BAIBAL NING LOIN PATHIAN A BIAMI HNA NIH REL HRIMHRIM DING

Pakhatnak, Baibal cu dawtnak cauk asi: Pathian nih musual a kan dawtnak cauk asi. Dawtnak lam a kan hmuhsahtu asi, Baibal na rel i Baibal ning i na nun ahcun dawtnak na ngei chin lengmang lai. Na Khrihfabu na dawt hna lai. Na unau na dawt hna lai, miphun dang cung zongah dawtnak na ngei lai i na ral hmanh kha na dawt khawh hna lai. Pahnihnak, Baibal cu cawnpiaknak cauk asi: Pa le fa in cawnpiaknak ah, mah le mah i cawnpiaknak ah, Khrihfabu i cawnpiaknak ah, zumlotu cawnpiaknak caah a ttha bikmi cu Baibal asi. Baibalca nakin a ttha deuhmi cawnpiaknak cauk an um lo. Baibalca nakin fimnak le hnalhnak a kan pe kho deuhmi cauk dang an um lo. Zeicatiah Baibal i a ummi bia hna cu Pathian ideas, Pathan thinlung i aummi kha an ttialmi an si.

Pathumnak, Bibal cu a palh kho lomi a si: Cauk tampi ah mi min hna an i palh tawn, mi tuanbia hna an i palh tawn, mi kum hna an i palh tawn. Cawnpiaknak an chuahpi ning hna an i palh tawn. Asinain Baibal cu a palh kho lomi Pathian sin in a rak rami bia kha an ttialmi asi caah a palh kho lomi cauk asi. A palh kho lomi Baibal cu na rel i cu ning tein na zulh ahcun na biachim na palh kho lai lo, na Pathian biak ning zong nai palh kho lai lo. Holhtheihlo hla zong na lih in na sa lai lo. Baibal ning in Pathian kan biak lo caah kan Lai Ram cu hruh hlasah le holhtheihlo nih mei bantukin a hliao dih cang. Palinak Baibal cu a thiangmi a si: Baibal cu a thiangmi Pathian cawnpiaknak cauk asi caak Baibal ningin na kal ahcun na thinlungput a thiang lai. Na Pathian biakning a thianghlim lai. Na Pathian rianttuan ning zong a thianghlim lai. Pawcawmnak caah na kawlhawl ning zong a thiang lai.

Panganak, Baibal cu a tlingmi cauk asi: Vawlei cung minung vialte diktein, hmantein, pial sual lo tein , pawkhim tein kan i hruai khawh nakhnga Pathian nih a zaa tiah a minung vialte hna a rak ttial termi cauk asi. Pathian nih hihi a zaa cang ati cang caah chap khawh ti lomi cauk asi. Baibal caah cun Pathian nih minung hna caah hngalh a herh tiah a ruahmi vialte kha tling khitkhet tein a ttial ter dih cang hna. Baibal a um ciami bia nihhin na herhmi vialte an cawnpiak khawh dih. Pathian na theih chap nakhnga nai lar chap a hau ti lo. Mang hna na manh chap a hau ti lo. Kha nih khan Baibal chung tuin lam an pial pi deuh lai.

Paruknak, Baibak lawnglawng hi zulh dingah peekmi asi: Khrihfabu nih kan zulh ding, kan chimrel ding, kan i nunpi ding, kan i hruainak caah kan hman ding, thil dik le dik lo thleidannak caah kan hman dingmi cauk cu vawlei cungah uk khat lawnglawng a ummi cucu Baibal hi a si. Baibal i a um lomi hmang in mi na cawnpiak sual hna i mihna kha Baibal i a um lomi na tuahpi hna ahcun cawnpiaknak hmanlo saya na si. Bianabia ah, holhthrihlo hla lih i sak i mipi laam ter tehna. Thiang Thlarau nih a tuah lomi Thiang Thlarau hei puh te hna hi Thlarau volhpamh asi , cun Judahmi hmanh nih prophet an ngeih ti lo hnu i prophet ka si hei ti tehna vialte hi Baibal ning i a kal lomi hna nun ning le dirhmun lawngte an si dih!

Pasarihnak, Baibal cu damnak le nunnak cauk asi: Lungretheih zawtnak na ngei maw? Baibal kha rel law na dam lai. Hngilh kho lo in na um sual maw? Baibal bia kha ruat law mitkuh thaw tein nai hngilh lai. Na van a saang sual maw? Baibal bia kha ruat lawn na hna a ngam lai. Thlarau nunnak na ngei lo sual maw? Baibal bia kha i nunpi law zungzal nunnak na ngei li.

Pariatnak, Baibal cu Pathian nih an auhnak cauk asi: Baibal cauk pumpi kha rel hmanh nangmah na tuan bia asi. pathian le nangmah karlak ah a herhmi bia, nan i pehtlaih khawh nak ding bia le nan i pehtlaih hnu ah a rian ttuan dingin an auhnak “aw” lawngte ansi. Pathian aw kha theih i tim hlah. Baibal ah fiangtukin an auh cang. Pathia na theih chap nakhnga aw na theih chap a herh ti lo. Pathian nih aw in bia a rak chim cang i cucu cauk ah an in ttial piak cang i cucu Baibal hi asi. Pathian aw na theih ahun prophet na si hnga. Asinain atu kan chan cu prophet chan asi lo i Baibal chan asi cang caah Pathian aw cu na thei hrimhrim lai lo. Zeicatiah Pathian nih aw a hmang ti lo. Baibal bia hmangin bia a chim cang. Aw na theih ahcun Pathian aw asi lai lo, Khawchia aw asi lai.

Baibal cu Jesuh nih a dirhmi Khrihfabu nih kan zulh awk caah Pathian nih a kan peekmi cauk umchunte asi caah Baibal ning i na kal lo ahcun na Pathian biak hi san a tlai lo. Hell ah na thla ko lai. Baibal i a um lomi kha mi na cawnpiak peng hna i na tuahpi peng hna ahcun chanthar nal-prophet na si. Na caah Pathian biacheihnak a din te lai lo.

Credit: Dr. Aung Myint Thang

Leave a Reply

Your email address will not be published. Required fields are marked *