2020 Myanmar election caah ka hmuhning

Ram pumpi thimnak hi ram tam pi ah a um cio i a ram hoih in thim kum le tuan caan term tu cu an i dang cio ti cu kan theih cio mi le hmuh cio mi a si. Khuazei ram hmanh ah a biapit tuk cio caah thim lai nikhua a vun neih cun an party cio nih teinak thantar thliar khawh ding ah an i zuam cio hna i, mipi sin ah an thil ti khawhnak langhsar an i zuam cio hna. Khat lei in chim ahcun party pakhat le pakhat an santlaih lonak, an i phor zar hna i an i soisel ko hna. Cu vial te cu pumpaak i huatnak le zei i rel lo ruang ah si lo in an mah party cio tthawn in ram hruai an duh cio hna caah an si dih. Kan nih Kawlram Myanmar zong a ra lai mi November 8,2020 thimnak pi cu tuah ve ding a si cang caah party kip cawlcanghnak an ngei cio hna. Party chung ah rian ngei mi lawng an buai lo zei party dah thimfung kan thlak hna lai tiah a buai mi zong kan tam pi ve .

Mi tampi cu an i fiang cang lai nain mi zei maw cu a fiang rih lo zong kan um kho men. Cu cu a si ve hrim awk zong a si. A ni tik zong ah thimfung kan thlak hrim cio ding zong a si thimfung thlaknak nawl a ngei mi paoh nih cun. A mahbelte LaiMi Chin mizeimaw kan ruahnak, kan lungput le kan biachim holh rel ah zoh aa dawh lo mi thil tamtuk a um mi hi cu ngeihchiat awk ngai in ka ruah. Ttanh hlei mi ninung a siloah ttanh hlei mi party cu a um phung a si ko. Zohdawh te le lungput ttha he kan ttanh cio hna ding tu a biapi tuk. Thil pakhat langhsar faknak ကြော်ငြာ kan duh tikah a dang pakhat he tahchunhnak lak in chimphuan le cuai thlai tti phung cu a si awk a si ko. A mahbelte a dik mi cuai thlainak tu in kan thlai a herh ve( cuai deu hrokhrol chim kan hman lo a hau). Kan tuah ding le tuah lo ding tiah ka ruah mi a tang ah ka rak ttial lai.

Pakhatnak, Na zumh mi hna minung le na ttanh mi party ah lungawttawmnak um lo tein na thimfung thla top ko fial chom le hnek chom mi si lo bak ding. Pahnihnak, Na zumh mi hna minung OR teinak hmu seh ti na duh mi Party kha ngamh tein dir pi in au pi bak ko. hrokhrol le lihchim in ttan pi le au pi tu cu si hlah seh. Pathumnak, Na zumh mi minung OR party nih teinak an hmuh khawhnak ding caah a ralchanh tu minung OR party i a dernak na theih khawh mi cu mipi hmuh khawh ding zong in phozar le langhter awk bak ding si ko. hrokhrol le lih tu in cun si hin hlah seh. Cun, pumpaak huatnak le zolangh duhnak thinlung tu cun si bak hlah seh. Palinak, Ralchanhtu minung OR party kong na chim tikah holh ttha lo hrial bak ding. Volhpamh bia hrim2 cu chim bak lo ding Khrih a zum i a zultu kan sinak kha kan biachim holhrel le kan lungput in langhter i zuam hna usih. A tam pi rih lai nain asau deuh sual lai. Ttanh mi kha tongtor ttanh kha a ttha ve ko nain kan ttanh hnawh channak a ruang kan theih bu tein ttanh ahcu a ttha chin hnga.

Rili ral khatlei kalnak ding ah Ti le Thli kong a thei i Ti a thiam i lawng zong a zaap kho mi sin ah i cuan i cit maw na duh deuh lai, lawng a zaap kho ve sawh sawh mi sin ah i cuan dah? A fiang ko mi cu, Ti le Thli kong a thei i Ti a thiam mi sin kan i cuan cit cio ko lai( a zei maw thil cang ai kun kaw kan him deuhnak ding cu pei kan ruah a herh cu. Cu nih a langhter mi cu Party sawh sawh lawng in zok awk zong an ttha thlu hna lai lo. A minung nuncan ziaza( behavior, a ttha maw ttha lo, a fimthiamnak le a theih hngalhnak nih tah a tlinh maw tlinh lo tibantuk pawl zong tam pi zoh chih thiam a biapi tuk lai. A party min cu “Van Mi” Van Mi Party min hmanh i bunh ko sehlaw a minung Satan lucifer bantuk a si ahcun a fiang ngai ko rawhralnak a chuah ding. Hawidawt, nupa, unau hna a hlan ken in ttha tein timhtuahnak rak ngei ve cio te u tiah kan s hman ning palh sual mi le bia dawh ah lo a um sual ahcun nan ka ngaihthiam ding ah le theihternak nan ka tuah tthan ding ah kan nawl. Biafang palh sual mi le bia dawhcah lo a um sual ahcun theihternak nan ka tuah tthan ding ah kan nawl hna. U patnak he, Roland.

George Floyd a thihnak nih US ram pumpi cuul in biaknak lei hruaitu tampi hna an thin a phawh hna i, biaknak kong i an lung a tlinlonak langhter hram an i thok ve cang. Cu bantuk tein cun 1960 hrawngah khan civil rights movement an kalpi lio ah an rak tuah bal ti asi. Miphun thleidannak um ti lo dingin le, police riantuannak remhsiam dingin duhnak a langhtertu Minak khrihfabu, Catholics le Protestants, Judah khrihfabu le a dangdang biaknak he ai pehtlaimi phu tampi hna cu Conservative le mainstream khrihfabu hruaitu pawl nih an telpi hna. Floyd a thattu police cu lainawn hmuh (case) in bia an chahpiak cang ko nain, vawlei cung pumpi i duhlonak a langhtertu pawl nih cun police riantuannak remhsiam dingin an duhnak an langhter.

Hrih le hram tiang coih in khua kan cuan. Muslim hruaitu le Catholic tlangbawi pawl le sisters pawl he Judah rabbis pawl lam an zawhti. Biaknak kip in aho miphun ti um lo in an rak chuak dih cio hna, tiin Pax Christi USA i executive director a si mi Johnny Zokovitch nih a chim. Judah rabbis, pastor, Muslim tlangbawi, le a dangdang biaknak lei hruaitu 1,000 lenglo nih kan hnung zarh ah khan online in conference an tuah cio hna i, African American pawl timhciammam tein nautat an si nak hi zeitindah kan doh ning a si lai, timi kong an cawnpiak hna. Coronavirus ruang i social distance tuah ruangah thla 3/ 4 chung erh kan si hnu cun chuah cu kan duh cio cang fawn kaw, a tu bantukin zumhnak (biaknak) lei kam khel in lehnak kan tuahmi a thuk in a kau ngaingai mi cawlcanghnak a si, tiah the Religious Action Center of Reform Judaism ah director a si mi Rabbi Jonah Dov Pesner nih a chim.

Kan mipi pawl hi an thin a hung bak ko. Miphun thleidannak sautuk an tuar cangmi kongah an thin a hung, ram dang tluk in COVID-19 US nih kan tawlrel khawh lo mi cungah an thin a hung, miphun thleidannak le khat le khat i rualranlonak a fahtuk raungah le Judahmi dohkalhnak (anti-Semitism) le Islam dohkalhnak (Islamophobia) le vurang pawl tanhkhunnak (white supremacy) pawl an um peng ko rih mi cungah an thin a hung ngaingai, tiah Pesner nih a chim. 1960 hrawng i civil rights movement an tuah lio zongah khan biaknak lei phu pawl an cawlcanghnak kha hmual a rak ngei ngai i, tutan le bangah cun biaknaklei phu lakin duhlonak langhter in lam a zawhmi hi kan tling ngai (biaknak dangdang kan tling), tiah Pesner nih a chim.

ELECTION KONGAH, Evangelical Khrihfa le Catholic pawl dirpi nak a um caah Republican Donald Trump nih 2016 thimnak kha a tei. Evangelical Khrihfa le Catholic pawl nih November thimnak vote thlak an kal te thikah hin Floyd thihnak thawngpang le duhlonak a langhtertu pawl nih Trump an soiselnak tete hi rikhiahtertu thil an si te kho mi a si tiah an zumh cio cang. Biaknak lei minung pawl hi langhngantuk tlawmmam in party tanh lo dingin Federal tax rules nih a kham ko hna nain, an pumpak hmuhning langhternak nawl belte cu an i ngeih cio ko hna. Trump nih St. John’s Episcopal Church inntual i hman vai thlak a duh ruang tuktak i a kalnak lam a velchum ah a ummi daitein duhlonak a langhtertu pawl hranhram lo in ralkap le police a thioter dih mi hna hnu cun mainstream Catholic le Episcopal hruaitu pawl nih Trump cu an thangchiat ngaingai cang.

1960 lio ah khan cun Rev. Billy Graham telhchih in a dang mirang evangelical hruaitu pawl hna kha duhlonak langhternak ah an i tel ve lo. Asinain, tutan ah cun duhlonak langhternak hi khamh, asiloin vai tel ve lawlaw, tiin amah party chungin biaknak lei hruaitu pawl nih Trump cu ruahnak an pek.
State governors pawl nih an umnak cio i duhlonak langhtertmi an daihter lo a si ah cun, US ralkap ka thlah hnawh lawlaw cang hna lai, tiin kan hnung zarh i ai hrocer mi kongah teleangelist Pat Robertson nih President Trump cu a mawhchiat ngaingai. “Kan state governors pawl hi miralchia bantuk in a ruah hna rua. Mr. President, cu bang cu. Ai ningcang ruam lo dawkaw” tiin a mawhchiat.
Kan hnung zarh ah khan Houston ah Lakewood khrihfabu senior pastor Joel Osteen zong duhlonak a langhtertu pawl he lam a zawh ve i, “Dinlonak hi kan ralchanh i, minak kan unau pawl hi kan dirpi hna ding a si” tiin a chim.

Sunday ah khan Washington ah duhlonak a langhtermi evangelical khrihfa tampi hna he Republican Senator Mitt Romney (anih hi Mormon a si) lam a zawhti ve i, “Black Lives Matter” tiin tweeter ah ca a tial. 1960 lio bantuk te in khan, kan hnung zarh hrawnghrang khan cun khrihfabu a cheukhat pawl zong vote thlak dingin biatak tein minpek in an tang hna. The non-partisan Public Religiuon Research Institute nih Floyd a thih hnu i data a lakmi a langhter ningah, white Catholic lakin Trump a dirpitu hi 37% an si. 2019 ah khan cun 49% tiang an rak phan bal. 2016 lio le bangah khan cun 60% tiang an rak si.

Sifakmi Hna Tanrualnak “Zaangfahnak tein, ka thaw ka chuah kho ti lo hi!” tiin Floyd a au chung taktak kha cu second 46 chung a si. Cucaah, biaknak lei hruaitu hna nih online in Floyd thihzun tuarnak ngeihpinak ah, tiin second 46 chung daitein an um piak lawng si lo in, Monday nikhat chung rawl an ul hna. “Sifakmi hna Tanrualnak” (Poor People’s Campaign”) timi min bunh in 1960 lio i civil rights hruaitu Martin Luther King Jr. thah a ton hnu in an kalpi mi movement cu biaknak phu 16 nih June 20 ah online in mibu an hrihhawh hna i an vun tharchuah than “Nuncan ziaza kongah faaktuk in buainak kan ton lio pi a si. Nihin i kan tuah dingmi hi Floyd a thihnak kong lawng a si awk a si lo, ciammam tein miphun thleidannak phung a ummi le, police pawl thatlonak le, ngandamnak zohkhenhnak (healthcare) a um lo ruangah le, ralkap thazaang lawng thanchoter Chin lengmang duhnak phung a ummi vialte hna hi kan cemh chih awk a si,” tiin Greenleaf Christian Church, Goldsboro, North Carolina ah pastor a si mi Rev. William Barber nih a chim. Anih hi tutan online cawlcanghnak ah hruaitu bantuk a si.

Cuhlan ah a um bal theng lo mi cawlcanghnak tha ngaingai cu tutan duhlonak kan langhtermi nih a chuahpi cang – Los Angelies mayor bak nih police department ca i an chiahmi budged chungin $150 million bak a zuh i mino rian, healthcare le lungthin lei ai ningcanglo mi thlopbulnak caah a hlut diam, tiah Loas Angeles ah black pastor zong a si i, community activist a si mi Najuma Smith-Pollard nih a chim. “Cucu thil buai a si ka zum lo. Thil tampi kongah buainak kan tong, mi tampi harkan tong. Cucaah, hi buainak hi khuatlang pakhat lawng i tonmi buainak menmen a si ti lo – hihi kan ram pumpi, cun vawlei pumpi nih an buaipi mi thil a hung si cang,” tiah a chim.

Leave a Reply

Your email address will not be published. Required fields are marked *