Chin Nungak Nih Laipa A Kan Holh Ko, Laipa Cu Mah Bantuk Pek An Thiam Lo

Lai pa hi mi koktlong kan si ko rua, Nungak le tlangval pehtleihnak le chawnhbiaknak lei ah chambaunak kan ngei in a lang, tutan ah Chin Nungak pakhat muidawh tungtai tha le catial thiam a si mi nih Laipa kan chambaunak a facebook timeline ah a rak langter. Pangpar dawh taktak a putnak hmanthlak a cuarter I “Tlangval Pekmi a si Lo mu, A reng ah, Laipa cu mah bantuk pek an thiam lo” a ti. A tangah Laipa cheukhat nih keimah nih ka thiam kan pek lai tiah comment tete an pek len.  Mah a tialmi ca hi capo zong biatak vas i zong ah Chinmi hna Nu le Pa kan I pehtleihnak ahhin thil biapi ngai a si.

Laipa hi nu le va karlak ah siseh, nungak le tlangval karlak pehtleihnak ah hin chambaunak tete kan ngei deuh ko rua, Kan Lainu nih mah bantuk in biachim le catial tete hi theih le hmuh pah lengmang a si, mah bak tuk tete bia le catial a um pah lengmang tih ahhin Laipa kan chambaunak a langter tu pakhat a si. Laipa nih biatak deuh I nu le va karlak le nungak le tlangval karlak pehtleihnak hi biapi ah kan chiah deuh a herhmi a si.

Kan nungak le kan nupi le nih an duhnak zulh le tuahpiak hi an thunlung tein an rak duhmi le ruahchanmi mi thil biapi pakhat a rak si. kan nungak le nupi biadawh le biathlum in kan chawnhkhenh hna le kan thangthatmi hna hi nu caahcun a rak sunglawi tuk hring hran. Na fel, na dawh, na fim, duh na nung, na kam um a nuam tibantuk in thangthatnak bia hi an caah Vitimen tha taktak mi a rak si.

Laipa nih kan nu hna hi an duhnak tuahpiak le zulh piak hi a biapi tukmi thil pakhat a si caah kan nupi kan nungak hna hi an I lawmhnak kawl in pangpar hna pek, Thil hna cawkpiak, an I lawmhnak biathlum chim I zuam ahcun laipa le lainu karlak ah duhdawtnak a fek chinchin lai. A tu bantuk in a dawh taktak mi pangpar petu an um lio can zong ah laipa an kan zai hnawh ti lai lo.

Leave a Reply

Your email address will not be published. Required fields are marked *