Covid-19 khamnak raise vaccine tuahmi lak ah pariat 8 hi hmaisuang le ruahchannak tampi kan ngeih liomi an s

COVID-19 KHAMNAK RAISE (Vaccine) LE AN DIRHMUN May 12, 2020 ah Dr. Anthony Fauci (NIAID’s Director & US’ top infectious disease expert) nih Covid-19 khamnak raise (vaccine) tuahmi lak ah pariat (8) hi hmaisuang le ruahchannak tampi kan ngeih liomi an si, kan ruah ning bantuk si cun tukum chung ah kan siam khawh lai ati. Nithum rauh hnu May 15, 2020 ah President Donald Trump nih Covid-19 khamnak raise (vaccine) caah kan i ruahchanmi pahleili (14) an si cang, tukum dih hlan ah kan siam khawh lai ati ve. Zei dirhmun dah an phak timi a tawinak in ka van langhter hna lai 1.Moderna- NIH/Vaccine mRNA NIH (National Institute of Health), nih a ṭuanpi mi Moderna, Inc, Massachusetts, US hrambunh nih clinical trial an tuahmi PHASE-I cu FDA (US Food and Drug Administration) nih an cohlan cang hna caah atu hi PHASE-II nak minung 600 volunteers sin ah May, June ah an thawk lai. Group hnih ah an ṭhen hna lai, group-1nak cu kum 18-55 kar an si lai. Group-2nak cu kum 55 in a cung lei an si lai. An i ruahning bantuk in hlawhtlinnak an hmuh cun a tuan lei July 2020 ah cun vaccine chuah khawh si men lai anti. United State ah clinical trial an tuahnak si le March 2021 khi ahnu bik can an khiah mi (deadline) si.

2.CanSino Bilogics:/ Vaccine: Ad5-nCoV Tianjin, China hram bunh (Institute of Biotechnology of the academy of military medical sciences) nih April 2020 ah khan PHASE-II nak minung 608 sin ah clinical trial antuah cuahmah lio si. Annih hi hlawhtlinnak kan hmu lai tiah ruahchannak tampi ngei mi an si.WHO (World Health Organization) zong nih a zumh ngai mi an si. China ah clinical trial an tuahnak si le December 2020 khi ahnu bik caan ankhiah mi (deadline) si. 3.University of Oxford /ChAdOx1nCoV-19 Cambridge, United Kingdom hram bunh AstraZeneca le Oxford University nih clinical trial PHASE-I cu April 23, 2020 ah tlamtling tein antuah khawh. PHASE-II nak minung 1,000 sin ah an tuah cuahmah lio asi. Atutiang data an ngeih mi zoh in hlawhtlinnak kan hmu hrimhrim lai tiah zumhnak ngei mi an si. An i ruah ning bantuk in hlawhtlin ahcun September 2020 ah 1 million dose kan chuah khawh lai anti. United Kingdom ah clinical trial an tuahnak si le May 2021 khi a hnu bik caan ankhiah mi (deadline) si.

4. Pfizer and BioNTech / BNT162 New York, US hram bunh Pfizer le Germany BioNTech bawm in PHASE-I clinical trial cu Germany ah an thawk cang. PHASE-II nak cu July,2020 ah minung 7600 sin ah clinical trial cu, US le Germany ah antuah lai. An ruahning bantuk si cun 1 million dose tukum dihhlan ah kan chuah lai le million 100 renglo hmai kum ah kan chuah lai anti. Germany le United State ah clinical trial an tuahnak si le May 2021 khi ahnu bik caan ankhiah mi (deadline) si. 5. Sinovac Biotech / Vaccine:Unnamed: Beijing, China hram bunh nih raise (vaccine) antuah cuahmah liomi hi ruahchannak atam ko anti. Saram zawng phunkhat si mi (macaque monkeys) ah hneksaknak (test) antuah hna le an i ruahchan bantuk tein a result an ṭha. Cucaah, kan hlawhtling hrimhrim ko lai ti ah ruahchannak nganpi an ngei. PHASE-II nak cu minung 1166 sin ah clinical trial antuah cuahmah lio hna si. An tuahnak hmun cu China ah si le December 2020 khi ahnu bik caan ankhiah mi (deadline) si.

6. Inovio Pharmaceuticals / INO-4800 Pennsylvania, US hram bunh nih tlamtling tein PHASE-I an dihhnu ah PHASE-II nak cu May thla thawk ka ahkhan minung 40 sin ah clinical trial an tuah lio si. Zeitluk in dah minung caah a him le a ṭhat timi cu June, 2020 ah ai fiang lai le PHASE-III nak an thawk cawlh lai le summer 2020 dih lei ahcun ai fiang lai anti. South Korea le United State ah clinical trial an tuahnak si le November 2020 khi ahnu bik caan ankhiah mi (deadline) si. 7. Novavax / NVX-CoV2373 Maryland, US hram bunh nih saram zawng phunkhat simi baboons le zu (mice) ah an raise (vaccine) an hneksak (test) tikah an i ruahchan bantuk in a result ṭhat caah, minung 130 renglo sin ah clinical trial an tuah, le July thla chung ah raise (vaccine) ca ṭhatding le ṭhatloding ai fiang lai. Australia ah clinical trial an tuahnak si le July 2021 khi ahnu bik caan ankhiah mi (deadline) si.

8.Sanofi & GSK Vaccine:Unnamed: Paris, France hram bunh Sanofi cu GlaxoSmithKline Plc. United Kingdom he i bawm in raise (vaccine) an siam mi cu May 5, 2020 ah clinical trial an thawk cang. An i ruah ning bantuk in an hlawhtlin cun hmai kum 2021 ah million 600 dose kan chuahkhawh lai anti. France le United Kingdom ah clinical trial an tuahnak si le ahnu bik caan ankhiah mi (deadline) cu a fiang rih lo. 9. Johnson & Johnson / Vaccine:Modified Adenovirus: New Jersey, US hram bunh J&J nih September 2020 ah clinical trial kan thawk lai le tukum dihhlan ah data kan ngei manh lai anti. An i ruah ning bantuk in an hlawhtlin cun kum hramthawk ahcun lakhruak (emergency) hman awk kan siam lai le kum 2021 dihlei ahcun billion 1 renglo dose kan siam chuah khawh te lai anti. Clinical trial an tuahnak ding hmun le ahnu bik caan ankhiah mi (deadline) cu a fiang rih lo.

10. Remdesivir:California, US hram bunh Gilead Sciences, Inc siam mi Remdesivir cu NIH (National Institite of Health) he aipehtlai mi NIAID (Nationatil Insititue of Allergy and Infectious Diseases) nih minung 1,063 sin ah clinical trial an tuah le an hmuhchuah mi cu COVID-19 zawtnak ngei nih ni (11) chung ah an i dampi anti. Cucaah, FDA (Food and Drug Administration) nih lakhruak hman awk (emergency) ah a cohlan hna caah, sibawi te nawlpek nak in hman khawh a si. NIH ah samram zawng (Non Human Primate) 12 sin ah hneksaknak (test) an tuah hna le a result a ṭhattuk caah, hlawhtlinnak hmu ding in an zumh. Gilead nih lakhruak (emergency) hman ding ah million 1 reng lo kum dihhlan ah kan siam khawh lai anti.

11. Hydroxychloroquine: Raifanh sii Hydroxychloroquine cu COVID-19 thlawpnak ah a ṭha anti lio ah a ṭhalo timi sibawi te an um ve. Cucaah, FDA (Food and Drug Administration) nih mah sii hman ding ahcun sibawi te nawl peknak lawnglawng in hman khawh si lai tiah order an chuah. French research tuahmi nih cun, Azithromycin he hman ṭi ahcun an dam ning reng deuh anti. A tuhi NIH (National Institute of Health), US, China, France le hmun dang dang ah clinical trial an tuah cuahmah lio si.

12. Kevzara: March 2020 ah Regeneron le Sanofi nih mah sii hmang in clinical trial an tuah. A tutiang ah an hmuhchuah mi cu, COVID-19 in a zual mi caah a ṭha, na in a zawka mi le azual lomi caah cun ṭhathnemnak a ngei loh anti. A tuhi biatak tein experiment an tuah cuahmah lio si.13 Baricitinib: NIAID (Nationatil Insititue of Allergy and Infectious Diseases) he hmunkhat ah a ṭuanṭi mi Eli Lilly nih cun mah sii hi COVID-19 thlawpnak ah a ṭhatnak um anti. Cucaah, tuhi hlawhtling ding in an i zuam cuahmah lio si. 14. Favipiravir: Japan sii Favipiravir cu Zhejiang Hisun Pharmaceutical, China hrambunh nih hneksak nak antuah mi chungin mi tampi nih damnak an hmuh. Cucaah, National Medical Products Administration nih cohlannak a tuah hna le a herhmi paoh nih hman khawh ding in chuahnak nawl zong a pek hna. Tuhi biatak te in research an tuah chap cuahmah lio si.

Tutiang Covid-19 in vulei cung mipi a zawmi 4.6 millions, thimi 311,847 (by WHO). US ah a zawmi 1.4 millions, thimi 88,709 (by CDC).Thla nga chungah mah vialte nunnak latu pulrai tei ding in scientists thiamsang pawl cu chunzan it lo in khamnak raise (vaccine) siam an i zuam. April thla tiang ahkhan ai zuammi (115) an si cang. Mahlak ah a cung lei pawl hi hmaisuang deuh an si. Medical Research tuah ahhin, a tlangpi in kum 10-20 kar rau mi si SOP ( Standard Operating Procedure) ning cun. Side effect hi an i ralrin bik mi si. Tuhi Pandemic/Epidemic si caah cozah le nawl ngeitu nih zulhphung an chiahmi lakpiak an si. A renkhawh chung rengin raise (vaccine) an siamkhawh ding an zuampi hna. Mahbu hmanh ah thla 12-18 hi cu a rau hrimhrim lai ti ah Dr. Fauci le experts pawl nih anti. Naite Dr. Fauci chimnak ah, kan ruahnak nak in clinical trial hi a rengtuk. Aruang cu, tulio technology le ai volunteers mi antam caah National Institute of Health nih experiment kan tuahmi hi a reng ngaingai. Cucaah, kan i ruahning bantuk in thilkal cun kum dihhlan ah Covid-19 khamnak raise (vaccine) kan siamkhawh ko lai ati. Mahbelte kan theih hau mi cu tuchun ah data ṭha tuk kan ngei kan tilio ah, thaizing ah a ṭhalo (failed) kho. Cucaah mi tampi nih kan i zuammi hi a ṭha tuk mi si. Mah vialte lak ah hoho dah hlawn tling lai kan chim kho lo. Hohmanh hlawhtlin lo khawh zong si. Cucaah, tam deuh nih hlawhtlinnak kan hmuh si le vulei mipi caah ṭha chinchin ati. Cucaah, thlacamnak in bawm cio ko hna u sih. BAWIPA lawnglawng thil ti kho tu taktak cu si. Credit: Salai Maung.

Leave a Reply

Your email address will not be published. Required fields are marked *