Barak Obama le US Media Empire

Muko Mekazin [ June, 2020] ah ka tialmi article kan hrawmh chin hna. Zeiltuk in dah Obama le left wing liberal democrats pawl nih US main stream media hmang in Donald Trump an dohnak le media an nawnnok nak kong a si. A sau pah caah lungsau tein ka rel piak te ulaw mi tampi nih an rel khawhnak dingah share ka tuah piak te ulaw ka lawm ko hnga. Biahmaithi. US President hlun, Barak Obama nih 2008 US thimnak ah Republican Senator John McCain cu a rak tei. 2012 ah Republican Presidential candidate Mitt Romney zong a rak tei thiamthiam. Barak Obama nih Republican Presidential candidates, John McCain le Mitt Romney a teinak hna lak ah a biapi bikmi cu Obama nih Social Media le Main Stream media pawl tha tein a hman khawh hna lawng si loin a lemsoi khawhnak caah a si an ti. 21 Century cu IT le Media nih hipmi chan a si caah IT thiamnak le social media pawl a hip khomi nih teinak fawi deuh in an co khawh timi cu al awk tha lomi a si. Zeiruangah Donald Trump President a si hnu ah main stream media hna le President Donald Trump karlak ah idohnak le isoiselnak a karh? A chunglei ah zeidah a cang timi hi theih phu le hngalh phu a si. A chunglei thil sining a hngalmi hna caah cun khuaruahar tuk ding a rak si lem lo.

Hillary Clinton Sungh Rungah Obama Ruahnak A Thleng: 2015 lio ah Barak Obama nih University siangngakchia sin ah a rak chimmi cu, “President in ka dinh hnu ahcun , Chicago khua ah ka kir lai I, minak pawl umnak community ah rian ka tuan lai” tiah a timhnak fiang tein a rak chim. 2016 kum US thimnak ah Hillary Clinton nih tulio President, Donald Trump cu fawi tein a tei lai tiah a rak ruah. Main Stream media hna zong nih opinion poll a phunphun an tuah I, Hillary Clinton tei ding in an phuan peng. Asinain a ruahning bantuk in a chunglei in thil a rak si naisai lo. Main Stream media pawl nih hin Hilary nih tei seh ti an duh lung in Hillary Clinton cu opinion poll ah an teiter peng. Asinain Hillary Clinton a sungh taktak tik ahcun Barak Obama zong nih a tinhmi community riantuan dingmi lam cu a thulh than I, media lei riantuannak ah kar hlan dingah biachahnak a tuah than. David Letterman nih a tuahmi talk show ah Obama nih a rak chimmi cu,” President rian a ka changtu ding cu Hillary Clinton a si lai” tiah a rak chim bal. Hillary Clinton a ruah lo ning in a sungh ruangah Obama zong a ruahnak le a tinhmi a thleng ve.

Obama Minung Pawl Media Ah Hmunhma Laak An Thawk: Obama lawng si loin Obama President a tuan lio ah rank sang pipi a tuanmi a hawile hna cu technology company, main stream media le news firm tampi ah rian an rak luh cio tik ah khuaruahhar ngai thil pakhat zong a rak si. Zeiruangah media kip ah Obama minung hna nih hmunhma an laak timi hi biahalnak a um lengmang mi a si. Obama hawile chungin Media raintuannak a thialmi pawl hi Obama cozah lio ah mi ngiathlaitu [ Top Spies ] pawl an I tel. Mah spies pawl cu Netflix, CNN, NBC, Google le Facebook ah rian an lut hna. Mah minung pawl cu President Donald Trump thlak khawhnak dingah Obama nih a thazang tha bik ah a hman hna ti a si. Media hmang in conservative ruahnak a phunphun an doh. US ram dirhtu hna nih khrihfa zumhnak in an rak sermi, US Constitutions tiang in doh le hrawh an timh. Khrihfa muisam a kengmi, US constitutions vialte hrawh dih an timh. Pathian muihmai a kengmi phun poah an huat. Khrihfa hna zumhnak fil dih lak in tuah an I zuam. Khrihfa hna zumhnak a tlaihmi hna cu mihrut an si ti tiang in an chim.

Obama Minung Pawl nih President Trump Sualnak An Kawl: Obama President a tuan lio, US President thimnak ah Hillary Clinton le Donald Trump nih election campaign an tuah lio ah Obama Justice department nih dossier, minung pakhat an hlan I, Donald Trump thil tuahmi vialte a thli tein hlathlainak an tuahter, Trump sualnak kawlnak caah a herh dingmi document vialte an khomhter. A dihmi phaisa vialte cu Hillary Clinton election campaign tuahtu hna nih an rak liam dih. Hillary Clinton cu thimnak ah Donald Trump nih a tei I, an ruah lo ningpi in a sung. President Obama nih a term a dih lai January 5, 2017 ah White house ah a riantuan hawi, le a bochan mi minung pawl cu meting ah a auh dih hna. Meting ah atel mi hna cu: Vice President Joe Biden, director of National Intelligence James Clapper, National Security Agency Director Michael Rogers, CIA director John Brennan, FBI director James Comey le National Security Adviser Susan Rice le Deputy Attorney General Sally Yates an I tel. Mah meting ah Obama nih biapi bik in a rak ceihpi mi hna cu zeitindah Donald Trump hi President a sinak in kan thlak khawh lai timi le zetindah media chungah kan luh lai timi kong a si.

President Trump le Obama Minung Pawl Idohnak: Obama chan lio ah Department of Justice nih a rak hlanmi dossier sin in an khawmhmi lih le hrolhrawl in an ttawnmi document pawl cu Obama minung pawl nih CNN sin ah a thlite in an zuhter I, thawng an pek hna. Mah thawng cu FBI nih an zuhter hranhram mi a si an ti. Mah kong cu FBI director hlun James Comey nih President Trump cu a chimh. Mah lio caan thengte ahcun Obama minung, National Intelligence Direcotor, James Clapper nih Dossier pa le CNN Jake Tapper cu a thli tein a tonter hna I biaruah tinak interview an ngeihter hna. Mah biaruahnak an ngeih dih hnu ah CNN nih FBI director James Comey nh President Trump briefing a pekmi kong cu an phuan colh ve. Cu tlawmpal ah dossier nih a khomh suatmi document cahmai 35 cu Buzzfeed nih a dihlak in an phuan piak hna. Mah vialte hi a hlankan in timhlamh cia tein an tuahmi a si kha President Donald Trump nih a rak theih. Mah ruangah President Trump nih FBI Director Comey cu May 9, 2017 ah a rian in a phuah colhnak a si an ti.

Dossier nih a khomh piakmi hna document vialte media sin ah an zuhter dih hnu le an phuan dih hnu ah National Security Intelligence Director James Clapper cu January 20, Donald Trump President rian a awt lai teah a rian in amah tein a phuak diam. James Clapper cu a rian in aa phuah hnu thla 6 a si ah CNN nih national security analyst tuahtu dingah rian an pek. CNN ah dossier sin in khawmh suatmi document a pek hna ruangah James Clapper cu CNN nih phaisa zong tam lakte an pek ti a si. Mah rian a thawk hnu cun President Donald Trump thangchiatnak le soiselnak cu CNN news ah a let in a hung karh.

Obama le A Minung Pawl Media Ah Rian An Lut: Barak Obama le a nupi, Michelle Obama zong online video a tuahtu, Netflix ah political documentaries tuah ding in Netflix company he hnathlaknak minthut nak an tuah ve. Obama te nupa nih a tlawm bik in 100 million cu an hmuh lai tiah ruah a si. Obama te nupa nih Netflix I riantuan ding in hnathlaknak an ngeih tlawn pal ah, Obama president a tuah lio I, national security advisor a rak tuanmi, Susan Rice zong Netflix Board of Directors ah rian an pek colh ve. Susan Rice nih hin MSBC TV ah President Donald Trump nih ramdang mi [ Russia] sin in information le ruahnak a laak lai tiah a zumhnak kong in President Trump cu soisel a thawk ve. CNN nih rian an pekmi Obama minung James Clapper nih CNN in President Donald Trump nih 2016 thimnak lio ah Russia sin in bawmhnak a hal ti in biatak tein soiselnak a tuah.

CNN nih Trump sualnak kawltu dingah CIA le FBI a rak tuan balmi zong rian an pek hna. Mah hna cu CIA director a rak tuan balmi, Mchael Hayden, CIA agent hlun, Steven Hall, FBI agent hlun, Asha Rangappa, FBI agent hlun James Gagliano, hlan lio Deputy National Security Adviser Tony Blinken le hlan lio national security council adviser Samantha Vinograd hna an si. Mah vialte hi CNN nih Trump dotu dingah an hlanmi hna an si. Mah hna nih hin Donald Trump tlamtlin lonak pakhat khat an hmuh ahcun chun le zan in media hmang in sum phomh in an pomh I an soisel.
Mainstream Media Dang Ah Obama Minung Rian An Lut

CNN lawng si loin main stream media a simi, NBC le MSBC zong nih Trump huatu minung an hlan len ve hna. Obama chan ah CIA director a rak tuanmi, John Brennan cu NBC National security analyst tuah dingah rian an pek. Brennan cu Russia nih US election an hnursuan timi classified information kha media ah a zuhter tu a si tiah puhmi a si. NBC media I rian a ngah caah President Trump dohnak caah caan tha a ngah than. Obama kuttang ah chief of staff for FBI director a simi Chuck Rosenburg, Deputy director national security advisor Frank Figliuzzi, chief of FBI counterintelligence Juan Zarate, Deputy National security advisor Ken Dilanian hna zong rian an pekmi hna an si. Ken Dilanian hi Los Angeles Times ah reporter a rak tuanmi a si I, article a tialmi poah Obama le CIA sin ah approve a tuahter lengmang tu hna a si.

Cucaah cun Main Stream Media tam deuh nih Donald Trump an doh peng mi hi Obama minung pawl hna nih main stream media ah hmunhma an ngah ruangah a si. Donald Trump president a kai hnu ah Media tampi ah cozah he a pehtlaimi classified information a zut lengmangmi hi a let thum in a karh deuh ti a si. President hlun, Obama minung hna nih media kip ah cozah he a pehtlai mi information tampi an pek hna ti hi a fiang ngaingai mi a si. President Donald Trump chan ah hin dossier asiloah whistleblower timi a thli thup in cozah classified information Media sin ah a phuangtu tampi an chuak. . President Donald Trump chan ah hin classified information, timi cozah biathli hi kum khat ah buaktlak in voi 104 a zuh lio ah Obama chan ahcun kum khat ah 39 lawng a zut ti a si.

Barak Obama le Media Pawl Pehtlainak: Barak Obama cu President kum 6 a tuan chungah hin “Silicon Valley’s President” ti tiang in an rak auhmi a si. Technology company nganngan a simi, Amazon, Apple, Facebook, Microsoft le Google campany hna a lemsoi hna ipethtlainak fek tein an rak ngei ti a si. Obama nih a ttih bikmi cu Media I soisel a si an ti. Election Campaign on Accountability Data I an hmuhning ahcun White House i Obama a um lio ah hin Google palai pawl cu zarh khat ah meting a tlawm bik voikhat lengmang White House ah an kai ve ti a si. Obama kutang ah rian a tuanmi balmi, minung 250 cu Google company le Google he a pehtlai mi company ah rian an lut dih ti a si. Google executive chairman a rak tuanmi Eric Schmidt pumpak hrimhrim nih Obama election campaign ah biatak tein a rak bawmh.

Obama nih President in a chuah hnu thla hnih ah California state, San Jose khua, Fairmont Hotel ah technology company I hruaitu pawl a rak ton than hna I a lemsoi hna t a si. Mah tonnak ahcun Obama President a tuan lio I, Cyber Security policy director Nathanial Gleicher [ atu ahcun Facebook cybersecurity lutlai a tuan cang] department of homeland security analyst a rak tuanmi, Jason Ally [ atu cu Google ah search quality analyst a tuan cang], NSA analyst a rak tuanmi, Andrew Honig [atu cu Google ah software engineering manager a tuan cang] mi hna an I tel. Google le Facebook ah hin hlan lio Obama minung hna nih hmunhma tampi an laak khawh caah Google le Facebook hmang in mipi sin ah a dik lomi information tampi an pek hna. Democrats party le liberal ruahnak pom ding in mipi sin ah information tampi an pek hna. Republican le Donald Trump he a pehtlai mi thawngpang le information tampi cu fawite in mipi nih kawl khawh lo ding in renghnak an tuah ti a si. Conservative pawl ruahnak le Pathian zumhnak he a pehtlai mi khrihfa pawl cabia le thawngpang poah cu fingrilh in an rilh hmasa lengmang ti a si.

Obama Minung Hna Nih Media Hmang In President Trump An Doh: Senate Judiciary Committtee nih July 17, 2019 ni I hearing an tuahmi ah Dr.Robert Epstein nih testified a tuahmi ahcun Google search engine nih hin 2016 President election lio ah thimfung thlatu minung million pakhat tluk cu lung aw-tawm in a tuah hna I, democrats le Hillary Clinton lei ah thimfung thla ding in an lung a laak khawh hna tiah a chim. Vawleicung minung 90% nih Google cu thil kawlnak ah an hman bikmi engine a si. Google nih a ngeihmi, You Tube zong cu Google engineers hna nih conservative ruahnak le information an chiahmi le an thlahmi poah cu American mipi zoh kho lo ding in an tuah piak hna.

Cucaah President Trump nih mainstream media pawl, Google, You Tube le Twitter cu mah bantuk in censor nan tuahmi hi American constitution nih a pekmi zalong tein chimnak nawl a kan pekmi nan buar a si, “ It is actually a weapon used by radical socialist to attack both God and America” tiah a ti hna. 2016 President thimnak ah democrats pawl cu President thutdan an sung, Senate zongah an sung, Supreme Court zongah an sungah. Asinain Democrats pawl nih Silicon Valley [Amazon, Facebook, Google,Microsoft ] le US mainstream media pawl an tlaih khawh hna caah minung tampi cu media hmang in an thluak an tawl hna. Laimi lak ah bochan mi kan pale hna le pastor cheukhat pawl hmanh an thluak an tawl cang ngai hna.
Biafunnak

US i minthang media tam deuh cu left wing Liberal Democrats pawl ruahnak a pommi main stream media hna nih hmunhma tam deuh an laak i an hip deuh hrimhrim ko tiah ka ruah. Conservative ruahnak le Pathian zumtu hna ruahnak a simi poah cu an doh I, khrihfa zumhnak tiang fil dihlak in an tuah. Liberal ruahnak cu mama khaih in an kan khaih . Mainstream media lawng zing chiar, zan chiar a zohmi hna caah cun I zumh lo awk zong cu a tha lo. Ca a rel lomi, zumhnak a fek lomi le tlaithleng hrihhram a ngei lomi caah cun liberal ruahnak nih thluak tawl a fawite. Kan i theih lo le kan i hngalh lo kar ah liberal ruahnak nih huansam tein a kan phum ziahmah. Thil dik hi a hram thawk ah a thup tawn, asinain thil dik nih a donghnak ah teinak a co zungzal. Catialtu Salai Lairam Thang.

Leave a Reply

Your email address will not be published. Required fields are marked *