Dal (6)nak: Avoi Khatnak Cankarlak Kahdaihnak(11 June-8 July 1948)

Thlakhat fai aa kap cangmi Arab Israel dohnak pi cu daih lei panh tilo in zual lei a panh cang tikah UNO nih Folke Bernadotte (Sweden rammi Noble daihnak laksong hmutu) cu Arab-Israel kahdaihnak sertu ah hmangin a hun tlangtlak hna. Cutin kaphnih in raltuk daihchung dingin a hun nawl hna timi thawngpang cu thaizing maw kiptuh dah, kan ral Syria le a hawi Arab pawl nih an kan tei canglai i aa semka mi kanram Israel cu a tlau than ko ne laimaw tiah lungre a theituk mi Moshe Dayan le a ralkap hna le Israel ram caah cun Zanmang chia manhnak chung in vun i hlauh ah hna angam bantuk le Van leiin Bawmhnak a tla bantuk a rak si. Thaw chuahding a ngei tilomi Oxygen hun pek i a thawchuah a hun i hrimhthan mi bang Israel ralkap le hruaitu hna nih UNO i cankarlak kahdaihnak serding bia cu canthan hmang in daihnak cu an hun ser. Asinain cu daihnak cu caansau a nguh lailo ti kha Israel hruaitu hna le Moshe Dayan nih fiang tukin an hngalh. Aruangcu; Hi Arab-Israel kah daihnak i UNO nih a hun ratpi mi biatung ruangah asi.

Folke Bernadotte hruaimi UNO daihnak sertu buu nih Arab- Israel kar daihnak caah; Palestine caah a himmi ram cu Israel le Jordan karlak (tulio i Paletinian pawl umnak/ West Bank ti zongin kawhmi) ah Israel le Jordan nih cheuh hna in serding, Jerusalem khuapi cu Arab hna kuttaangah chiahding, Lydda Airport le Haifa (Israel kuttang ummi) Vanlawng bual hna cu mizei paoh nih hman khawhmi Vanlawng bual ah chiahding, Hi UNO chuahpi mi hi Israel he Arab pawl he an cohlang kholo nain can karlakk kah daih ding tuah an lung a tling.

UNO daihnak Palai Folke Bernadotte. Cu caankarlak daihnak cu hmang in an ralkap thazang hrimhthannak le hriamnam i zalhnak ah heh tiah chukcho an i vam. Cu caankarlak kahdaihnak chung ahcun Dayan nih “Thimhlei mi ralkap (Special Commando Force)” a ser i cu hna nihcun an ral a simi Arab pawl hna nih an hun tuk hna hlanah an luhhnawh hna i cawlcang manhlo in an tuk hna caah teinak nganpi an hmuh lawng silo in Arab ral pawl a ther in an rak ther ter hna. Arab-Israel ral cu daih lei panh loin a zual chinchin mi le teinak lam ah kal loin sunghnak nih a hun naih thluahmah mi hna Israel caah UNO nih caankarlak daihnak a hun fialmi hna cu maw vanthat tiah an hun cohlan i cu vanthatnak cu cantha ah an i lak i an ral Arab pawl hna he can raulo ah i dohthannak caah timhtuahnak an hun i hnawh cawlh.

Cankarlak Israel hruaitu David Ben-Gurion le Ministers hna nih Israel ralkap caah a herhmi hriamnam cawkding le cawknak ah a herhmi chawva an hun kawl.Cuchung ahcun Moshe Dayan zongnih a ralkap hna cu thimhleimi a tuah hna i “Nunnak thaptu ralkapbuu/ Commando” a dirh hna. Cu ralkap buu cu hriamnam thatha abunh hna i an ral Arab pawl dohnak caah abik in a hman mihna le Israel caah teinak a rak phortu ansi Cu ralkap buu i an tlaihtleng cu “A ra dingmi kan ral cu hngah loin kanmah nih kalhnawh ding” tihi asi. Hriamnam tlamtling a ngei mi le Ralkapbuu thate a ngei mi Arab pawl he kap cangmi Israel hna caah cun timhtuahnak le hriamnam thatha an i zalh than lo ahcun a voihnih nak kah doh than ding cu ruahchannak umlo tluk asi caah Van ralkap le Tilawng ralkap pawl an dirh i cuhna hmanding ral tuknak Vawlawng thatha le Tilawng hna, cun cuhna i hmanding hriamnam hna kha Europe ram le America ram hna ah an cawk hna.

Moshe Dayan nih Israel ralkap le Commando hna cu hitin cawnpiakna hna le tahchunnak a pek hna, “Kan ral hna nih an hun kan tuk hnuah i khamh le tukve hna nak incun anmah an kan tuk hlanah kanmah nih cantha lak hmasat in vatuk hmasat hna kha a tha deuh, cucu hnacheu teinak hmuhnak cia cang bantuk asi, kanmah nak a ngandeuh le a thawngdeuh mi hna nih an hun kan doh le tuk kha hngah in an mah lehrulh ding lawngah i timh i doh cu hruh vialte lakah hruh nganbik asi, zei hedah aalawh tiahcun pa nganpi bomban tha pi le pa fate bomban fa te aa vel mi he aa lo, pa fate nih cu pa nganpi i a rak thonghmi hngah in lehrulh a timh ahcun pa nganpi a thawnghmi i phet le i vennak ah a can a dihlawng silo in amah nih lehrulhnak le tikhawhnak cantha a ngeihlo pinah pa nganpi a thawnghnak in a sung cawlh lai, cucahcun pa fate nih pa nganpi aa relh hlan ah a phomh hmasat i a zangdernak zawn a phomh hmasat khawh ahcun panganpi cu cawlcanghnak le lehrulhnak can a ngeihmanh hlanah asung cawlh lai, Cucahcun kannih zongnih kan ral Arab ramthawng pawl hna he kan i tuk tikah anmah an kan tukmi hngah loin kanmah tu nih an i relh hna hlanah kan tukhna asi ahcun kan tei hrimhrim hnalai”

tiah Isral ralkap IDF le Commando pawl cu a rak cawnpiak hna. Cu cawnpiaknak hnacu Arab pawl he an i kah than tikah hmang in Israel ralkap hna nih an hman tikah teinak an hmuh lawng silo in an ral Arab pawl cu an lautuk in Israel Commando le IDF pawl cu a tih bak in an rak tih hna. Cun Van ralkap, Tilei ralkap le Tanks ralkap zong kha heh tiah a thawng mi le an ral Arab he aa cil khomi sinak tiang thazang a ngeimi siding ah an i zuam. Hi Tanks ralkap buu caahhin an rak ngeih hmasat bikmi cu June 28, 1948 i Mirang ralkap nih Israel ram chuahtak thai cangding in a donghnak bik an hriamnam pawl Rilii Tilawng in an thial antimh lio Haifa Tiilawngbual ah Israel pawl nih an rak firmi The Cromwell tank (Cruiser, Mk VIII, Cromwell (A27M)ti zawngin an auhmi) pahnih te asi. Cun anmah Israel Ralkap hna nih an ral Arab hna he an i kahnak i Ral nih an zamtak mi Tanks le Thirkham Motor pawl kha rem hawk tha mi an remh hna, cheukhat cu an tharchuah hna i cucu an ral Arab tuk nakah an hman than hna.

Israel-Arab kah dohnak cu UNO tlangtlaknak thawngin can tlawmpal an hun dai. Cu daihnak cu chikhat calawng asi i a rauhhlanah kan i kapthan cawlhlai tikha Israel hruaitu hna le abik in ralbawi Moshe Dayan nih an zumh caah cu caankarlak daihnak kar ahcun Israel humhimnak caah zeidah kantuah a herh timi kha an kawl i heh tiah tlamtlinh an izuam. Israel ram nih an ramrii lei paoh kha zeitluk indah a him khawh lai i kan runven khawhlai tiah an i zuam i Raldoh khamhnak (Defence strategies) tha tein ansuai. Moshe Dayan nih Israel (IDF) ralkap hna chungin thiamhlei nak a ngeimi le miraltha pawl tlawmpal kha a thimhna i nunpek raldohtu (Commando) ah a ser hna.

Cu “Nunpek ral dotu buu” i an tlaihtleng cu “A ra ding mi kan ral cu kanmah nih kalhnawh ding ti le pahchih law na hmuhmi ral kha an nunnak zua hlah” tihi asi. July 19,1948 bak in cu an tlaihtleng cu hmang in cankarlak kahdaihnak a hundih Israel ralkap le Commando hna nih an ral Arab pawl cu an hun nam ciammam hna tikah Arab pawl cu Israel hna cung i an rak theihning le ruahnak bang a rak si tilo tikah an lau tuk i Israel Commando timi min an theih bak in a tih in an rak tih cang.Credit: Peng Hlawnceu

Leave a Reply

Your email address will not be published. Required fields are marked *