CNA nih Hriamtlai dang a tih hnga maw?

Nai hrawng cu Chin ram thlanglei Paletwah peng i hmunkhuar mi AA le Kawl ralkap an i kahnak ruangah Chin miphun kan unau cheukhat nunnak a liam, harnak le temhinnak phunkip an ton nak kong media he dialo he an hun phozar luaimai. Cu lak ah CNA duhlo tu le leirawitu hna nih cantha i lak in kap phunkip in ca an tial an aukhuang. Ahleiin CNA nih AA a tih a timi le CNA ralchiatnak a tialmi an tam. Cu kong he pehtlai in tlawmpal hun langhter ka duh. 1. CNA nih hriamnam a lak i dothlennak a tuah mi hi zen rawn chommi Lai methal le Puahceh pawl aa kenmi misual luklak doh silo in Ram pakhat runvengtu Cozah ralkap an doh khi asi. Ram pakhat runvengtu hriamnam tling a ngeimi Cozah ralkap pi hmanh a doh cuahmah mi nih miphun fa pakhat asi i dothlennak a tuah vemi AA cu a tih ngaingai hngamaw? Atih lo ahcun ziah a kah velo?

2. Tulio AA nih kan mipi cungah harnak a pekhna timi khi ho nihdah 100 ah 100 in AA an si tiah a chim kho. AA an sitak ko ahcun ziah AA nihhin Chin miphun cungah maw dothlennak cu antuah, Kawl ralkap cung ahdah? Ral pakhat a do cuahmah mi AA nihhin an doh cuahmah mi Kawl ralkap hmanh an tei hlanah Chin miphun le CNA doh chih in ral ralhnih ser ding ngai in an thawng ko hnga maw? siloah ral pakhat hmanh tei hlan ah ral pahnih dohding ngai i timhtuah ding tiangtiang in an molh hnga maw? Cucahcun tulio thil sining hi ruah setmat cun thil a tlung cuahmah mi pinlei ah zertiannak a um tihi afiang, cucu ka hun langhter lai.

CNA le Kawl ralkap kahdaihnak min an thut ahkhan Paletwah ramthen kha CNA nih ralkap buu pakhat chiahding in an rak hal i Kawl ralkap nih umding in a awnh cang. Asi nain CNA nih Paletwah ah umding an rak i tim taktak tikah Kawl ralkap nih umding an duh thanlo. A ruang fiang in theih asi lo nain tulio AA nih Chin mipi cungah harnak an pekhna timi thawngpang a len lengmang ri in hin a hun lang ngaimi pakhat cu anmah Kawl nih အိမ်ကြက် ချင်း အိုးမဲ သုတ်ပြီး ခွပ် ခိုင်းတယ် (zuatti khat Arhli kha Umnang thuh in i sanhter) timi policy kha an hman tihi asi.

Ziahtiahcun AA pawl Palewah lei an rak tum tikah Kawl ralkap nih CNA le AA karlak ral siter in an phuhnih in cei cikcek in an i phomh hnuah le an mipi nih fak piin an temtuar i an hlawt hna tikah Mupi Arfa hlom in hlom hna ning tihi aa hmuitinh. Cucu hmundang tlangcung hriamtlai hna sinah Kawl ralkap nih a rak hman tawnmi policy asi. Atu zongah a cung i kan tial bang khin, AA nihhin Kawl ralkap hmanh a tei hna hlan ah Chin miphun le CNA he hin ral i serchap ding ngai in a thawng lo i a molh hrim lailo. Ziah tiahcun anmah Arakan ram chuh a timtu Bangali le ARSA pawl hna hmanh Arakan le AA kan ral tiah an chim phuan ngamhlo lioah Chin miphun le CNA he i ralding le i kap ding in cun an umthu ngai tak hngamaw tihi ruah loawk a thalo.

Cun CNA zong nih ram pakhat dirkamh tu cozah le ralkap pi a do ko mi nihcun Miphun fa asimi hna ca i dothlennak a tuah tu AA a tih lai ticu sullam a ngei hrimlo i a tih zong a tih nemmam lailo. A fiangmi tu cu Kawl ralkap zer le tian nakmi rap ah i foih loding in an i ralrin ca tiah tulio a linsa ngaimi Paletwah ramthen harnak kong hi i palh loding le mipi harnak chap loding in a tawlrel le hliahphoih a timh asi deuh lai.

Hi lioah kan Chin mipi nih kan baumi tu cu hmailei ah Arakan le Chin plmiphun karlak ah ral kan tho te khawh caah le Kawl ralkap hi foi le bai in kan duhmi hal an ngah lailo caah CNA thazang thawnter le dirpi a hau kan hngalhlo hi asi. Hriamnam an ngeilo kanti, kan cawkpiak duh tung hnalo, ralkap an tlawm kanti kan lutduh fonlo, Hrinphun tlawmte lawng a huaphna kanti hrinphun dang nih le kan lutduh fonlo. Chim ahle chim kho ngai i tuahtuan ding ah le Uifir bang bao lawng thawn, hiti lungput chuliahru kan ngeih ahcun zei ral cudah kan tei lai? Mi kan soi cun tuah ngamh veding kansi.

Credit: Peng Hlawnceu

Leave a Reply

Your email address will not be published. Required fields are marked *