Dr. Ngun Cung Lian hi fak tuk in amah pumpak personality hnawrsuan in an phawmhmi ka hmuh tikah Chinmi hi kan mawh tuk ka ti

Social Media ah Dr. Ngun Cung Lian hi fak tuk in amah pumpak personality hnawrsuan in an phawmhmi ka hmuh tikah Chinmi hi kan mawh tuk ka ti. Hawile hna, Dr. Ngun Cung Lian hi Chin mino caah role model a sinak tampi a um. Kum upa hnu ah sianginn kai aa thawh ve i, vawleicung fimnak ah a parpazik Ph.D tiang a phan. A zuammi hna caahcun fimnak le thlawhtlinnak cu aa ciasa a si ko timi hi Chin mino caah thate in amah pumpak hrim in a langhter khawh tiah ka hmuh caah ka upat ngai. Zohchunh tlak pasal ttha a si. Kawlram ah a kir hlan vialte a riantunnak kha zoh ulaw, Chin forum siseh, CNF ah siseh, community ah a si ah, Chin miphun caah a caan le a fimnak tampi a pemi pa a si. Kum 22 chung miphun caah a rak ipeknak le a ttuanmi vialte kha philh piak ding hrim a si lo tiah ka ruah.

CNF chuahtak in Kawl ralkap he rian a ttuan tikah Kawlram caah a fimnak tampi a hmang kho lai. Amah pumpak le chungkhar ca zong ah hlawknak a um lai tiah ka ruah. Cucaah, keicu ka lawmpi ngai ko. Kawlram milu 60 millions lakah kanmah Chinmi pakhat dirhmun in top level ah rian a tuan kho ve tikah ka lawmhpi ngai. Cun, rian sangmi a ttuanmi a si ko nain, aa uah lo. Cucaah, Chinmi zapi/zaran lakah aa bual ve i, amah hmuhning le ruahning, pomning tete comments a ttial ve tawnmi hi keicu a tha tuk ka ti.

A ruahning le kan ruah ning aa khat lomi tampi a um lai. A pomning le kan pomning aa khat lomi zong tampi a um lai. Cucu mining phung a si. Dr. Ngun Cung Lian hi nupi le fa ngei, unau a ngei. Dawtu hawikom tampi a ngei ve. A hmuhning le a ruahning kan pawm lo ruang ah amah pumpak personlity tiang fak tuk in kan hnawrsuan ahcun amah lawng siloin amah dawtu tampi an thinlung kan fahter kho hna. Cucaah, comments kan ttial tik ahhin pumpak/personality itinak cu hrial cio hna usihlaw- topics cung tu ah kan ruahning le kan hmuhning cio hi thate in chim khawh izuam cio hna usih.

Credit: Zasang Cinzah.

Leave a Reply

Your email address will not be published. Required fields are marked *