Lai top leader pawl agenda seh kan dangh hna. Kan hnu tuan deuh ah khan Ram thumnak um kan Lai Top Leaders Pathum he biaruah ți nak kan ngei cang. A linsa taktak dingmi rian thok kan i timhmi a um. Ram dang ahcun Lai tiah si loin Hakha community timi min deuh hin dir a si. Lai tiah hin a huap kau țheo tawn i, cu e kha e ti a um tawn caah Hakha hmannak hi a si. Cu lawng si loin kan miphun min Lai timi hi Hakha kan khualipi min nih tuanbia lio hrim khan a rak chilh cang mi a si. Lusei pawl cu Khualipi ngan le țhawng an rak ngeih lo tikah a leng mi nih Aizawl ti bantuk hngal loin Lushai ti men in Mirang nih an rak record hna. Kawl Siangpahrang chan ah bama ti si loin Pagan, einwa, Kungbawng ti bantuk in an rak lar bantuk khan Hakha zong Lai tinak in Hakha tiah Ramukbawipa țhutnak a si caah khuazadeng tiang a rah thang cang. Hakha tiah cun Hakha peng lawng si loin Hakha Lai nunphung le holh aa hrawmmi vialte kha a huap ve. Ka chim cang bang khan Hakha ti cu peng dang min nak cun a let tam tuk in limhaang a rak um tikah Laifa aa timi paoh nih cun al len awk a um lo. A sinain Hakha limhaang hi kan mah Hakha aa timi chung nih hin kan thlak thluahmah cang hmuh a si tikah a tu bantukin kan Top Leader te he bak biaruahnak kan ngeih hi a si.

Top leader pathum min hi ka chim rih lai lo. Cun an mah hi a sang bik Hakha community hruaitu pathum ka ti nak a si lo. Hakha community hruaitu top leader pawl lak ah pathum tinak a si. Caa ka van thlah tawn mi zong khi dawtnak le zawnruahnak he deuh a si lengmang. Comment le Like ka uar ruangah a si lo. Mifim pakhat le cațial thiam pakhat ka si ve tikah Mipi like pek uar zawng cu ka hngalh tuk ve ko. Nain cu bantuk mipi like pek mi caa nih ram a damh bal lo. Like pek ngam lomi ca tlangkhat te nih hin mipi nun ah rian a țuan deuh kha kan hngalh. Hakha cu Chin Lungpi kan si, Cakei kan si ka timi pawl hna khi “Like” pek uar ah si lo. Nain mipi tampi a țhangter hna. Like uar ahcun Esther le Benjamin Sukte pic ka post ve hnga i nan hei ka Like len ko hnga. Nain kha bantuk post nih khan Lairam damnak si loin Kawl nunphung ah pil chinnak tu a chuah pi.

Kan Biathli ahcun kal colh ko u sih law zei ko dah a si tiah cun Kalaymyo peng Hakha aa timi pawl kha Hakha in chuah lawlaw ding agenda a si. Hakha community leader pakhat si ve nak in a ho hmanh nih Hakha limhaang thlak cu kan duh cio lai lo. A tu ahcun Agenda lawng a si rih nain a herh ning in a rauh hlan ah nam colh i timhnak a um ko. Hakha Leader dang tam deuhpi zong nih hi kongah ruahnak an chuah ding cu a fiang ngai ko. Hakha CACC zong, hi kong ah thanh kan i zuam hna lai i, Kalaymyo Hakha aa timi pawl kha an duh le Zahau țapeh, si lo ah ningzahnak chuahpitu tiah Hakha si loin “Haha’ tiah miphun code thar i ser ko hna seh ti a si. An fim ko ahcun Samaria miphun si cu an duh ding a si lem lai lo.

Hi kong ah a tu bantukin kan chim hi Zahau kan nau ke kan fa le rem lo ruangah a si lo. Kan fih bikmi cu Hakha Lungpi a simi nih kan nau le Zahau holh larter men tu ah kalay-Kabaw i khua an sak mi nih Laimi hmun zakip ah Limhaang tlaknak khu a kai cang caah a si. Kan Lai upa tampi hi Kalay-Kabaw ah rian phun phun in an tlawn pah lengmang tikah an lung dong tuk cang. Zei ruang ko ah dah Zahau holh uar tiang in sal lungput an ngeih timi hi research zong in hmuh khawh a si ti lo. Zahau an tam deuh i a si ko ti le mizo zong nih Zahau holh an fian deuh caah tibantuk Sal idea ruahnak bantuk kha cu Research i record ding taktak ahcun ningzak tuk khi a si lai caah kan telh lo. A ngai ngai tiah ahcun nuhrin holh hmang bak te cun Zahau le Hakha holh hmang ah Hakha holh hmang hi tlawm cu chim hlah tam deuh lo hmanh ah i thlau dawh a si lo. Zahau hi an holh an țanh caah an holh a hrawmpi tu unau phunțenge an ngei ram an ti.

Dai te um le mi va lemnak men in Holh hi lar ter khawh a si lo. Mah nih fak piin țanh lawng ah a dang zong nih upat piak a si. Hakha aa timi tiang nih cun an va hrawmpi ve hna i Mizo hmanh nih ziah Halkha Cakei kan timi nih Zahau aa holh men i tlak hna cu, van cung in tlak nak in a fak deuh lai hi an ti ti a si. Hakha bak nih Hakha holhpi a cawi ahcun Mizo he zo lo he, a dang țenge vialte Tidim tiang nih khin upat a si ko nain Hakha aa ti ve ko țungmi nih Zahau holh bak ah faktuk tang ah an rak tlak tikah Hmundang Hakha Cakei pawl limhaang tiang a hei hninh seih cang caah a tu bantuk in ruah khan nak a um hi a si. Ramthumnak zong Mirang holh ah nan tlau ve tibantuk nan um sual ah kha kha cu dang khat a si i, zei phun cio paoh an si ko i, hngakchia zong an upat deuh cun laiholh an thiam dih ko. Nain Kalay-Kabaw ah Cakei bang i leknak ding le Laiholh lar ter nak ding ah, a cu Zahau holh celngel vaa nenhter cu kan Ramukbawi pawl nih hmu hna seh law an Lai puan pipi thleh dih i vutcam phulh in ningzak in țah nak tluk bak a si. Curuangah cun Zahau holh in Falam pa ka chawnh ko lai tiah, ka țhinh lai lo, social pei a si cu nan ti ahcun a rauh hlan ah kan agenda hi nunter colh kan i zuam lai. Hakha Cakei le Lungpi limhaang thlak hmanh ah ningzak taktak Zahau holh cekngel he a si tikah ngaihthiamnak ding lam a um ti lo.

Hi caa hi Kalay-Kabaw um Hakha Lai aa ti țung i Zahau holh a lar ter tu pawl nih hngal dih ding in share cio uh. A si lo cun Ningzahnak nih a phak colh hna lai. Hakha Lai a simi paoh nih common sense, nuhrin thluak in ngeih ding mi cu Mizo zong, falam zong kha Hakha holh dah ti lo cun an mah holh hrim in chawnh lo ding. Zarhkhat an cawn lole hna nih theih ahcun hakha holh an thiam lo nak ding a lam a um lo. An mah nih an holh in an kan leh zong le kha cu dang khat. Nain Hakha holh in kan chawnh hna ah, ha, zei tin e ti bantuk, kan i fiang lo ti bantuk a um lo nak ding Hakha nih Laiholh lawng nan chawnh hna lai.

Hakha Holh Larter tu si kha Hakha aa timi paoh nih nan i zuam lai. Nain fak nawn tein hrilhfiah si loin hrilhphomh loah cun nan pemh sual lai lo caah kan agenda hi nunter cu a herh te lai. Nan mah nih nan kan chuah kho lai lo a ti tu zong nan um lai. Code number ah Zahau țapeh, lole Haha tiah kan i khumh khawh lo hna hmanh ah kan thinlung cun Samaria men ah ruah nan si cang lai. Note: Kalay-Kabaw ummi Hakha paoh an si kan ti lo hi mu. Zahau holh larter pawl lawng kan timi a si hih. Zatceo hrawng cu an si rua. Pastor vialte le bu kip upa nih theih le hngalh phumi cakuat a si hih. kan hnu kan chim bang cun, thihdan pek ding list bak ah an um ngai nain thihdan pek nak nawl cu phunglut tein kan ngei ve lo caah a chuah tu in kan chuah law law nak lai hi a si. Credit: Mang Lian

Leave a Reply

Your email address will not be published. Required fields are marked *