Chinpa damlo zualhma rianrang in bawmh a herh

Malaysia ah ralzam dirhmun in a ummi Pu Ling Neig kum 44 cu a kal ( kidney) pahnih ning in lung 7 a um caah a rannak in sizung ah operation tuah hau dirhmun a si. Ampang sizung ah voikhat an kal cang nain operation tuahnak ding tangka an ngeih lo ruang ah sizung in an chuah chung. Sibawi te nih an chimnak ahcun a kal kidney pahnih in operation tuah a herh caah a tlawmbik RM -10,000 hrawng a dih lai tiah an chim. Cu kong he pehtlaih in Malaysia ah mizaw zualhma harsatnak a tong mi a bawmtu a simi Chin Youth Organizatin Malaysia ( CYOM ) sinah bawmhnak a rak kan hal. CYOM nih kut cung ah ngeih mi kan ngeih lo caah Malaysia ah a ummi kan Chin miphun hna le vawlei cung ramkip ah a ummi kan Chin miphun hna sinah bawmh kan rak hal piak.

COVID -19 ruang ah Malaysia cu March 18,2020 khan cozah nih thla thum chung ti awk lockdown an tuah i riantuan lo harsa tuk cio kan si hna. Cu lio ah hi bantuk damlonak zualhma sizung ah operation a van i tuah ding a si caah hin lungrethei taktak in chungkhar an um lio a si. Pu Ling Neig hi operation tuah zau lo ahcun a nunnak caah tih nung dir hmun a si cang. A tu ahhin a zun a zung kho lo. Tangka ngeih lo ruangah inn ah zohkhenh in ihkhun chung ah nganfah a tuar. Malaysia ah a ummi kan miphun hna le vawlei cung ah a ummi kan miphun hna nih dawtnak le zangfahnak he nan rak bawmh cionak lai zangfah kan in nawl hna. Pu Ling Neig hi kum 2010 ah khan Malaysia a rak phan. Nupi le fa pathum a ngei mi a si i a nupi le fale pathum cu an khua Laitlang ah an um. Kanpetlet Longdong khuami an si.

Pu Ling Neig bawmh a duh tu nih a tang lei CYO Malaysia upa sinah pehtlaihnak tuah khawh a si. President: Pu Tial Thang ( 0169838147 ) Secretary: Sang Ceu Lian ( 01124272191 ) Ngunkeng: Hanah Sui: ( 01161811950 )  Media & Info: Andrew Tum Tling ( 0105697881) Chin Youth Organization Malaysia Facebook page zong ah cakuat in chawnh khawh kan si. Bank zong in tangka kuat khawk kan si i Westren Union bank zong in tangka kuat khawh kan si. CYOM upa dang sin zong in pehtlaihnak tuah khawh a si. Malaysia ah a ummi kan miphun hna le vawlei cung ramkip ah a ummi kan miphun hna kan unau a simi Pu Ling Neig a nunnak chanchuah nak ding caah na ti khawh tawk tein na kut rak samh ve ding in Bawi Khrih min in zangfah kan in nawl hna. Chin Youth Organization Malaysia ( CYOM ) Zangfah tein rak share ve.

Nawlbia Riantuan Ning Le Pathian Vel. Pathian rian?uan dan hi khuaruahhar a si ko. Israel miphun kha sal an cannak kum 430 a van dih bak in Pathian nih Izip ram sal an cannak in a chuahpi hna, a luatter hna. Cu lawng hlah, Izip mi fater vialte an thih lio ah Israel mi fater cu pakhat te zong an thi lo. Bawipa nih fater thihnak in a luatter hna, a khamh hna. Pathian nih, Moses hmangin, sal cannak ram Izip ram cun a chuahpi hna. An tan khawh lo mi rili sen zong a chahpiak hna. A van dawitu hna Izip ram rawlbawi vialte kha rili sen ah a thah dih hna. Thla thumnak ah Sinai tlang an phan. Bible ah Sinai hi min hnih in a auh. Cucu: Sinai le Horeb tiin. Horeb a timi khi Sinai tlang tinak a si. Galilee rili khi Tiberias ti zong in a auh, Gennesaret ti zong in a ti tawn bantuk khin.

Sinai tlang ah hin Israel mi hi kum 2 tluk an um. Sau lak te an um. Exodus Dal 19 khi Sinai tlang an phanh a si. Sinai tlang ah cun kum 2 an um i Number Dal 10 tiang an um. Cuka cun Pathian nih NAWLBIA a rak pek hna. Ram car ah kum 40 chung an khualtlawn chung zong ah zeimawzat a pek rih hna, cun Moab nawlrawn ah tlawmpal a chap rih hna. Nawlbia pek an si hlanah khan Israel mi kha an phunzai taktak ko. Izip ralkap nih an van dawi hna ah khan an phunzai len, an ti hal i an phunzai rih, an rawl?am i an phunzai, nawl an ngai lo, mana zan khuazei chiah lo ding timi zong a thaizing tiang an chiah, an ti hal ?han i an phunzai fawn rih. Exodus 14—17 kar ah khan an phunzainak cu hmuh khawh a si. Mah tluk khan an phunzai ko nain Bawipa nih voi khat hmanh dan a tat hna lo, Bawipa a thinhung lo, kan ti ko lai.

Sihmanhsehlaw Number Dal 10 ah khan Sinai tlang in an van i thawh ?han. Sinai tlang ah khan Nawlbia a pek hna. Nawlbia pek an si hnuah an van phunzai ?han i: mei in a khangh hna, rai a tlunter, thinghmui zawtnak in a zawtter hna, kum 40 chung a vaihter hna, nawlbuar mi lung in an chehter hna, van in mei a tlakter i a khangh hna, vawlei a kahter i vawlei nih a dolh hna, rai in 14,700 a thah hna, Moses le Aaron lila zong nawlngaih lo ruangah Canan ram a luhter hna lo, rul a cukter hna, rai in 24,000 a thah rih fawn hna. Number 11-25 kar ah hmuh khawh dih an si. Nawlbia a pek hnu hna ah khan cun zangfahnak a um lo: rai in, mei in, rulcuk in, lungcheh in, thinghmui in, kum 40 vaihter in dan a tat hna. Zangfahnak hrimhrim a um lo. Tuchan minung tampi zong hi kha lio ah khan rak um ve u sih law dantat mi lakah khan kan rak i tel len ve ko lai.

Sihmanhsehlaw Pathian vel cu mu hihi a si: “Cun Pathian laksawng le mipa pakhat sualnak kha an i lo lo. Kha sualnak a hun zultu kha cu, “Na sual,” ti biakhiahnak a si; sihmanhsehlaw sualnak hi zat riamruam a hun zultu cu, kan phu kan tawk lopi a simi laksawng, “Na sual lo,” ti biakhiahnak hi a si.” (Rom 5:16) Nannih cu vel an ngeih hna caah an khamh hna i khamhnak nan hmuh cu amah nan zumhnak thawngin a si. Khamhnak nan hmuhmi cu nanmah tuahmi a si lo, Pathian laksawng a si. (Efesa 2:8) Mah vialte hi kan Bawipa Jesuh Khrih thawng lawng tein a si. Misual kan caah vailam cungah a thihnak, a thisen a thletnak le a thawhthannak thawngin a si.

Khamhnak kan comi hi Pathian laksawng a si. Kan phu kan tawk lomi laksawng a si. Pathian laksawng zumhnak in aa lakmi, a cohlan mi hna kha Pathian nih fa sinak a pek hna, a fa ah a canter hna, Thlarau a pek hna. Nawlbia nih cun nawlbuar mi le misual mi kha sual a phawh hna, dantat an si, thah an si. Pathian vel nih cun misual mi kha a dawtnak le zangfahnak in a kan tuamhlawm, a kan ngaihthiam, kan phu kan tawk lopi a simi khamhnak laksawng a kan pek, zungzal nunnak a kan pek. Mah vialte hi Bawipa Jesuh Khrih thawngin a si. Catialtu Rev. Abraham Ram Lian Khar

Leave a Reply

Your email address will not be published. Required fields are marked *