A PETU MAW A BIAPI DEUH, A THLUACHUAH DAH?

Ulenau hawile hna, Zumtu hna hi thluachuah a phunphun hmuh cu kan duh ngai. Laksawng phunkip co le hmuh cu kan duh ngai. Thluachuah le laksawng cung lawng ah aa lawm mi zong kan tam ngai. I lawmh phu zong a si hrim ko nain cu lawmhnak nih cun thluachuah le laksawng hmuh duhnak lawng kha a chuahter tawn. A biapi deuh in kan lawmhpi ding cu PETU PA kha a si. Amen. Cunglei kan Pa uar a um khunnak cu Jesuh Khrih thawng in Pathian fa ah a kan canter hlei ah, kan hawikom ṭha zong ah a kan ser duhmi hi a si. ‘Nannih cu sinum kan ti ti hna lo, zeicahtiah sinum nih cun a bawipa tuahmi kha a hngal lo. Sihmanhsehlaw ka Pa sin in ka theihmi vialte kha kan chimh dih hna caah, ka hawile, titu ah kan ti cang hna’ (Jn 15:15) Amen.

Asi nain hawikomhnak kan ngeih deuhdeuh tik ah zeidah a kan tuahpiak khawh, zeidah a kan thluachuah khawh, zeidah laksawng a kan pek khawh timi cung ah ai hngatmi silo in thluachuah ngeitu, thluachuah petu, laksawng pe khotu Pa a sinak, Amah cu Amah a si ko timi cung tu ah kan hawikomhnak cu ai hngat zungzal awk a si. Amah kha kawl zungzal ko, a thluachuah le a laksawng kha silo in, thluachuah le laksawng petu Amah kha kawl ko, kom ko, zoh ko. Cucu zumtu kan rian nganbik a si. Amen. Pathian he hawikomhnak taktak a kan dawntu thil cu zeidah a ka tuahpiak khawh, zei thluachuah dah ka hmuh lai, zei laksawng dah ka co lai timi a hlawknak lawng zoh kha a si tawn. Mi cheukhat cu kan cung in hlawknak hmuh an duh ruang ah an kan komh. Micheu cu a miak hmuh an duh caah mi an komh hna.

Pathian rianṭuantu zong hi mi kan komh tik hna ah kan i ralrin ngaingai ding a um. Cucu, mirum milian le hngalhmi, thawhlawm tho kho deuh le a kan pechan kho deuh lawng komh sual lai hi a si. Chungtel dihlak, zumtu dihlak i ruang tein, a si khawh chung in Pathian bia ruahpi hi kan thlacamnak le kan i zuampeng bak ding a si. Cu bantuk hmanthlak cu Pahtian he kan i pehtlaihnak zong ah a si. Petu Pa kha pekmi thluachuah nak in biapi deuh ah chiah zungzal hi zumtu kan rian nganbik a si. Pathian kan biak hi hlawknak hmuh duh menmen le a thluachuah le a laksawng cung i lawmh sawhsawh men caah silo in, Pa le fa i hawikomh nak tu a si i zumtu nun a kan tah tu zong a si.

Ulenau Hawile hna, laksawng nak in laksawng Petu kha rak kom deuh ve ko. Laksawng cu a hnuzul a si. Thluachuah cu a hnuzul a si. A hram asi mi Pa tu kan ngeih ahcun a laksawng le a thluachuah vialte zong cu kan mah ta ṭhiamṭhiam a si ko lai. Haleluia! “A Fapa kha a kan pek, thil vialte zong hi a lak in a kan pe hnga lo maw?” (Rom 8:32b) Amen. “Ka fapa… ka ngeihmi vialte cu na ta an si dih…”(Luka 15:31). Amen. A thluachuah le laksawng nak in a kan PETU PA hi a biapi deuh zungzal ko e. Bawipa nih sunparnak co ko sehlaw reltu vialte caah thlaraulei thluachuah kan hmuhnak si hram ko seh. Amen. Khrih ah nan hawi, Thawngling Mualhlun, CEBC Indianapolis. May 26, 2020.

Credit: Dr. Rev. Thawng Ling Mualhlun.

Leave a Reply

Your email address will not be published. Required fields are marked *