Insein Ral: Chin Miphun nih Kawlram an Khamh

28 March 2014 [The Chinland Post, Halkha] Insein ral i tuknak hi ni 112 a rau, Karen ralkap 500 leng an rak thi. Zingkhat i kahnak ah minung 120 in 200 renglo hma an pu i tih a rak nung tuk. Nunnak tam ngaingai a dih. Chan tuanbia ah taan peng dawh in a lang i, Karen zong nih an ṭial, Chinmi zong nih kan ṭial, Kawlmi zong nih an ṭial ngaingai. Rangoon khualipi cu ral nih an rak laak dih deng ko cang caah U Nu Cozah kha international media nih ”Rangoon Government” tiah an rak kawh cang, tiah ralkap kong dohhlattu Mawng Aung Myoe nih ”the government of the time admitted that large sections of the countryside was under complete domination of the insurgents” tiah a ṭial (2009, p.16). ”Karen tupung KNDO le Communist tupung BCP nih an rak laak dih deng taktak khi a si ko” tiah a chim.

Cu dirhmun a phan cangmi cu chanh ṭhan dih awkah Chin ralkap, the 1st Chin Rifles cu ”tuanvo” an rak pek hna. Col. Hrang Ṭhio hruaimi Chin ralkap nih nunnak tampi thap in an rak lak ṭhan. Insein ral a tu vemi Chin ralbawi Col. Van Kulh nih ”Col. Hrang Ṭhio, BGM hi rak um hlah seh law Rangoon khualipi cu ral kut chungah a tla cang hnga. Col. Hrang Ṭhio nih Yangon Khualipi cu a khamh, Yangon khua humtu a si” tiah a tuanbia cauk chungah a ṭial (Kulh, 2007). ”Sawbwagyigon ral kutin kan lak lioah kan mah leiin ralbawi pahnih le ralkap pahra an thi. Lt. Ca Thuan cu ka kut chungah a thi, a thih hlan deuhah inn lei cah na duhmi a um maw? tiah ka hal. A mit a hun au i a thaw khin tlawmte a von chim lioah a caat colh. A tuar a har tuk hringhran, kaa in chim khawh asi lo” tiah a ti (Kulh, 2007, pp.39–42).

Cu bantuk ral kut chung a phan dih hnik ko cangmi Ramkomh Kawlram khualipi Rangoon cu Chin ralkap nih May 22, 1949 ah ralkut chungin an rak lak ṭhan khawh dih. Col. Hrang Ṭhio zong ral kut in a nunnak a liam phah. Pafim, paralṭha, kum 28 lawnglawng a rak si. Ram pumpi nih a sunglawibik ”State Funeral” in a ruak an rak suan. Hi pa nih Halkha leiin Rangoon ah sianghleiruun a kai hmasabikmi Zipeng Zahu kha a har tuk caah a inn ah a rak umter i, a rak cawm. Miphun a dawt i a nun a rak i dawh. Vuancichok U Nu zong a thih ni ahcun a dang tiang a khar i a holh kho lo, a ngaih a rak chia ngai, tiah an chim. (cheukhat nih a fanu he zong a rak pesa hna an ti). Cu tluk cun uar a rak um ngaimi Chin ralbawi paralṭha kha a rak si.

Cheukhat nih Insein ral tuknak ah Chin miphun hna kan chanbia hi Kawlmi nih hlohpiak dih an kan timh, tiah tulio hrawng hi chim a tam ngaingai i, zeimaw tiang cu a hman ko lai timi zumhnak kha ka ngei. Nain, tutan hun dirpi ka duhmi cu hi tuanbia hi hloh khawh a si hrimhrim lai lo, timi kha a hun si. Tulio Kawlram minthangbik media pakhat The Irrawaddy Editor Aung Zaw nih khin ”The Battle of Insein Never Really Ended” timi cabia 2009 khan a rak ṭial i vawleipi rel dingin a rak thlah. Cu cabia chung ahcun ”the most decisive role in defending Insein was played by the 1st, 2nd and 3rd Chin Rifles, fighting on what is regarded as the most strategic battle front of all” tiah a ṭial (Zaw, 2009). Hihi Pu Thang Za Dal nih a cauk “the Zo people of Bangladesh, Burma and India” (p.86) timi ah a lak i ṭial than ve.

Aung Zaw nih a cabia chung i biahram a laknak hi Insein ral ruangah Thurah ralṭhatnak tiang a rak hmu vemi Thurah U Tun Tin, hnu ahcun chikkhatte Kawlram Prime Minister tiang a phan i, 1988 ah aa dinmi nih tlamtling ngai in Insein i-dohnak kong cauk in a ṭialmi chungin cherhchanh a va lak chinmi kha asi. Cucaah rinhtlak ngai khi asi ko i, thil dik tein a chimmi Kawlmi zong hi an rak um ve len ko in a lang caah Insein i dohnak ah Chin pasalṭha hna kan chanbia hi hloh khawh asi lai lo, tiah ka zumhnak cu a si.

Thil pakhat ruak awk tu a hung um tawn. Laimi tam nawn nih hin kha lio U Nu Cozah khamhtu taktak kha Chin rifle lawnglawng deuhin kan chim deuh ve tawn i, ram hmun ka kipah ral a rak tu ve lenmi Shan, Gurkha, Kachin ralkap zong an rak um ve kha kan philh sual ve dengmang tawn. Thurah Tun Tin nih ”soldiers from different regions of Burma helped to defend Rangoon. The most decisive role in defending Insein was played by the 1st, 2nd and 3rd Chin Rifles” tiah a `ial (Zaw, 2009). Chin ralkap hi a biapibik in Insein a rak khamhtu taktak cu kan rak si hna nain miphun dang ralkap zong an rak cawlcang ve ko, ti kha a chim. Hihi biahman a si, ti ka zumh.

Cun England i Victoria Cross bang Kawlram i ralkap minṭhatnak sangbik laksawng (the highest military award in Myanmar) Aung San Thuriya ralṭhatnak hi kum 1951 in cun an pe ti hna lo. Hi minṭhatnak a hmumi an zapi hi Kawlram ah minung 6 lawnglawng an um. Cu chungah Kawlmi hi ralbawi 2 lawng an si i, midang vialte hi Karen in minung 2, Chin in pakhat, Gurkha in pakhat an si. (Thawnghmung, 2012, p.124). Hi nih a langhter ngaingai mi cu: kum 1948 in 1951 kar tiangah Karen ral, KMT ral, CPB ral dohnak ah miphun dang ralkap zong hi U Nu Cozah leiin a rak tang lenmi an um ve ko, ti kha asi. Cu lawnglawng cu Kawl caṭialtu cheukhat nih fakpi in an cawihlir tawn theo i, Chin ralkap kongkau kha an philh lengmang ṭhan hoi tawn.

Hi caan lioah KNDO le BCP tupung hi an rak ṭhawn tuk ve caah Vuncichok U Nu Cozah cu an kuan le an zen a rak dih hnik cang i, zeitindah kan tuah lai, tiah awklokchong ngaingai in an rak um. Cu caan lioah U Nu Cozah nih a rak i bochanmi cu Chin politician ṭhiamṭhiam a rak si. “Parliament Secretary Captain Mang Tung Nung kha India ramah Prime Minister Nehru sinah an thlah zokzok i, hriamnam cu a va zalh” tiah Dr. Vum Son nih a cauk ah a ṭial. ”Major Kap Za Thang zong U Nu Cozah palai in ral sinah heh an rak thlah i, an rak i bochan ngai”, tiah a ṭial (Vumson, 1986, p.199).

Insein ral ah Chin pasalṭha hna kong hi Vuncichok U Nu zong nih Vuncichok a tuan chungah Union Day le Martyrs Day ahcun a biachim ah a rak chimchih zungzal tawn. Cun U Nu Cozah nih 1st Chin Refile chungin Insein raltuknak ruangah minṭhatnak phunphun a pekmi hna Chin ralbawi: Aung San Thuriya Thai Cawn, Thiha Thura Ca Thuan lengah Thura min ṭhatnak pekmi Hniar Ceu, Thang Sui, Ngun Nawl, Rung Ling tbk. lengluang an rak um. Hi nih Insein ral lioah Chin pasalṭha hna tuanbia kha thlau khawh asi lai lo zia fiang tein a langhter tiah ka ruah. Kawlram War Office roca le Defense Museum in hlonh khawh asi ti lem lai lo.

Cun ralkap minṭhatnak sangbik Aung San Thuriya a hmumi ralbawi pa 6 hna an tuanbia hi kan zoh ṭhan tikah Karen ral ituknak ruangah a hmumi hi ralbawi pa 4 an si. Midang hi cu CPB le KMT ral tuk ruangah a hmumi lawngte an si. Karen ral he i tuk ruangah ral ṭhatnak a hmumi hi kan zoh ṭhan tikah: Daik U ituknak, Yethogyi ituknak, Tachileik ituknak hnaah ral ṭhatnak kha an hmuh cio. Insein ral i tuknak ruangah Aung San Thuriya a hmumi kha pakhat hmanh an um hna lo. Chin ralbawi Pu Thai Cawn (U Taik Chun) lawnglawng hi Insein raltuknak ruangah Aung San Thuriya a hmumi umchun asi. Hi nih Insein ral ituknak ah Chin miphun kan raltthatnak le chanbia ah hloh duh zongah hloh khawh kan si lonak ding kha fiang ngaingai in a langhter.

Hi lengah Aung San Thuriya pekmi ralbawi 5 hi cu an thih hnuah pekmi lawngte an si. Pu Thai Cawn lawnglawng hi a nun lio te ah pekmi a si. Pu Van Kulh nih ”Bogyi Thai Cawn cu a ral ṭhat hleiah a van a ṭha (hair breath) ral kutin samfang tia in a luat lengmang caan hi a tampi” tiah a ṭial (Kulh, 2007, p.46). Cun Aung San Thuriya medal hi Kawlram ahcun a sangcem ralṭhat minṭhatnak cu si kaw a hmumi hna an tuanbia hi cauk in an chuahpiak dih ngot hna. Caṭialtu kei zong Pu Thai Cawn kong an chuahmi cauk hi ka no deuh lio hrawngah ka rak rel ve bal i, rel a nuam ngaingai. Insein ral a tuve mi khi rel lio ah cun kan lo ko hna. Cu caṭialtu cu Kawlram ah a minthang ngaimi ”Ttak Ka Tu Sein Tin” timi kha asi. Insein idohnak ah Chinmi tuanbia cu tling nawn tein Kawlca in a ṭial i fawi tein cun a tlau ti lai lo. Rak rel cio ve te uh.

Cun biadang deuhah vawlei ralpi pahnihnak a dih hrawngah Mirang Cozah uknak tang kan um lio ah khan cun Bertil Lintner nih “Kawlram ralkap chung ahhin Kawl hi 1893, Karen 2578, Indians 2578, Chins 1258, Kachin 852 an si” tiah a ṭial (Lintner, 2011, p.112). Kawlmi ralkap a ṭuanmi hi Chin le Karen zat hmanh an rak si lo, an rak tlawm ngaingai. Mirang kuttang in independence kan hmuh tikah Kawl ralkap cu Maung Aung Myoe nih ”very weak, small and disunited” an si lengah a phunphun in an i do fawn. Buainak nganbik cu Mirang cungah titsa a ngeimi Karen ralbawi le Bama Myochit Tatmadaw aa timi Bamar ralbawi hna i-dohnak asi. Kawl ralbawi nih Mirang Cozah chan ralkap a rak ṭuanmi cu Kyesar Sittha, ”soldiers serving for foreigners for living”, tiah an rak hmuh hna i, an mah tu cu Myochit Sitthar, ”soldier serving their own people”, tiah an rak i hmu. Karen, Kachin, Chin ralkap hna cu Mirang a ṭanhmi ”pro west” ”pro British” an rak ti hna, tiah a ṭial (Myoe, 2009, p.48).

Sihmanhsehlaw Tlangcung miphun cu a zeilei poh in an rak zat deuh ko caah luatnak hmuh cangka Karen ralbawi General Smith Dun kha Kawlram ah ralbawi nganbik dirhmun ”commander-in-chief” an rak tlaihter. Brig-Gen Saw Kyar Doe kha ”Deputy Chief of Army Staff” rian an rak peek. Bo Let Ya nih Defense Minister a rak tlaih. Nain, a rau lo. Kawl nih Insein ral tuknak a hun chuah in General Smith Dun cu a rian in an phuah colh i, General Ne Win an pek colh. Cu pa nih ”Federal phung” cu ”ram kehdarhnak phung” a ti riangmang i, 1962 ah uknak kha a lak, kum 27 chung a kan uk, ram kha a hrawh dih. Tlangcung miphun cu sal le ral ah a kan ser i, ramtang ah a kan dawi, nihin tiang thi a dai kho thai ti lo.

Karen ralbawi Gen. Smith Dun a rian an chuh i Gen. Ne Win an peek hi ”Maha Bamar thinlung-Burmanization” a hun i sem thawknak a si, tiah tunitiang Karen cu an lung a fak ngai. Smith Dun hi a rak ”sharp” lengah ”discipline” zong a rak ngei ngai i, an rak i bochan ngaingai. Nain, Kawl Cozah nih lunghrinnak in 1979 tiang an hren i, cawl kho loin an rak chiah. Shanram Kalaw ah a um i, a intuarnak vialte cu dai tein leidai tangah a liampi dih. A thih hlan belah “Memoirs of the Four-Foot Colonel,” timi cauk ́pakhat a ṭial ta i, nai-ah Cornell University nih an nampiak, tiah Irrawaddy thawngca nih a ṭial.

Biadonghnak: Kawlram independence kan hmuh cangka in Kawl ralkap nih Tlangcung ralkap–Karen, Chin, Kachin hi a rak kan hmuhning a ṭha lo ngaingai. Tuchun ah ralkap milu singli deng an si nain Tlangcungmi cu Bohmugyi rank cung an kan pe duh lo. Kan kar lakah zumhlonak le hliam hma kha a fak ngai ko. Hi nih tulio Tlangmi aupimi ”Federal Tatmadaw” timi pungsan taktak hi an kan hnatlakpi duh te hnga maw timi hi zumh a har ter ngai theo tawn. Kawlram expert Bertil Lintner nihcun ”Federal Tatmadaw tak hi cu a si kho lai zumh a um lo, India ram i State Security Forces bantuk dirhmun tu khi a si kho deuh te lai” tiah a chim. Cucu a si kho ngaingai mi kha asi.

Falam Christian Literature Society chuahmi cauk ah Col. Hrang Ṭhio tuanbia hi tin an ṭial, ”Karen pawl nih Insein khuapi an lak dih i, khuapi dang zong ral kut a phan cang. Col. Hrang Thio nih 1st Chin Rifle ralbawi pawl cu War Office ah a auh dih hna i, ral pawl doh ding kong cu an khan. Upa dang nih miphun pakhat le pakhat i remlonak ruang i a cangmi a si ruangah Laimi cu i tel lo in um ko u sih an ti nain, Pu Hrang Thio nih a duh lo” tiah an ṭial. Hihi a dik asi ahcun zeiruangdah luatnak hmuhka in Kawl ralbawi nih Tlangcungmi an kan hmuhning a ṭha lo ngaingai nain Chin ralkap hi Insein raltuknak ah Kawl cungah hi tlukin titsa (loyalty) an rak ngeih hnga, timi biahalnak a um kho ngaimi kha asi. Ruahsual zong kha a fawite.

Nain, tuchun ni a fiangmi cu kan pupa hna nih Kawl hruaitu cungah titsa an rak ngeih tuk caah Insein ral an rak tuk i Karen an rak phomhmi hna asi lo. Miphun pakhat le pakhat kan biatiam minthut nenh cangmi ”Panglong Agreement” cungah titsa an rak ngeih caah ”Union of Burma” an rak khamh duh ruangtu ah ral an rak tukmi kha asi deuh. Panglong hnatlaknak minsen an thut hnawhmi biakam cungah an fek, thih tiangin an rak dirpi, thisen, thlanti le nunnak tampi an rak thap. Pasal lungput, Vapual nun ciammam!

Cu ruangah ”The Republic of the Union of Myanmar” tiah hmai hngal ngaingai in kum 65 chung tiang vawleipi hmaiah tlu thai loin a hung dir––Chin pupa hna nih ral kut chungin an thisen in an rak khamh ṭhanmi rampi cu. Nain, cu chanbia cu hloh an timh deuh tawn i, an i theihter duh theo tawn ti lo. Hmanseh, chanbia chungin an hlo kho thai ngaingai bal lai lo i, theih lo khawh zong khi a ngah lai lo. Chin pasal rual nih kam lo chuncha bang zungzal in an hun dirpi peng rih te ko lai. Credit: Salai Van Lian Thang.

Leave a Reply

Your email address will not be published. Required fields are marked *