Hmaizarh cu tangkop phak hlan ah Rung Lian Ceu Cu Ukling nih a tei hrimhrim lai ka zumh

Rung Lian Ceu hi paih phun tam ngai a thiam ko nain kehlei vangkhen lawng hi a miteinak kuat a si. Cucu fawi tuk in ai phet khawh ding Ukling nih a theih tuk cang. Hi ruang ah 2017 ah khan Ukling a liang ilh buin minute 25 chung ah Runglian nih a rak tengh khawh lo kha a si. Tangkop ah cun dawh ngai in a tei ko. Hmaizarh cu tangkop phak hlan ah Ukling nih a tei hrimhrim lai ka zumh. A ngiar nak sau tuk cang, a ngamh tuk fawn tikah kei cu 💯 bak Ukling ka zumh. Credit: Salai Lungthli Tum.

Iran nih Iraq i American ralkap pawl an umnak inn le lo a kah ko hna nain, minung a thimi an um lo, cun Iran zong hi “a thawngpang a dai deuh ngaingai cang” tiah Trump nih a chim. WASHINGTON — Tehran nih Iraq ah a ummi Amerian ralkap pawl missile in a kah hnanak a ruang cu an general an thahpiak hna ruangah telrul a cham hna bia a si i, hi piin cun American ralkap hi kan kap chap ti lai lo, a donghnak a si ko lai, tiah Tehran lei nih an chim hnuin, a tu bantukin Trump zong nih Iran he raltho lo dingin bia a paunak zong hi a si.

A tu bantukin Iran daih lei a panh hi party dihlak kan lungre a theihmi kongah thiltha ngai a si ko, cun vawleipi ca zong ah a thami a si, tiah White House i Live in bia a chimnak ah Trump nih a chim. Kan hnung zarh i American nih Iran ralbawi drone in an thah ruangah Iran nih lehrulhnak a tuah colh i, nizan ah khan Iraq i Americal airbase pahnih cun missile in a kah colh ve hna. Cu ti a kah hna a thaizing bakah a tu bantukin Trump nih bia a chimmi hi a si. Airbase an kahnak ah a thimi an um hraw lo.

General Suleimani an thahpiak hna ruang i teirul cham an duh ruangah a tu bantukin missile in an kah hna hi a si ko caah, hi missile kahnak vial lawng hin an karlak i ernak hi a dong kho mi a si, tiin a chuekhat mithiamsang pawl nih an hmuhchung nih a si. Cun anmah Iran lei hrimhrim zong nih missile kahmi vial hin kan donghter ko cang lai, tiin Mohammad Javad Zarif (Iran foreign minister) nih a chim.

Amahbelte cu, a tu lawlawse (for the time being) ah an i tithiamlonak hi dong ta ko rih hmanh sehlaw, ni le thla a hung rauh in cun an i hmuthiam thai lai cu kan zum kho lo, tiin a cheukhat nih an chim ve. Middile East ah hin Iran nih mithalo phu tampi ai ngeih hna caah, cu hna pawl nih cun American siseh, Israel, Saudi Arabia heiti bantuk American a hawile pawl hi hnahnawh an pek peng ko rih hna lai i, a bikin American ah cyberstrike an tuah khawhmi a si.

Kan geneal Suleimani an kan thahpiak hnu hrimhrim in cun, Americans pawl hi Middile East in thawl viar kan i tim hna lai, tiah Iran President Hassan nih a chim. Tutan missile in ka dohmi hna hi a donghnak a si awk a si lo. Kan i tinh taktak mi cu, Middle East in American muisam lenter ti lo hi a si, tiin “America ah thihnak tlung ko sseh! Israel ah thihnak tlung ko seh! Tiin a aumi mipi le Muslim tlangbawi pawl lakah an supreme leader Khamenei nih a chim.

General Suleimani an thahmi vial lawng hin a dih lai lo, Iraq ah ummi American ralkap minung 5,000 hi an dihlak in dawi viar an duh hna. President George W. Bush nih Iraq doh dingin nawl a chuahnak in kum 17 hnu ah, Iraq i American base pawl hi Pentagon nih sungh dingah ai ruah pah cang mi an si. General Suleimani Drone in kah dingin nawl a pek hnu ah tuzing ceu hi Trump nih mipi sinah fiangin bia a chim a si. Hi kongah tweeter hna ah cun biaka chun a chim len ko nain, official ngaingai in a chim theng rih lo.

Tutiang i president Trump nih a chimmi bia zoh tiah ai ralchanhmi le a fianglo mi tete an um. Cuhlan a chim bangin ral a thawhter taktak sual ah cun, cucu War Crime ah chiahpiak a si sual lai caah, Iran i cultural site (hlan thilri an chiahnak) pawl tu ka kah lai, tiin Trump hi a bia an letter mi a si. Iraq i American ralkap tampi a thattu ah hin general Suleimani hi tuanvo a ngeibiktu a si, ti a va si ko hmanh ah, tutan i hriam le naam heh a pawh i kahdohnak tuah ai timhmi kongah mipi theihin a ruang thitha in a chimmi a um fawn lo. Naicikua i American embassy le airbase pahnih a kah hna ruangah lehrulhnak tuah a duh le si, a timi an um bangin, “cuhlan i a puarthaunak vialte ruangah pei kah a timh cu a si ko cu” tiin a ti mi zong an um len ve.

Drone strike an tuahmi kong zongah biafiang a umlo khan in Democrats lei nih an hmuh ve caah, biahalnak an tuah len. House dihlak le Senate dihlak ah hi kong hi chimceih dingin Gina Hasel, CIA director, le a dang administration officials pawl ton an i tim. President Trump nih phung nih a ngeihmi tang te ah a nawlngeihnak a hman i, 2002 i President Bush kutah Congress nih nawlngeihnak an pekmi phung zulh in mah le mah (ram) kilven duh ah hi bantuk cawlcanghnak hi tuah khawhnak nawl ai ngeihmi a si, tiah White House nih a chim. Iran he raltho dingin President nih nawlngeihnak a ngeihmi hun rengh dingin House ah vote ka thlirter hna lai, tiah Speaker Nancy Pelosi nih a chim. Asinain cu bantuk khuakhan cu Republican nih an ukmi Senate nih an cohlanpiak bal lai lo, Trump chinchin nih cun naisai.

Iran he ralthawh lo dingin a cheukhat Democrats nih cun Trump cu thazang an pek taktak ko. Tawlrel awk thalo lakin ralpi hna a thawh sual lai caah, an kaphnih ning tein buainak hi hrial hna sehlaw a thabik ko. Ralthawh kan duhlo, tiin Iran lei zong nih an chim cang ko i, lungtak a si le si lo kan hneksak hna caan a si. Trump nih hin kaphnih biaruahtinak in karhlan i, kan thazang nganbik hi kan ralthazang a si lo i, vawleipi huap in mi kan hruai khawhnak (leadership) thazang a si hi Trump nih hun thei peng sehlaw kan duh, tiah Senator Jeff Merkley of Orrgon nih a chim.

Buainak karhter lo dingin kan duhpiak ko. Kannih cu a thawngdeuhmi kan si bangin, zeitik can paoh hnung kan tolh kho, cun hmai zong kan fong kho ko i, a herh a si ah cun hmunhma le caan zong duh paoh in ai thim kho kan si. Kan President zong nih hin buaibainak hi hrial a duh ve ko lai, ti ka zumh. Amerian nunnak le a duhnak kilven dingah thatein ai timlam pengmi President a si, tiah Senator Mitch McConnell of Kentucky – Repulican leader nih a chim.

General Suleimani hi Iran duh zawngin Middle East a muisam remhtu dingin Iran nih an thlahmi le an i bochan taktakmi ralbawi a si. Shiite thazang hi Iraq, Syria, Lebanon le Yemen ah dirh a duh caah, hi ram pawl ah hin heh tiah ral a thawhtertu ralbawi ngan a si. Cun, Iraq i ral an tuk cingling i American ralkap minung 600 lenglo nunnak a laktu raldohnak kha hi general pa nih a kutritmi lawngte an si. Dec. 27 i rocket in Iraq i American base an kah ruangah American minung pakhat a thih zong kha hi pa kutneh a si, tiin American officials nih an zumhbikmi a si. Iraq ah hi general pa hi ai choklet ngai i, American minung tampi that dingin ai timhlamh lio ah an thah hi a si, tiah an chim.

Trump nih office a hun co le cangka Iran hi US i a ral nganbik in a hun hmuh colh ve. Obama nih a kutritmi nuclear deal pi zong cu a hun chuahtak vurmar colh. Iran he biaruahtinak tuah dingin keimah lei ka cawlcang hmasa lai, a ti ko nain, Iran lei tu nih Obama he lungtlinnak an tuahmi hmangin a nuclear thazang cu a hun tuahtamh lehlam. New York Times

Credit: Chelsea Bawi

Leave a Reply

Your email address will not be published. Required fields are marked *