Donald Trump bantuk hruaitu hi Kan Chin ram ah kan herh ve Part (1)

US president ah a tlingmi cu democratic party in an si ah Republican party in an si ah miza,mifim, le upat awktlak lawngte an si. Cubelte cu upat awk an i tlakning tu cu an i dang cio. Culakah Donald Trump upat awk a tlak ning hi kan chinram hruaitu hna zong nih zohchunh a tlak tiah ka ruah. Donald Trump cu president aa cuh hlan ah min thang cia a si. Mi rumcia a si. A rum caah humham power a ngeicia mi a si. Cucaah min than le rum cu a caah zeihmanh a si ti lo. President aa cuh lio zongah amah phaisa bak hmang in campaign a tuah. Cucaah Donald Trump nih president aa cuh tikah American mipi thatnak pakhat lawng kha aa hmui tinh i a chungkhar caah ruahmi zeihmanh a ngei lo.

Kan Chin ram ah ziknawh eihmur a tamnak a ruang pakhat cu hruaitu hna hi mirum tak le khuasa kho tak an um lo caah an rian tuannak ah an lakhah (salary) leng in an chungkhar kong an tenh chih mi a tam deuh i ziknawh le eihmur in an luat kho lo. Bianabia ah Chief minister nih ziknawh a ei sual ahcun a dang cabinet pawl le department dangdang zong nih ziknawh ei an tih ti lo. Ziknawh pek i rian a tuan mi pawl hrim nih Amah tham cu ziknawh pek ahcun aa nuam tuk an ti cang ko (keimah pumpak bak company rian tuantu nih a ka chimhmi a si). Chief Minister cu bianabia ah ka chimmi a si. Cucaah Chief Minister le Cabinet pawl tal hi cu khuasa kho deuh mi an si ahcun ziknawh le eihmur cu a tlawm deuh hrim hrim lai.

Cun Donald Trump nih promise made promise kept timi bia kha aa tlaih. A chim ning baktuk tein a hman a timi cu a tuah ko. Minung mithmai a zoh lo. Tulio kan chinram hruaitu hna cu mipi nih thimmi an si caah nawlngeihnak (power) an kut ah a um. Biachahnak tuahnak nawl an ngei. Nain a zeimaw thil ahcun mithmai an zoh caah an nawl ngaihnak an hmang ngam lo. Cunglei order an ti. Hi ti pumpak mithmai le khuami mithmai zoh ruangah khua khat le khua khat karlak buainak zong a phi chuah loin an ngan peng ruangah khua hnih karlakah buainak a zualter.

Hika zawn ah mipi tampi zong nih kan lung fian lo mi cu democracy phung ahcun mipi nih nawl kan ngei tiah an ruah. Cucu a hman lo mi thil a si. Zei democracy ram hmanh ah mipi kutah nawl ngeihnak (power) a um bal lo. Democracy phunghram ahcun ram pakhat nawl ngaihnak (power) cu mipi sin in a ra mi a si lai ti a si. Mipi sin in tiah a chim duhnak cu (voting rights ) timi na duhmi hruaitu MP kha zalong tein vote na pek khawh ti kha a chim duhnak a si. Kha tiang lawng kha mipi nih a ngeihmi nawl ngaihnak cu a si. Kha hnu cun an duh lo mi kong ah au khuannak nawl cu an ngeih nain biachahnak kong ah zei power hmanh ka ngei lo timi kha mipi zong nih an fian a hau. Thimmi nawl ngeitu zong nih mithmai zoh loin a nawl ngaihnak hmang in a hmanmi biachahnak kha a tuah awk si.Nawl ngeihnak pek ko buin cu a nawl ngeihnak a hmang ngam lo mi hruaitu cu meithal ken tung i a puah ngam lo mi an si caah hruaitu dingah an tlak lo. Part (2) ka peh te lai. Catialtu: Salai Tin Maung Win.

Leave a Reply

Your email address will not be published. Required fields are marked *